1Cor 10 | BOJ | STEP | O was qu, niŋgi ijo anjam endeqa geregere poiŋgem. Nami Moses aqa bati qa gago moma kalil naŋgi wadau sawaq di sonabqa Qotei a laŋbi na naŋgi gam osornjroqnej. Bati di naŋgi Yuwal Lent di gentosib mandam boleq aisib walwelosib gileb.

1 Corinthians 10

Gulube bei bei gagoq bamqa iga dena uloŋo uge

1 O was qu, niŋgi ijo anjam endeqa geregere poiŋgem. Nami Moses aqa bati qa gago moma kalil naŋgi wadau sawaq di sonabqa Qotei a laŋbi na naŋgi gam osornjroqnej. Bati di naŋgi Yuwal Lent di gentosib mandam boleq aisib walwelosib gileb. 2 Naŋgi kalil Moses dauryeb deqa naŋgi laŋbi ti Yuwal Lentq dena ti yanso eb. 3 Bati deqa Qotei aqa Mondor a laŋ goge dena iŋgi osi boqnsiq naŋgi kalil anainjreqnaqa naŋgi di uyoqneb. 4 Ya dego Qotei aqa Mondor na naŋgi kalil anainjreqnaq uyoqneb. Mondor na naŋgi meniŋ bei osornjrnaqa meniŋ dena ya branteqnaqa naŋgi uyoqneb. Meniŋ dena wadau sawaq dia naŋgi daurnjrsiq giloqnej. Meniŋ di agi Kristus. 5 Ariya gago moma gargekoba naŋgi kumbra uge uge yoqneb deqa Qotei a naŋgi qa arearetosai. Deqa a wadau sawaq dia naŋgi ñumnaq moreŋeb.

6 Naŋgi kumbra uge uge dauryqa are prugnjroqnej deqa Qotei na naŋgi ñumnaq moreŋeb. Naŋgo kumbra uge di iga dego dauryqa are pruggaim deqa Moses a anjam di neŋgreŋyej. 7 Deqa niŋgi qotei gisaŋ atsib naŋgi qa louoqnaib. Agi gago moma qudei naŋgi qotei gisaŋ atsib naŋgi qa louoqneb. Agi Qotei aqa anjam bei nami endegsib neŋgreŋyeb unu, “Naŋgi korooqnsib iŋgi ti ya ti uyoqnsib olo tigeloqnsib uŋa ti alaŋoqneb.” 8 Iga sambala kumbra dego yqasai. Agi gago moma qudei naŋgi sambala kumbra yoqneb deqa bati qujai qa Qotei na 23,000 tamo uŋgasari naŋgi ñumnaq moreŋeb. 9 Iga Kristus aqa kumbra tenemtosim laŋa pegiyqasai. Agi gago moma qudei naŋgi Tamo Koba Qotei aqa kumbra tenemtoqnsib laŋa pegiyoqneb deqa Qotei na amal uge qariŋnjrnaqa bosib naŋgi uñinjrnab moreŋeb. 10 Iga Qotei laŋa ŋiriŋtqasai dego. Agi gago moma qudei naŋgi Qotei laŋa ŋiriŋtoqneb. Deqa Qotei a na padalto qaji laŋ aŋgro bei qariŋyonaq aisiq naŋgi padaltnjrej.

11 Gago moma naŋgi kumbra uge kalil di yoqneb deqa Qotei na naŋgi ñumnaq moreŋeb. Anjam di agi Moses a na neŋgreŋyej unu. Di kiyaqa? Iga tamo uŋgasari diŋo bati endeqa unum qaji anjam di sisiyosim poigim gago moma naŋgo kumbra uge di dauryaim deqa. 12 Ariya tamo bei a endegsi are qalqas, “E siŋgila na tigelejunum.” Osim a geregere ŋam atem. A uloŋosim uneq aio uge. 13 Gulube kalil niŋgi qa branteqnu qaji di mandam tamo kalil naŋgoq di dego branteqnu. Ariya Qotei a tamo bole deqa a niŋgi uratŋgwasai. A na marimqa gulube di aqa siŋgila na nuŋgo siŋgila buŋyqasai. Qotei na gam waqtetŋgoqnimqa niŋgi gulube di britoqnsib siŋgila na tigeloqnqab.

