Rev 9 | BDD | STEP | Ma anelose henimana 'ina yoguli 'imu'eya, ma ya'iteya 'ipwala 'aigeda galewega 'ibe'uma gogo gabulena, ma 'ipwalaina gaula madouna 'ana 'ebeso'e kihi* 'i'eweya,

Revelation of John 9

1 Ma anelose henimana 'ina yoguli 'imu'eya, ma ya'iteya 'ipwala 'aigeda galewega 'ibe'uma gogo gabulena, ma 'ipwalaina gaula madouna 'ana 'ebeso'e kihi* 'i'eweya, 2 ma gaulaina 'iso'eya, ma 'alonega 'asu 'ilatulatuma, tuwa gide duba madouna, ma sinala 'iguguyouwa ma wete gogo gabulena mabwaiyana 'iguguyouwa gaulaina 'asuna 'oinega. 3 Ma 'asuina 'alonega mwai'e sisulusuluma gogo gabulena, ma 'idi waiwai silobeya gide ganihana 'idi waiwai. 4 Ma wete Yehoba 'i'etoboda ta geya'abwa 'awata si'abi'abi hegaladi, nuwana 'aiwe, nuwana tanoha, ma hesi tomotaedi taudi geya Yehoba 'ana 'ila'ilala gide basilili debadiya, taudi si'abi hegaladi.

5 Ta mwai'eyedi geya 'adi tagwala tomota silohe'amasidi, ma hesi tuwa si'abi'abi hemuyamuyadimo wai'ena nima 'oidiya. Ta muyaedi madoudi, gide tuwa ganihana 'ina 'enali. 6 Ta wai'enaedi 'oidiya tomuyamuyaedi 'amasa silohenuhenule, ma hesi geya'abwa si'ama'amasa, weyahina 'amasa si'ebesa 'asaeya. 7 Ta mwai'eyedi 'adi 'ita gide hosi si'atububu pwaidiya 'aleha weyahina, ma debadiya 'adi pasa wasawasa silagudiya, ma 'adi 'ita gide tomotai, 8 Ta wete debadi gide wahiwahine, ma saladi gide laiyoni* saladi. 9 Ta lumalumadi si'ahubodediya 'ana 'ita gide pwawati 'oidiyega. Ma papedi 'idi dagugu gide waga lisilisi* hosi sipilipilihedi 'aleha 'oina.

10 Ta wete masubwedi, gide ganihana subwedi, weyahina subwediyega sawasawahina ma tomota sibadidi, ma wai'ena nima 'oidiya simuyamuya.

11 Ta wete ma'idi toloina, tauna aneloseina gaulaina 'ana to'itayahina, sanina Ibeliu* 'enadiyega sigwae, “Abadoni,” ma 'ena Gilisi sigwae “Apaloni,” ma 'adi nuwasabwalena beno “Tolohe'amasa.” 12 Mwau 'aigeda 'igumwala pwaiya ta mwau 'eluwa 'abwa sinaonaoma.

13 Ma anelose hesikisina 'ina yoguli 'imu'eya, ta 'aigeda 'enana yahesagoheya 'inaoma 'ebe pwaoli donanao 'ehata 'oidiyega, 'ebe pwaoli goulaina Yehoba matana 'itotoholo. 14 Ma 'enanaina 'igwaeya anelose hesikisina ma'ina yoguli 'oina 'igwae, “Aneloseyedi site 'ehata paipaidi we'aha madouna sanina Yupeletisi 'oina 'ulihasidi, ma sitauya.” 15 Ma aneloseyedi 'ehata 'ilihasidiya ta sitauya, weyahina tutaina 'ana sabwelo, ta 'ana wai'ena ta bolimenaina weyahina si'atububuya, ma 'abehega tomota baibaiwa hedada silohe'amasidi. Beno 'eguma tomota mabwaiyana gogo gabulena tawatahidi boda 'etoi, ma 'aigeda boda silohe'amasidi, ta 'eluwa boda situpwa.

16 Ma tolo'alehaedi 'idi boda 'adi hasihasila yahesagoha pwaiya, 'abehega 'eluwa handeledi miliyoni mabwaiyadi hosi 'oidiyega sipilipili. 17 Ta bewa gide nihiguina 'oina hosiyedi ya'itediya, ma 'adi togeluwedi ma'adi 'ahusu'wasu'wana lumalumadiya silagudiya, tupwadi bwehabwehalidi ta tupwadi 'ala'alawadi ta tupwadi yogeyogedi. Ta hosiyedi mwagudi gide laiyoni* mwaguna, ma 'aiwe ninima ta 'asu ta dimwa yahiyahidi 'ahwadiyega silatulatu. 18 Boda 'etoiyedi gogo gabulena 'oidiyega, boda 'aigeda silohe'amasidi, bewa ginaula 'etoiyedi 'oidiyega, beno 'aiwe ninima ta 'asu ta dimwa yahiyahidi, ma hesi boda 'eluwa simiyamiya. 19 Weyahina hosiyedi 'idi waiwai 'ahwadiya ma subwediya simiyamiya, ta subwediyedi gide mwata ma'ahwadi, ma 'oidiyega tomota si'abi hemuyamuyadi.

20 Ta tomotaedi mabwaiyadi, taudi geya sida 'amasa ginaulaedi galadi 'oidiyega, geya sinuwabui ma 'abehega 'idi 'ebe hemisa 'abo'abowedi siguipailedi. Ma hesi si'abiyahi pa'alidi ta si'e'etuluha 'oidiya. Ginaulaedi gide Tomudulele ma welabanao, ma wete ginaulaedi siboimo nimadiyega sipaihowediya, gide dimwa leleleleina beno goula ta siliba ta kopa ta dimwa ta 'aiwe. Dimwa leleleidiyedi beno geya sawasawahidi ma si'ebubuna, bo nuwana sihesagoha, nuwana siyawala dadana.

21 Ma wete tomotaedi geya sida nuwanuwabuiya lohe'amasa ma 'oba ma logwali ma yagaha 'oidiyega. Tuwa debadi 'ipa'ala.