2Cor 2 | BDD | STEP | Moisa, tutaina mwalo yanuwatuhuya 'abehega sahena yabo'ebo'enegomi ma yaheheliyegomi ta debamwadina ya'ebwa'ebwaegomi 'iyamiuina 'ina mumuga galana weyahina. Beno namo 'imi leta yaleleyawa.

2 Corinthians 2

1 Moisa, tutaina mwalo yanuwatuhuya 'abehega sahena yabo'ebo'enegomi ma yaheheliyegomi ta debamwadina ya'ebwa'ebwaegomi 'iyamiuina 'ina mumuga galana weyahina. Beno namo 'imi leta yaleleyawa. 2 Coinega yanuwatuhuya 'abehega 'eguma 'igu gwaeyega ya'abihenuwa galegomiya, 'oimiyega taiya 'i'abihe yaliyayegau? 3 Ma 'imi letaina yaleleyawa ma'igu 'atemuya ma ma'igu nuwagala ma 'igu dou, ma 'oinega tutaina 'eguma yabo'enegomi wa'abihe yaliyayegau, ma sahena yanuwanuwagala, ma hesi mabwaiyami yahemisaegomiya ma yanuwatuhu yahiya 'abehega taugu 'igu yaliyayega 'omi wete wayaliyaya. Coinega 'imi letaina yaleleyawa, geya 'abehega ya'abihe nuwa galegomi ma hesi 'igu helau madou hedade 'oimiya wasanasanapu.

Caigeda loheya 'ina pui sinuwasam

5 Ma 'iyamiu galanaina 'i'abihenuwa galegauwa tupwana tuwa, ma hesi 'omi nuwagala madouna 'i'ebwaegomiya, ma geya nuwagu ma yaheliye, 6 weyahina galana 'ana maisa 'ilobeya mabwaiyami 'oimiyega, tuwa sowasowahina. 7 Sahena mwau madou hedade talagulagu 'oina, 'oinega 'oimiya ya'ahwanoi ma 'ina puiina wanuwasam ma wa'abihe yaliyaya hila ma wete ba'idamiu wahe'iya'iyagu hila.

9 Bewa weyahina 'imi leta yaleleyawa ma 'abehega yatohogemi, nuwana loina mabwaiyana wamuliyedi, bo geya. 10 Ceguma taiya 'ina pui wanuwasam taugu wete yanuwasam, ma to'aha taugu yanuwasamuya beno 'omi 'imi bwebwe'ana weyahina, Keliso matana, 11 'amuge ma Seitani 'ihewaiwai 'oida, weyahina 'ina nuwatuhu galana tasanapu pwaiya.

Loina hauhauna 'ana tohepwailao

12 Mwalo yatauya Tilowasi, Keliso tetelina sabi lohatotoina, ma Yehoba 'eda bwebwe'ana 'iso'eya, 'igu lohatotoina weyahina, 13 ma hesi yanuwatuhuya madouna weyahina tasigu Taito geya yaloba. Coinega meTilowasi ya'ebesinediya ma yatauya Masidoniya. 14 Coinega Yehoba 'oina yaloyauwedo, weyahina Keliso 'ina waiwaiyega tuta baibaiwana 'i'abi'abi hewaiwaiyemai ma 'ima paihowega Keliso 'ana sanapu tupwa mabwaiyana 'oidiya 'idabalala gide hoya mahaina 'ausala hedade 'idabalala ma tomota sinisoniso, 15 beno Keliso 'ina paihowa Yehoba 'oina, ta weyahina 'alolohatoto gide hoya mahaina 'ausalana 'alelewane taudi Yehoba 'i'abi'abihetedi 'oidiya, ta wete taudi nata sihesilae hataya 'oidiya. 16 Taudi tohesilae 'oidiya mahainaina 'ana lotohona tuwa gide to'amasa mwahuluna, ma hesi taudi Yehoba 'i'abihetediya mahainaina 'ana lotohona tuwa gide yawasi 'ausalana mahaina gide. Hisa tomota sowasowadi paihowa bewa? Geya baibaiwana. 17 Ma tauma geya gide tolohatoto 'abo'abowao, taudi 'idi wasawasa tuwa weyahina silolohatoto, ma hesi tauma ma'ama hemisa, gide Yehoba 'iloinemaiya, 'oinega tauna matana Keliso tetelina 'agwaegwaene moisa.