Iga na Qotei ti mondor uge uge naŋgi ti biŋinjrqa keresai

14 Deqa ijo was bole, niŋgi qotei gisaŋ naŋgi atsib naŋgi qa louoqnaib. Niŋgi naŋgi torei uratnjrsib isaq giliye. 15 Niŋgi powo ti unub deqa e na anjam di niŋgi merŋgonum. Deqa niŋgi ijo anjam di qusib geregere peleiyiye. 16 Wain gambaŋ iga Qotei pailyosim uyeqnum qaji di iga Kristus aqa leŋ qa are qalsim deqa a ti korooqnsim uyeqnum. Bem iga giŋgeŋyosim uyeqnum qaji di iga Kristus aqa jejamu qa are qalsim deqa a ti korooqnsim uyeqnum. 17 Bem qujai unu agi Kristus aqa jejamu. Deqa iga kalil koba na korooqnsim bem qujai di uyeqnum. Deqa iga kalil Kristus aqa jejamu qujai. 18 Niŋgi Israel naŋgo kumbra qa are qaliye. Israel naŋgi atra bijalq dia damu koitoqnsib oto bei oqnsib Qotei atraiyeqnub. Osib olo oto bei oqnsib uyeqnub. Naŋgo kumbra dena naŋgi Qotei koba na korooqnsib uyeqnub.

19 Sulum atrainjro qaji iŋgi iŋgi di atraiyqa iŋgi bole e degaib. E degsi marosai. Sulum naŋgi di qotei bole e degaib. E degsi marosai. 20 E endegsi maronum. Sulum atrainjro qaji iŋgi iŋgi di sawa bei bei qaji tamo naŋgi na oqnsib mondor uge naŋgi atrainjreqnub. Naŋgi Qotei bole atraiyosaieqnub. Deqa was qu, niŋgi iŋgi iŋgi di uratiye. Uratqasai di niŋgi mondor uge uge naŋgi ti beterqab. 21 Niŋgi Tamo Koba Yesus aqa wain gambaŋ ti mondor uge uge naŋgo wain gambaŋ ti di turtsib uyqa keresai. Niŋgi Tamo Koba Yesus aqa atra bijal ti mondor uge uge naŋgo atra bijal ti di dego turtsib dena uyqa keresai. 22 Iga kumbra degyqom di iga Tamo Koba Yesus aqa are ugetetim a iga qa minjiŋ oqwas. Gago siŋgila na aqa siŋgila buŋyqa kere e? Keresai.

Iga bati gaigai Qotei aqa ñam soqtoqnqom

23 Iga kumbra kalil yqa kere. Ariya iga kumbra kalil di yqom dena iga aqaryaigwa keresai. Bole, iga kumbra kalil yqa kere. Ariya kumbra kalil dena gago areqalo siŋgilatetgwa keresai. 24 Iga gago segi jejamu qa are qaloqnqasai. Iga gago was naŋgi qa dego are qaloqnsim naŋgi aqaryainjroqnqom. 25 Niŋgi maket dena damu awaiyoqnsib uyoqniye. Damu di nami sulum naŋgi atrainjroqneb kio sai kio niŋgi deqa are koba qalsib nenemoqnaib. Niŋgi osib uyoqniye. 26 Agi Qotei aqa anjam bei nami endegsib neŋgreŋyeb unu,

“Mandam endi Tamo Koba Qotei aqa segi mandam.
Iŋgi iŋgi kalil mandamq endi unub qaji di dego Qotei aqa.”
27 Deqa tamo bei Yesus qaliesai qaji a na iŋgi goisim niŋgi metŋgimqa niŋgi a ombla gilqa are soqnim giliye. Gilsib iŋgi kalil a na anaiŋgwas qaji di niŋgi osib uyiye. Niŋgi deqa are koba qalsib nenemoqnaib. 28 Ariya Kristen was bei na niŋgi merŋgwas, “Iŋgi di sulum atrainjro qaji iŋgi.” Degsi merŋgimqa niŋgi was deqa are qalsib iŋgi di osib uyaib. Niŋgi uyqab di niŋgi unetqab. 29 Niŋgi segi unetqab e deqa merŋgosai. Tamo anjam merŋgwo qaji a are qalqas, niŋgi unetonub. E deqa niŋgi merŋgonum.

Ariya Kristen was deqaji bei sosaiamqa e iŋgi uyqa are soqnim uyqai. Di une sai. Kiyaqa e tamo bei aqa areqalo dauryosiy iŋgi getentqai? 30 E Qotei pailyosiy iŋgi di uyqai di tamo bei a kiyaqa e olo uge qa merbqas?

31 Deqa niŋgi iŋgi ti ya ti uyqa oqnsib niŋgi Qotei aqa ñam soqtetoqnsib uyoqniye. Niŋgi kumbra bei yqa oqnsib niŋgi Qotei aqa ñam soqtetoqnsib yoqniye. 32 Niŋgi na Juda tamo ti Grik tamo ti Qotei aqa segi tamo uŋgasari naŋgi ti kumbra uge bei enjraib. Yim naŋgi dena ululoŋosib uneq aio uge. 33 E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.