1Cor 6 | BDD | STEP | Caigeda wete ginaula 'ebedeba mwadina 'oimiya 'imiyamiya, beno 'imi yatala 'oidiya toloinaedi taudi geya totapwalolo 'oidiya watautauya, ma hesiyage 'ilobwainegomiya tohekalesiyaowedi 'oidiya watauya.

1 Corinthians 6

Yatala weyahina

1 Caigeda wete ginaula 'ebedeba mwadina 'oimiya 'imiyamiya, beno 'imi yatala 'oidiya toloinaedi taudi geya totapwalolo 'oidiya watautauya, ma hesiyage 'ilobwainegomiya tohekalesiyaowedi 'oidiya watauya.

2 Wanuwatuhuyahi 'abehega tauda Yesu 'ana tohemisao muliyetega ginaula baibaiwadi tada loinaedi, 'oinega sawasawahimi ma ginaula 'i'iudi yatala 'oidiya waloinaedi. 3 Cabwa galewa aneloseyedi wete taloinaedi, 'oinega bewa tuwa sawasawahida ma paihowa bale'uwa taloinaedi.

4 Geya'abwa watautauya toloinao taudi geya sihekalesiya 'oidiya. 5 Beno ginaula 'ebedeba mwadina. Ma hesi 'eguma taiya 'oimiyega nuwanuwana ma 'iyana mahetena siyatala, 'ilobwainediya ma 'aigeda tosanapu boda hekalesiya 'oinega si'ebesa ma tauna yatalaina 'iloina. 6 Comi 'imi paihowa geya bwebwe'ana, weyahina taudi geya Keliso 'ana tohemisao matadiya wayatayatala.

7 Comi tohekalesiyao 'eguma wayatala, 'ana 'ita geya bwebwe'ana, ma hesi 'eguma mwau 'oimiya sihapwehapwesa, 'ilobwainegomiya ma 'ami to'e'abo'abowedi wahe'alama'i'itanedi ma geya'abwa waheheyataladi. 8 Ma hesiyage 'omi tohekalesiyao tasimiyao wa'abo'abowedi ta 'oidiyega wayagayagaha. 9 Ceguma mumugami gidemusa geya'abwa Yehoba 'ina 'ebeloina 'oina waluhuluhu, weyahina topuiyedi mabwaiyadi Yehoba 'i'etobodediya, gidemusa tolonabwasuwaedi ma tologwaliyedi, toganawalaedi wahiwahinedimo matasidiyao sipaipaihowa, loheloheyadimo wete mahetediyao sipaipaihowa, 10 ma toyagahao ma tomata tobwatobwaedi, ma tonuma bwasi waiwai, ma tolomugiyao ma to'e'abo'abowao.

11 Weyahina tupwami mwalona mumugami gidemusa, ta hesi tuwa Yehoba 'ideuli pwaigomiya, ta wa'ehauwa, weyahina 'ida Bada Yesu Keliso saninega ma Yaluyaluwa Tabuna 'ina paihowa 'oinega 'i'abihedumwalu pwaigomiya.

Ganawala weyahina

12 Gwae 'aigeda yahesagoheya tomota tupwadi sigwaeya 'abehega, “Mumuga mabwaiyana sawasawahina yapaihowadi.” Moisa tuwa, sawasawahida ginaula mabwaiyana tapaihowadi, ma beno tuwa 'abehega mumugaedi geya sida lemegita, ta hesi ma'idi waiwai ma sawasawahina sipaigita.

13 Wanuwatuhuyahi 'e'ahai weyahina. Moisa, 'e'ahai gamwada weyahina, ma wete gamwada 'e'ahai weyahina, ma hesi muliyetega 'e'ahai ma gamwada Yehoba 'ilohegumwalidi. Ma wahida Yehoba 'i'ebwaegita geya ganawala weyahina, ma tauna hesiyage weyahina, ma tauna tauda weyahida, 14 ta wete tauna 'ina waiwaiyega 'amasega 'i'abihe toholo hilegita, gidemusa 'ida Bada Yesu 'amasega 'i'abihe toholo hileya.

15 Wahida beno Keliso yahuna, 'oinega geya'abwa taiya 'owa toganawala maheteu wamumuga galagala. 16 Weyahina 'eguma taiya loheya toganawala mahetena sipui, beno silo'aigeda pwaiya, gidemusa Buki He'asisi 'igwaeya,

“Siteluwa silo'aigeda, gidemusa tuwa wahidi 'aigeda.”
17 Ta hesi 'eguma 'ida Bada maheteu walo'aigeda, yaluyaluwami wete silo'aigeda.

18 Sahena waganawala, weyahina ganawala geya gidemusa hali mumuga galadi. Moisa, hali mumuga galadi geya wahida si'abihe galadi, ma ganawala hesi wahida 'i'abihe galadi.

19 Coinega wanuwatuhuyahi 'abehega wahida Yaluyaluwa Tabuna 'ina hada, weyahina Yaluyaluwa Tabuina Yehoba 'oinega 'itauyama ma 'aloda 'imiyamiya, ma geya'abwa taudamo taloiloinegita, ma hesi Yehoba 'ida loinegita. 20 Weyahina 'ihemaisa pwaigita, 'oinega 'ilobwainegita ma wahida 'oidiyega sanina ta'abihe madou.