1Cor 11 | BOJ | STEP | Niŋgi ijo kumbra dauryosib walweloqniye. Agi e segi Kristus aqa kumbra dauryoqnsim walweleqnum dego kere.

1 Corinthians 11

1 Niŋgi ijo kumbra dauryosib walweloqniye. Agi e segi Kristus aqa kumbra dauryoqnsim walweleqnum dego kere.

Pol a uŋa naŋgo gate kabutqajqa kumbra qa anjam marej

2 E qalieonum, niŋgi gaigai e qa are qaloqnsib deqa anjam kalil e nami niŋgi merŋgoqnem qaji di niŋgi geregere ojsib dauryeqnub. Deqa e niŋgi qa tulaŋ areboleboleibqo. 3 Ariya niŋgi ijo anjam bei dego qusib poiŋgem. Tamo kalil naŋgo gate agi Kristus. Uŋa naŋgo gate agi naŋgo tamo naŋgi. Ariya Kristus aqa gate di Qotei. 4 Deqa tamo bei a gate tatal atsim pailyqas kio anjam palontqas kio di a na aqa segi gate jemai yqo. Aqa gate agi Kristus. 5 Ariya uŋa bei a aqa gate kabutosaiosim pailyqas kio anjam palontqas kio di a dego aqa segi gate jemai yqo. Uŋa a degyqas di a uŋa qudei naŋgo gate baŋga gentsib torei milalteqnub qaji naŋgi bulqas. 6 Uŋa a aqa gate kabutqa uratosim di a aqa gate baŋga genteme. Ariya a aqa gate baŋga gentosim kio torei milaltosim kio dena a jemaiyqas di a aqa gate kabuteme. 7 Ariya tamo naŋgi naŋgo gate kabutaib. Di kiyaqa? Tamo naŋgi Qotei sigitoqnsib aqa ñam ti aqa siŋgila ti boleq ateqnub deqa. Ariya uŋa naŋgi tamo naŋgo ñam ti naŋgo siŋgila ti boleq ateqnub.

8 Nami Qotei a uŋa aqa tanu osiqa dena tamo gereiyosai. A tamo aqa tanu osiqa dena uŋa gereiyej. 9 Qotei a uŋa qa osiqa tamo gereiyosai. A tamo qa osiqa deqa uŋa gereiyej. 10 Deqa uŋa naŋgi naŋgo segi gate kabutqab. Yim tamo uŋgasari naŋgi unsib marqab, “Bole, naŋgi naŋgo tamo naŋgo sorgomq di unub deqa naŋgi naŋgo gate kabuteqnub.” O was qu, laŋ aŋgro naŋgi dego kumbra di unsib degsib marqab.

11 Iga kalil Tamo Koba Yesus ombla unum deqa uŋa naŋgi naŋgo segi qa sai. Tamo naŋgi dego naŋgo segi qa sai. 12 Qotei a tamo aqa tanu osiqa dena uŋa gereiyej deqa uŋa naŋgi tamo naŋgo. Ariya tamo naŋgi uŋa naŋgoq dena ŋambabeqnub deqa tamo naŋgi uŋa naŋgo. Ariya Qotei a segi qujai iŋgi iŋgi kalil qa utru.

13 Uŋa a aqa segi gate kabutosaiosim Qotei pailyqas di kumbra bole e? Niŋgi segi mariye. 14 Mandam tamo naŋgo kumbra na iga endegsi poigeqnu, tamo naŋgi gate baŋga mariŋ uratqab di bolesai. 15 Ariya uŋa naŋgo gate baŋga mariŋ uratqab di bolequja. Di naŋgo wala bole. Naŋgo gate baŋga di Qotei na enjreqnu deqa gate baŋga dena naŋgo gate kabuteqnu. 16 O was qu, tamo bei a ijo anjam deqa ŋiriŋosim gotraŋyqas di a endegsi poiyem. Iga kumbra bei dauryosaieqnum. Qotei aqa tamo uŋgasari qure qure kalilq di unub qaji naŋgi dego kumbra bei dauryosaieqnub.

