Heb 5 | BOJ | STEP | Atra tamo kokba naŋgo utru agiende. Qotei a Israel naŋgoq dena mandam tamo naŋgi giltnjroqnsiqa naŋgi atra tamo kokba ateqnu. Atra tamo kokba naŋgo wau agiende. Naŋgi na tamo uŋgasari naŋgo une qa maroqnsib atraiyqajqa iŋgi iŋgi oqnsib Qotei atraiyeqnub.

Hebrews 5

Atra tamo kokba naŋgo wau

1 Atra tamo kokba naŋgo utru agiende. Qotei a Israel naŋgoq dena mandam tamo naŋgi giltnjroqnsiqa naŋgi atra tamo kokba ateqnu. Atra tamo kokba naŋgo wau agiende. Naŋgi na tamo uŋgasari naŋgo une qa maroqnsib atraiyqajqa iŋgi iŋgi oqnsib Qotei atraiyeqnub. 2 Atra tamo kokba naŋgi iga bul mandam tamo. Naŋgi dego siŋgila saiqoji unub deqa naŋgi une yoqnqa kere. Deqa naŋgi na tamo uŋgasari Qotei aqa kumbra geregere qaliesai qaji naŋgi ti tamo uŋgasari Qotei aqa gam groteqnub qaji naŋgi ti naŋgo une qa jiŋga na gereinjreqnub. 3 Naŋgi segi dego une ti unub deqa naŋgi tamo uŋgasari naŋgo une qa ti naŋgo segi une qa ti turtoqnsib iŋgi iŋgi Qotei atraiyeqnub.

4 Atra tamo kokba naŋgi ñam ti unub deqa tamo laŋaj bei a aqa segi areqalo na atra tamo kobaquja sqa keresai. Qotei a segi na naŋgi metnjroqnsiqa atra tamo kokba ateleŋeqnu. Agi Qotei a nami Aron metosiq atra tamo kobaquja atej dego kere.

5 Kristus a dego aqa segi ñam soqtosiq atra tamo kobaquja sqa marosai. Qotei a segi na a giltosiqa atra tamo kobaquja atej. Agi Qotei na nami Kristus endegsi minjej,

“Ni ijo segi Aŋgro.
Bini e ino Abu unum.”
6 Osiqa olo anjam bei dego Kristus minjej,

“Melkisedek a nami atra tamo soqnej
dego kere ni bati gaigai atra tamo sqam.”
7 O was qu, Yesus a mandamq endi sosiqa a siŋga pulutoqnsiqa Qotei pailyoqnej. A qalie, Qotei na a oqa kere. Yim a moiqasai. Deqa a siŋgila na Qotei pailyoqnej. A leleŋ ti akam ti pailyoqnej. A aqa segi areqalo uratoqnsiqa Qotei aqa sorgomq di soqnej. Deqa Qotei a aqa pail quetoqnej. 8 Yesus a Qotei aqa segi Ŋiri. Ariya a jaqatiŋ koba oqnej dena a powo osiqa Qotei aqa anjam dauryqajqa qalieej. 9 Qalieosiq deqa a Qotei aqa anjam torei dauryekritej. Deqa Qotei na a giltosiq minjej, “Ni atra tamo kobaquja unum. Agi Melkisedek a nami atra tamo kobaquja soqnej dego kere.” Qotei na Yesus degsi minjej deqa Yesus na tamo kalil Qotei aqa anjam dauryeqnub qaji naŋgi oqas. Naŋgi oqajqa utru agi Yesus qujai. Deqa naŋgi ŋambile gaigai sqab.

Iga aŋgro mom bul sqasai

11 O was qu, e deqa anjam gargekoba niŋgi merŋgwajqa unu. Ariya nuŋgo areqalo geteŋo deqa niŋgi anjam di aqa utru poiŋgwa keresai. Deqa e niŋgi merŋgwajqa baŋgi koba. 12 Niŋgi nami are bulyeb bati olekoba gilqo. Deqa niŋgi Qotei aqa anjam plaltosib Kristen tamo uŋgasari naŋgi minjrqa kere. Ariya nuŋgo powo kobaosaiunu deqa niŋgi Qotei aqa anjam plaltsib marqa keresai. Tamo qudei naŋgi na olo niŋgi Qotei aqa anjam utruq na merŋgwab di niŋgi poiŋgwas. Niŋgi aŋgro mom muŋgum uyeqnub dego bul. Niŋgi iŋgi siŋgila uyqa kereosaiunu. 13 Iga qalie, aŋgro mom naŋgi muŋgum segi uyeqnub. Naŋgi kumbra tiŋtiŋ dauryqajqa geregere poinjrosaieqnu. 14 Ariya tamo naŋgi kokbaonub qaji naŋgi iŋgi siŋgila uyeqnub. Naŋgi bati gargekoba Qotei aqa anjam dauryoqneb deqa naŋgi kumbra bole ti kumbra uge ti geregere peginjreqnub.