Mar 10 | BOJ | STEP | Yesus a na aqa aŋgro naŋgi anjam degsi minjrej. Osiqa sawa di uratosiqa Judia sawaq gilsiq Jordan ya taqal beiq di soqnej. A di sonaqa tamo uŋgasari tulaŋ gargekoba naŋgi olo bosib aqa areq di koroonabqa aqa kumbra gaigai yoqnej qaji di olo dauryosiqa Qotei aqa anjam plaltosiq minjroqnej.

Mark 10

Tamo a uŋa uratqa kere e? Yesus a deqa anjam bei marej

1 Yesus a na aqa aŋgro naŋgi anjam degsi minjrej. Osiqa sawa di uratosiqa Judia sawaq gilsiq Jordan ya taqal beiq di soqnej. A di sonaqa tamo uŋgasari tulaŋ gargekoba naŋgi olo bosib aqa areq di koroonabqa aqa kumbra gaigai yoqnej qaji di olo dauryosiqa Qotei aqa anjam plaltosiq minjroqnej.

2 Onaqa Farisi naŋgi olo Yesus aqa areq bosibqa a anjam bei grotimqa qusib naŋgi a ojqajqa deqa laŋa gisaŋyosib endegsib nenemyeb, “Tamo bei na aqa uŋa uratqa kere e? Gago dal anjamq di degsi unu e?” 3 Onaqa Yesus na kamba minjrej, “Niŋgi segi qalie deqa niŋgi mariye. Moses a nami dal anjam kiersi marej?” 4 Onaqa naŋgi na minjeb, “Moses a nami endegsi marej, ‘Tamo bei na aqa uŋa uratqa osimqa pepa bei neŋgreŋyosim yosim di a uratqas.’” 5 Onaqa Yesus na minjrej, “Niŋgi Qotei aqa anjam quqwajqa tulaŋ asgimo ani deqa Moses a dal anjam degsi neŋgreŋyej. 6 Niŋgi quiye. ‘Tulaŋ nami Qotei a mandam ti iŋgi iŋgi kalil ti gereiyosiqa bati deqa a tamo wo uŋa wo dego gereinjrej. 7 Deqa tamo bei na aqa ai wo abu wo naŋgi uratnjrsimqa aqa ŋauqali wo beterosib jejamu qujaitosib sqab.’ Qotei a nami degsi marej. Deqa naŋgi olo jejamu aiyel sqasai. Naŋgi jejamu qujai sqab. 9 Qotei na naŋgi aiyel turtnjrqo deqa tamo bei na olo potnjraiq.”

10 Yesus a na Farisi naŋgi anjam degsi minjrsiqa a tal bei miligiq gilsiq di sonaqa aqa aŋgro naŋgi aqa areq bosib aqa anjam deqa nenemyeb. 11 Nenemyonabqa minjrej, “Tamo bei na aqa ŋauŋ uratosimqa olo uŋa bei oqas tamo dena aqa ŋauŋ kumbra uge yqas. 12 Uŋa a dego aqa gumbuluŋ uratosimqa olo tamo bei oqas uŋa dena aqa gumbuluŋ kumbra uge yqas.”

Yesus a marej, “Niŋgi na aŋgro du du naŋgi ijo areq bqajqa saidnjraib.”

13 Onaqa tamo uŋgasari qudei naŋgo aŋgro du du naŋgi Yesus na aqa baŋ naŋgo gateq di atetnjrqajqa marsibqa joqsib Yesus aqa areq beb. Beqnabqa Yesus aqa aŋgro naŋgi na saidnjrsib minjreb, “Nuŋgo aŋgro du du naŋgi joqsib endeq baib.” 14 Degsib saidnjreb deqa Yesus na aqa aŋgro naŋgi ŋiriŋtnjrsiqa minjrej, “Aŋgro du du naŋgi metnjribqa ijo areq bebe. Naŋgi saidnjraib. Di kiyaqa? Tamo uŋgasari naŋgi aŋgro du du dego bul sqab di Qotei a naŋgo Mandor Koba sosim naŋgi taqatnjrqas. 15 Niŋgi quiye. E bole merŋgwai. Tamo bei a aŋgro du du naŋgi dego bul sqasai di Qotei na a osim taqatqasai. Deqa a naŋgo Mandor Koba sqa keresai dego.” 16 Yesus a na aqa aŋgro naŋgi anjam degsi minjrsiqa aŋgro du du naŋgi di soqoŋnjrsiqa aqa baŋ naŋgo gateq di atetnjrsiqa naŋgi qa Qotei pailyej.