Korin naŋgi Qotei louqa korooqnsibqa kumbra bole yosaieqnub

17 Ariya e nuŋgo kumbra qudei qa areboleboleibosaieqnu. E deqa niŋgi merŋgit quiye. Niŋgi Qotei louqa korooqnsibqa niŋgi kumbra bole babtosaieqnub. Niŋgi kumbra uge babteqnub. 18 E mati deqa niŋgi merŋgwai. E anjam endegsi quem. Niŋgi Qotei louqa korooqnsibqa niŋgi pupooqnsibqa anjam na qoteqnub. E anjam di qusim marem, anjam di bole. 19 Di kiyaqa? E endegsi are qalonum. Niŋgi pupoabqa dena niŋgi poiŋgwas, nuŋgo ambleq di tamo yai naŋgi Qotei aqa kumbra bole tiŋtiŋ dauryeqnub. 20 Deqa e qalieonum, niŋgi Qotei louqa koroeqnub di niŋgi Tamo Koba Yesus aqa iŋgi uyqajqa deqa sai. 21 Niŋgi qunjaŋ bolet deqa niŋgi namo boqnsib Qotei tal miligiq dia iŋgi uyekriteqnab was qudei naŋgi bunu boqnsib mamnjreqnu. Osib tamo qudei naŋgi wain koba dego uyoqnsib nanarieqnub. 22 Nuŋgo kumbra dena niŋgi Qotei tal ugetoqnsib tamo iŋgi saiqoji unub qaji naŋgi jemai enjreqnub. Nuŋgo segi segi tal unub. Deqa niŋgi mati nuŋgo segi talq di iŋgi ti ya ti uysib bunuqna bosib Qotei louqa korooiye. Ariya niŋgi degyosaieqnub deqa e anjam kiersiy merŋgwai? E nuŋgo kumbra deqa areboleboleibqo degsi merŋgwai e? Sai. E degsi merŋgwasai.

Pol a beŋgem qa anjam marej

23 Ariya beŋgem qa anjam e nami niŋgi merŋgem qaji di e na olo merŋgwai. Anjam di Tamo Koba Yesus a na merbonaq quem. Anjam agiende. Nami Judas na Yesus ojsiq jeu tamo naŋgo baŋq di atej. Qolo qujai di Tamo Koba Yesus a bem osiqa Qotei pailyosiqa bem di giŋgeŋyosiqa aqa aŋgro naŋgi anainjrej. Anainjrqa osiqa endegsi minjrej, “Endi ijo jejamu. E na niŋgi aqaryaiŋgwajqa deqa ijo jejamu endi niŋgi eŋgwai. Deqa niŋgi osib uyiye. Bunuqna niŋgi gaigai uyoqnsib e qa are qaloqniye.” 25 Degsi minjrnaqa naŋgi bem uynab koboonaqa a na olo wain gambaŋ osiq Qotei pailyosiqa minjrej, “Wain gambaŋ endi ijo leŋ. Leŋ di aisim Qotei aqa anjam bunuj siŋgilatqas. Deqa niŋgi osib uyiye. Bunuqna niŋgi wain gambaŋ endi dego gaigai uyoqnsib e qa are qaloqniye.” 26 O was qu, niŋgi Yesus aqa anjam deqa are qaloqnsib bati gaigai niŋgi bem ti wain gambaŋ ti di uyoqnsib niŋgi anjam endegsib marsib laqniye, “Tamo Koba Yesus a iga qa jaqatiŋ osiq moiej.” Marsib laqnib mondoŋ a olo bqas.

Tamo bei a bem ti wain gambaŋ ti uyqa osimqa a mati aqa segi so geregere peleiyeme

27 Deqa tamo bei a kumbra uge na Tamo Koba Yesus aqa bem ti wain gambaŋ ti di uyqas di a na Yesus aqa jejamu ti leŋ ti dego ugetqas. Dena a unetqas. 28 Deqa tamo bei a bem ti wain gambaŋ ti di uyqa osimqa a mati aqa segi so geregere peleiyosim di a uyqas. 29 Di kiyaqa? Tamo a mati Yesus aqa jejamu qa geregere are qalosaiosim bem ti wain gambaŋ ti di uyqas di a unetqas. Deqa Qotei na a kamba gulube yqas. 30 Utru deqa nuŋgo ambleq di tamo uŋgasari gargekoba naŋgi siŋgila saiqoji sosib mainjreqnu. Osib naŋgi qudei moreŋeqnub. 31 Ariya iga gago segi so geregere peleiyosim bem ti wain gambaŋ ti di uyqom di iga une ti sqasai. Deqa Qotei na iga gulube egwasai. 32 Ariya Tamo Koba Qotei a gago kumbra uge qudei unoqnsiq deqa iga gulube egeqnu di a gago kumbra tingitetgwajqa deqa. Yim mondoŋ iga tamo kalil mandamq endi unub qaji naŋgi ti une osim padalo uge.

33 Deqa ijo was qu, niŋgi bem ti wain gambaŋ ti uyqa koroosibqa niŋgi urur uyaib. Niŋgi nuŋgo was naŋgi qa tariŋoiye. 34 Niŋgi qudei mamŋgimqa niŋgi mati nuŋgo segi talq di iŋgi uysib bunuqna bosib korooiye. Niŋgi namo bosib koroosib Qotei tal miligiq dia iŋgi koba uyekritqab di niŋgi unetqab. Deqa Qotei na kamba niŋgi gulube eŋgwas.

Ariya ijo anjam qudei e mati neŋgreŋyqasai. Bunuqna e niŋgi qa bosiy anjam di nuŋgo ulatamuq di gereiyqai.