2 Corinthians 2
1 aAloxo ne la sou eni exavutala pekia'u lexe mamu sou eni a'oxonu navunavu vile la sou alai akilisinge. 2Xo lexe eni a'oxonu opongengi tu'umaxu, la sou 'ena'ei la ane uxolu sou u'oxoleli a'osa? Ngingisi. 3Eni ekaukavu aloxo ne mo sou loxo eni ane'e la mamu sou taleli utama noxi'a ta mitema ia sou i'oxoleli a'osa ne. Eni eloopala pekia'u noxinge mukalusi lexe 'osa noxilo ne uxolu ulai noxinge ukalusi kalumo. 4 bXo eni ekaukavumengi 'o no anu taleli utamasinge mo uxoto toxoxa'a xe ieli lexaxu piena, sou lexe a'oxongengi ngatama uasi, ia sou loxo u'oxo oponengi ngalavusou manina tanutanuxu noxilo singe no anu 'ilixo sou talulusou susu noxi'a ta mitema sou susu.5Ioxe lexe itema vile muxalixu opo tu'umaxu, la anu u'oxonu opoleli tu'umaxu uasi. Ia anu mu'oxongengi latala mukalusi ne opongengi tu'umaxu, la laixe lexe ta'oxonu uxali masua u'oki mamu. 6Navunavu ane ta piena noxinge mitelonu noxou ne anu mumomomo noxou. 7Ia aloxo ne uasi, umomomo sou ngingi ngalulusou susu noxou mo ngamamaatolanu, mo sou anu umomomo sou opo tu'umaxu toxoxu ulu'elaixu a vile mamu. 8Eni apela'inge aloxo ne mo sou ngingi nga'oxo pekia'unu tanutanuxu noxinge sou ne la, mo sou anu ulavusou lexe ngingi tangengixu. 9Tava'u a loxovaa la sou eni ekaukavumengi ne sou amaisinge lexe ngingi ngamomomo sou ngatulu peki'ainge no anu tovotovo mo ngalomu sou ngamulinu mimii ukalusi ne. 10Lexe ngingi ngalulusou susu noxou itema vile la eni kalumo alulusou susu noxou. Mo mii ma'ia ane eni elulusou ne mo lexe mii vile sou alulusou la eni alulusou no iou Kalisito ne singe. 11 cMo sou Satani ne umomomo sou utaloxolinenge mamu xo loxo nenge talavusou xavuxavutala talume noxou ne.
Ta Mitema Ane sou Ixaxaisou Vaikala Ane Musakii Alavua
12 dIoxe no mine eni elutu elai ne Toloasi sou alaanu vaikala sou a'alo laixe sou Kalisito la exalisou lexe Tila mukisiinu aitengasilo lai ne. 13 eIa xavutalaxeni ne uai se'isisi uao, xo tava'u lexe eni axalisou vivilo Tito lai ne uasi. La sou eni eione'i io elai avile ne Makedonia. 14Ia laixe musuku noxou Lataua e uulaxunexi utotomu no anu uauli noxou Kalisito mo taxavutalanu vaikala sou mii ane loxo tumaulixu sou lavulavu laixe noxou ne tasukunu ulai no xalexalee tani ukalusi no mine nenge talai. 15Xo nexi ne loxo noxou Lataua la nexi aloxo lomolomo tuma'u lailaixe ulai noxou Lataua sou Kalisito nonixine'i ta mitema ane'i ane mimulaxu tane'i noxou Iesu mino'u pamauli xe ane'i ane mimulaxu tane'i noxou Iesu uasi ane sou isoisoli. 16 fAne'i ane imulaxu tane'i noxou Iesu uasi la ane'i ne tuma'a masua sou soli, xe ane'i ane imulaxu tane'i noxou Iesu la ane'i tuma'a uliulixu sou mauli. Ioxe, mo 'ena'ei ane mumomomo sou xaixai ane loxo ne? 17Xo nexi ne loxo tapiena e i'oxonu sou ixixaolixu vaikalau Lataua sou loxo ino'u mii no anu uasi. Anu aloxo ne uasi. Noxou Kalisito la nexi tavivikala no iou Lataua ne laixe maninasi, loxo ta mitema ane Lataua mupalusi'a mine'e.
Copyright information for
ATA