Heb 2 | AOM | STEP | God-are Harihohuro aneraho iosirëmiromo hu böröme jië'ego ëhuni noehu God-are jö hejaroho bogo rumonimo'i biririvoromo ma'eno'ejo jöho nugo'i öre gö va'ojöëni.

Hebrews 2

God-hu baejavuoromo mare ramuaje jö noehu avoho uehorovo'iröhe jöhoje.

1 God-are Harihohuro aneraho iosirëmiromo hu böröme jië'ego ëhuni noehu God-are jö hejaroho bogo rumonimo'i biririvoromo ma'eno'ejo jöho nugo'i öre gö va'ojöëni. 2 Urimoho aneraëro Jew rajo hijo miono'oho God-are jöho bojëmareje. Ëaneraho bogo masijehu jëvadeje röhu jabesi jöho bogo sareri'ehu jio'i iae mae jiadeje. Iae mae jië'ëro ae rahu jö bogo ejëho'i mu gö gö vaejë'oho i'ue mana baenövareje. 3 A'i jaruvoho God-hu nosi aru'aho mare ramuaje jö bojamuijadoho ëho jö börömeje. Ae rahu ë jö vuonugë'oho i'ue baejöëni gororomo huruomoromo dinö'e va'ejo. Huruomo'iröhe öroho bogoje. Ëhesi bëhoho bogo aneraho uö'i Badaro aevoromo hesi jö'ëro majahuijamu jö hejare aribövioho jaburo ë jöe gemuoho majahuiromo uövuareje: Iae mae-ëjo. 4 Röhu bogo jabesi sivuoho ëma majahui'i a'i God-ro jabesi jöho ajëmiromo bogo gavarue darugo'e mue gö gö vaenövadeje noro garomo jöho mae uehorovoröhego. Darugo'e muoho vaeromo huhu nimadëhi hesi Aru'ahoho ua'ego noehu mu mae vaeröhe suvuore gö gö ëhi bojamuinövadeje noro ëhu'o garomo jöho mae uehorovoröhego.

Iesu hu baejavuoromo manö ramuade a böröme jiaje jöhoje.

5 Röhu ëhi jië'e mu masijoho ëho u'emu jioröhe öri ari'o i'o hesi muohoje. Na ë hesi jöho jajive. God-ro ë öri ari'o i'o bamo'i uehorovadevaroho bogo uvadeje: Aneraëro masije riravoromo ë öri ari'oho mueberuomo'ajëjo. 6 Bogo aneraho jaburo mueberöhego uvo'i a'i jöe gö God-are surire uvë'eje:

God-ajo. Sa'are aribövioho ma-bise'e javuajëjo.
Röhu jero nosi jöëni uehorovanue höjo.
Nosi ihoho bogojavuanovajëjo.
Röhu jero no muebejavuanue höjo.
7 Anera masijo jio'amaje jabesi bëhire sa'are aribövioho no bamavuane höjo.
Ajohu'o iho mabëhohu'o bojamuane höjo.
8 Noro hörëro taemoromo muebe'amoröhego bövie bise'e nosi höru uhunö bahijahuane höjo.
Ëhi jajivë'eje. Bövi bise'o nosi höru uhunö bahijade jö hesi bëhoho aho noro aho'obëhe ruahö'ö'amoromo muebe barë hesi javue. Röhu avevejö'oho bövioho bise'oho nosi höru uhuroho bogojavuë'ëro ëhu'ëro aho no bogo aho'obëhe taemoromo muebe'amarueje. Ëhi jië'e muoho nosi nunoho bogo gavarueje u'emu garöhëro. 9 A'i noro ae gemu Iesu iae gavö. Iesu hu döre jiadoho God-ro hesi nimoro huë baejavuoromo hu uavamu ruvebiromo anera jabesi bëhire hijadeje ae aho'obëhe noni guomoröhego. Hiromo vavaene baeromo guomamu ëhuni God-ro hu döro bamoromo ajohu'o iho mabëhohu'o bojamamu baejadeje. Ëho iae no gavö. 10 God-ro aboji harihu'e aho'obëhe aji'ere söjavuo ujuoho va'i nimamu ëhuni baejavuoromo mare ramuo'iröhe a börömoho Iesu uavadeje huro vi'ehe baejöro ëhuro mue aho'obëhe ruaho'amoromo eni romoromemu jiego no baejavuoromo maro ramuo'iröhego. God-hu bövi bise'o avohoromo muebe'amajohuni ëhuni huhu Iesu ëhi uavadoho mae jiadeje.

11 Röhu nosi sisë u'ovahuaje aho Iesuoje. Sisë javuego u'ovahuaje aribövioho iae no javue. Röhu hesi Vavuohu'o nosi Vavuohu'o gemuohoje. Vavue gemuoho javuë'ëro Iesuro bogo javojimo'i ma-uvajeje: No ö mueno'e gemuoho javuajëjo. 12 Iesuhu uvaje no ö mueno'e gemuoho javuajë uvaje jöho God-are surire jajivoromo ëhi uvë'eje:

God jasi jöho naro majëhi'iramu nasi ö mueno'ohuro heruomo'ajëjo.
Naro jasi ariböviohu'o gemuore hiromo jasi örire rajahiromo jöho io'ejöjo.
13 Röhu Iesu ae aho'o no'o gemuore jiaje jöho gö'o jajivoromo uvë'eje: Naro uvonövo'ejöjo: Hesi God-ro gemuëro ajemi'ajëjo. Röhu jöe gö'o uvë'eje: Na aviae jevajëjo. Na God-hu bojemade aboji harihu'ohu'o gemu mae hijajëjo. Iesu'o no'o gemu mae javuaje jöho ëhi jajivë'eje.

14 God-are aboji harihu'e javuajë uvadeje. Röhu aboji harihu'oho no sino haho'e biroge köe javuë'ëro ëhuni Kerisoro araeromo hu'o sino haho'e biroge köe ëhi gemuoho baejadeje ëhuro guomoröhëro. Guomego vuovo'iröhe öri hesi vörö baejaje aho Satan hesi darugoho mu'uvaho barë'iröhego. 15 Satan-are darugoho mu'uvahego no vuovavuoröhe ë hesi juhuonoho barëjahuo'iröhego. Ëhesi bëhoho urimë'i vuovavuo'iröhoho uehorovoromo juhuonivobe rovareje. Juhuoni juhuoni raromaroho diehi'oromo vuonugojöëni ëhuni sisë'i raromareje. Ëhi jië'e juhuonoho barëjahuo'iröhego ëhuni guomadeje. 16 Aveho iae mae. Iesuro bogo aneraho ajëmi'i a'i Abraham-are ujoho no ajamuijajeje. 17 Ëhu'ëro jië'ëro huro araeromo hesi ijoraje nomë va'ëne jiadeje. Ëöre gemu jiadeje ëhuro hu God-are muoho vaeromo priest böröme mabëhe jioröhëro. Ëhi jië'e priest jioromo noni vavaenimoromo muoho avoho vaeromo a nosi sisëho u'ovahuoröhëro. Ëhuni no va'ëne jiadeje. 18 Sisëhuro Iesuare dëre bijiohamu vavaene baejë'ëro ëhu'ëro huro garöhe sisëhu nosi dëre bijioho gövuego huhu ajamui'iröhoho iae hu eni jie.