Tamo bei ñoro koba ti soqnej qaji a Yesus ombla anjam mareb

17 Osiqa dena tigelosiqa gam dauryosiq gileqnaqa tamo bei urur ti aqa areq bosiqa aqa siŋgaq di siŋga pulutosiqa nenemyej, “O Qalie Tamo Bole, e kumbra bole kie dauryosiy dena e ŋambile gaigai sqai?” 18 Onaqa Yesus na kamba minjej, “Ni kiyaqa e tamo bole qa merbonum? Qotei a segi qujai tamo bole. 19 Ariya ni Qotei aqa dal anjam qalie unum. ‘Ni tamo bei qalsim moiotaim. Ni tamo bei aqa uŋa jejamu ojetaim. Ni bajiŋaim. Ni tamo bei aqa jejamu laŋa gisaŋyaim. Ni was bei aqa iŋgi bei laŋa gisaŋ na yaiyaim. Ni ino ai wo abu wo naŋgo sorgomq di geregere sosimqa naŋgo anjam dauryoqne.’” 20 Onaqa tamo dena olo Yesus minjej, “O Tamo Koba, e aŋgro kiñala qa dal anjam di kalil dauryosim boqnem agi bini degsi unum.” 21 Onaqa Yesus a tamo di koqyosiqa qalaiyosiq minjej, “Ni dal anjam di kalil daurysim keretonum. Ariya kumbra qujai ni keretosai. Deqa e ni mermqai. Ni gilsim ino iŋgi iŋgi kalil qariŋyosim silali osim tamo iŋgi iŋgi saiqoji unub qaji naŋgi jeisi enjre. Degsim enjrsim bosim e daurbe. Yimqa bunuqna ni laŋ qureq dia awai bole itqam.” 22 Yesus a na tamo di degsi minjnaq qusiqa aqa iŋgi iŋgi kalil qa are tulaŋ gulubeiyej. A iŋgi iŋgi koba ti soqnej deqa ulatamu ugeiyonaqa ulaŋej.

23 Onaqa Yesus a na aqa aŋgro naŋgi koqnjrsiqa endegsi minjrej, “Tamo uŋgasari iŋgi iŋgi koba ti unub qaji naŋgi Qotei na taqatnjrsim naŋgo Mandor Koba sqa marsibqa laŋ qure oqwajqa baŋgi koba.” 24 Onaqa Yesus aqa aŋgro naŋgi aqa anjam di qusibqa naŋgi tulaŋ prugeleŋeb. Onaqa Yesus na olo minjrej, “O ijo aŋgro, niŋgi quiye. Tamo uŋgasari naŋgi Qotei na taqatnjrsim naŋgo Mandor Koba sqa marsibqa laŋ qureq oqwajqa baŋgi koba. 25 Kamel a yumba miligiq gilqajqa tulaŋ baŋgi koba. Dego kere tamo uŋgasari iŋgi iŋgi koba ti unub qaji naŋgi Qotei na taqatnjrsim naŋgo Mandor Koba sqa marsibqa laŋ qureq oqwajqa tulaŋ baŋgi koba.” 26 Onaqa Yesus aqa aŋgro naŋgi aqa anjam di qusibqa olo tulaŋ prugeleŋosib segi segi maroqneb, “Yesus a anjam degsi mergwo deqa tamo yai naŋgi ŋambile gaigai sqa kere?” 27 Onaqa Yesus a naŋgi koqnjrsiqa minjrej, “Tamo naŋgi segi ŋambile sqa keresai. Ariya Qotei a kumbra kalil yqa kere.”

28 Onaqa Pita na Yesus minjej, “O Tamo Koba, ni une. Iga gago iŋgi iŋgi kalil uratosimqa ni daurmonum.” 29 Onaqa Yesus na minjrej, “Niŋgi quiye. E bole merŋgwai. Tamo kalil e qa ti ijo anjam bole qa ti are qaloqnsib naŋgo segi tal uratosib naŋgo was naŋgi, naŋgo jaja naŋgi, naŋgo ai wo abu wo naŋgi, naŋgo aŋgro naŋgi ti naŋgo wau kalil dego uratnjrsib e daurbqab tamo naŋgi di Qotei na tal, was, jaja, ai, aŋgro, wau gargekoba olo enjrqas. Yimqa tamo qudei naŋgi na naŋgi ugeugeinjroqnqab. Ariya mondoŋ naŋgi ŋambile gaigai sqab. 31 Niŋgi quiye. Tamo gargekoba bini ñam koba ti unub qaji naŋgi mondoŋ ñam saiqoji sqab. Ariya tamo gargekoba bini ñam saiqoji unub qaji naŋgi mondoŋ ñam koba ti tigelqab.”

Yesus a olo aqa moio qa ti a subq na tigelo qa ti anjam marej

32 Osiqa Yesus a na aqa aŋgro naŋgi joqsiqa koba na gam dauryosib Jerusalem qureq aioqneb. Aioqnsibqa Yesus a namoeqnaqa aqa aŋgro naŋgi bunuqna dauryoqnsibqa are toŋtoŋnjroqnej. Tamo uŋgasari qudei gam na dauryoqneb qaji naŋgi dego ulaosi aioqneb. Onaqa Yesus a na aqa aŋgro 12-pela naŋgi segitnjrsiqa Jerusalem dia a une kie turqas deqa naŋgi sainjrej. 33 A na naŋgi endegsi minjrej, “Niŋgi quiye. Iga Jerusalem aieqnum. E Tamo Aŋgro deqa Jerusalem dia jeu tamo naŋgi na e osib dal anjam qalie tamo naŋgi ti atra tamo kokba ti naŋgo baŋq di e atqab. Yimqa naŋgi na e ojsib ijo jejamu laŋa gisaŋyosib merbqab, ‘Ni une ti. Deqa ni moiqam.’ Naŋgi na e degsib gisaŋbosib e ojsib tamo naŋgi Qotei aqa ñam qaliesai qaji naŋgo baŋq di e atqab. Yimqa naŋgi na e ojsib misiliŋboqnsib miselboqnsib bu toqoŋ na e kumbaiŋboqnqab. Osib e ŋamburbasq di lubsib moiotbqab. Ariya bati qalub koboamqa e olo subq na tigelqai.”

Jems wo Jon wo naŋgi tamo kokba sqajqa deqa Yesus minjeb

35 Onaqa Sebedi aqa ŋiri aiyel Jems wo Jon wo naŋgi Yesus aqa areq bosib minjeb, “O Qalie Tamo Koba, aqo aiyel anjam bei mermonam ni gago anjam dauryqa kere kio?” 36 Onaqa Yesus na naŋgi aiyel nenemnjrej, “E niŋgi kierŋgwajqa deqa niŋgi e qa bonub?” 37 Onaqa naŋgi aiyel na Yesus nenemyeb, “Mondoŋ ni riaŋ koba ti laŋ goge dena bosim gago Mandor Koba sosimqa bati deqa ni marimqa aqo aiyel ino baŋ woq di ino baŋ qonaŋq di awoqom.”

38 Onaqa Yesus na kamba minjrej, “Anjam niŋgi merbonub di aqa utru niŋgi geregere poiŋgosai. E jaqatiŋ koba oqai. Jaqatiŋ di ya uge uyo bul. E gulube koba dego oqai. Gulube di tamo naŋgi ya tuqtnjro bul. Jaqatiŋ ti gulube ti e oqai di niŋgi aiyel dego oqa kere e?” 39 Onaqa naŋgi na minjeb, “Od, aqo aiyel oqa kere.”

Onaqa Yesus a na olo naŋgi aiyel minjrej, “Bole, jaqatiŋ e oqai di niŋgi dego oqab. Gulube e oqai di niŋgi dego oqab. 40 Ariya mondoŋ tamo yai naŋgi ijo baŋ woq di ijo baŋ qonaŋq di awoqab di e na marqa keresai. Di ijo wau sai. Tamo naŋgi Qotei na giltnjrej qaji naŋgi segi ijo baŋ woq di ijo baŋ qonaŋq di awoqab.”

41 Yesus aqa aŋgro 10-pela naŋgo ŋamgalaq dia naŋgi aiyel aube wo na anjam di Yesus minjeb deqa naŋgi qusib naŋgi aiyel qa ŋiriŋeb. 42 Onaqa Yesus na aqa aŋgro 10-pela naŋgi metnjrnaqa aqa areq bonabqa minjrej, “Niŋgi qalie, mandor kokba sawa sawa kalil taqatejunub qaji naŋgi minjiŋ na tamo uŋgasari naŋgi taqatnjroqnsibqa siŋgila na anjam minjreqnub. 43 Ariya kumbra di nuŋgoq di saiq. Nuŋgo ambleq di aŋgro bei a ñam ti tigelqa marsimqa a mati nuŋgo wau tamo soqnem. Osimqa a ñam ti tigelqas. 44 Nuŋgo ambleq di aŋgro bei a tamo kobaquja sqa marsimqa a mati nuŋgo wau tamo sosimqa niŋgi kaŋgalŋgoqnem. Osimqa a olo tamo kobaqujaqas. 45 E Tamo Aŋgro. Niŋgi ijo kumbra qalieosib degsib dauryoqniye. Tamo naŋgi na e aqaryaibosib wauetbqajqa e deqa bosai. E na tamo naŋgi wauetnjrqa bem. E na tamo uŋgasari gargekoba naŋgi aqaryainjrsiy ijo segi ŋambile uratosiy naŋgi eleŋqai. E deqa bem.”

Yesus a na tamo bei ŋamdamu geteŋo di boletej

46 Yesus a na aqa aŋgro naŋgi anjam degsi minjrsiq koboonaqa naŋgi joqsiqa koba na walwelosib aisib Jeriko qureq di branteb. Brantosib Jeriko qure ambleq na walwelosib olo Jeriko qure uratosib aieqnabqa tamo uŋgasari tulaŋ gargekoba naŋgi Yesus dauryosib koba na aioqneb. Aieqnabqa tamo bei ŋamdamu geteŋo aqa ñam Bartimeus a gam qalaq di awesosiqa tamo uŋgasari naŋgi silali qa ŋilnjroqnej. Bartimeus a Timeus aqa ŋiri. 47 A gam qalaq di awesosiqa anjam endegsi quej, “Yesus Nasaret qaji a beqnu.” A degsi qusiqa tulaŋ koba leleŋosiq marej, “O Yesus, Devit aqa Ŋiri, ni e qa are ugeimeme.” 48 Onaqa tamo uŋgasari gargekoba Yesus dauryosib aioqneb qaji naŋgi na Bartimeus ŋiriŋtosib minjeb, “Ni leleŋkobaaim. Kiri.” Degsib minjeqnabqa a naŋgo anjam quetnjrosai. A olo tulaŋ koba leleŋosiq Yesus minjoqnej, “O Devit aqa Ŋiri, ni e qa are ugeimeme.” 49 Onaqa Yesus a tigelosiqa tamo uŋgasari naŋgi minjrej, “Tamo di metibqa ijo areq beme.” Onaqa naŋgi na tamo ŋamdamu geteŋo di metosib minjeb, “Ni are siŋgilat. Ni tigel. Yesus a ni metmeqnu.” 50 Degsi minjnab qusiqa aqa gara taqal atsiqa urur tigelosiqa Yesus aqa areq bej. 51 Bonaqa Yesus na nenemyej, “E ni kiermqajqa deqa ni e qa leleŋoqnam?” Onaqa minjej, “O Tamo Koba, e olo ŋam poibim sawa unqajqa deqa e ni qa leleŋoqnam.” 52 Onaqa Yesus na minjej, “Ni e qa ino areqalo siŋgilatonum deqa e ni boletmqai. Deqa ino ŋamdamu olo poimimqa ni gile.” Degsi minjnaqa aqa ŋamdamu poiyonaqa sawa unsiqa tigelosiq Yesus dauryosiq aiej.