Mark 6

Yesus aqa qure utru naŋgi na a qoreiyeb

1Yesus a na naŋgi degsi minjrsiqa naŋgi uratnjrsiq aqa aŋgro naŋgi joqsiqa aqa segi qure utruq gilej. 2Gilsiq di sonaqa yori batiej. Deqa a Juda naŋgo Qotei tal miligiq gilsiqa tamo uŋgasari gargekoba sonabqa tigelosiqa Qotei aqa anjam palontosiq minjroqnej. Minjreqnaqa tamo uŋgasari naŋgi aqa anjam qusibqa naŋgi tulaŋ prugeleŋosib maroqneb, “Yesus a powo qabe na osiqa anjam siŋgila endeqaji palontosiq mergeqnu? A kiersim maŋwa endeqaji babteleŋeqnu? 3Iga qalie, a laŋa tal gereiyo qaji tamo. A Maria aqa ŋiri. A Jems na Joses na Judas na Saimon na naŋgo was. Aqa nawi kalil naŋgi agi iga koba na endi unum.” Naŋgi degsib yomu anjam marsib Yesus qa ugeeb. 4Onaqa Yesus na kamba minjrej, “Qotei aqa medabu o qaji tamo bei aqa segi qure utruq gilsim anjam minjroqnqas di naŋgi aqa anjam quetqa asginjrqas. Deqa a ñam saiqoji sqas. Aqa segi talq dia dego a ñam saiqoji sqas. Ariya a qure bei beiq giloqnsim anjam minjroqnqas di naŋgi aqa anjam quetoqnsib aqa ñam soqtoqnqab.” 5Yesus a na naŋgi degsi minjrsiqa aqa segi qure utruq dia a maŋwa bei yqajqa asgiyej. Osiqa tamo quja quja segi naŋgo gateq di aqa baŋ atnaqa naŋgo ma koboej. 6Aqa segi qure utru naŋgi a qa naŋgo areqalo siŋgilatosai. Deqa a are gulubeiyej.

Yesus na aqa aŋgro 12-pela naŋgi aqa anjam marsib laqajqa qariŋnjrej

Deqa a naŋgi uratnjrsiqa walwelosiq qure bei beiq giloqnsiqa dia Qotei aqa anjam palontosiq minjroqnej. 7Osiqa bati bei a na aqa aŋgro 12-pela naŋgi metnjrnaqa aqa areq bonabqa naŋgi mondor uge uge winjroqnqajqa deqa siŋgila enjrej. Osiqa minjrej, “Niŋgi aiye aiyel giloqnsibqa qure qureq dia ijo anjam palontosib laqniye. 8Niŋgi iŋgi iŋgi osib gilaib. Nuŋgo qaquŋ aib. Silali osib gilaib. Toqoŋ segi osib walweliye. 9Siŋga tatal dego jigsib giliye. Gara jugo aiye aiyel aib.” 10Osiqa minjrej, “Niŋgi qure bei beiq di brantoqnsibqa tal qujaiq di soqniye. Dia sosib dena olo tigelosib qure beiq giloqniye. 11Tamo bei na niŋgi gereiŋgwa uratimqa kio nuŋgo anjam quqwa asgiyimqa kio niŋgi qure di uratqa oqnsib nuŋgo siŋga tatal tumbrum butuyoqniye. Yimqa naŋgi nuŋgo kumbra di unsib poinjrqas, ‘Bole, iga kumbra ugetonum.’” 12Yesus a na aqa aŋgro 12-pela naŋgi anjam degsi minjrsiq qariŋnjrnaqa naŋgi tigelosib qure qureq giloqnsibqa Qotei aqa anjam palontosib minjroqneb. Endegsib minjroqneb, “Niŋgi are bulyiye.” 13Degsib minjroqnsib mondor uge uge naŋgi winjroqnsibqa tamo uŋgasari naŋgo gateq di goreŋ bilenteqnabqa naŋgo ma saioqnej.

Herot a are qalej, “Yesus a Jon yansnjro tamo olo subq na tigelqo.”

14Yesus aqa aŋgro naŋgi aqa ñam mare mare laqnabqa Mandor Koba Herot a dego quej. Qusiqa marej, “Tamo di Jon yansnjro qaji tamo de kio? A moisiq olo subq na tigelqo. Dena a siŋgila osiqa maŋwa endeqaji babteleŋeqnu.” 15Onaqa tamo qudei naŋgi Yesus aqa ñam qusib maroqneb, “Yesus a Elaija kio olo bqo?” Onaqa qudei maroqneb, “Yesus a Qotei aqa medabu o tamo naŋgi nami soqneb deqaji bei kio?” 16Ariya Herot a segi Yesus aqa ñam qusiqa marej, “Jon e na nami kakoro gentetem qaji agi a kio? A moisiq olo subq na tigelqo.”

17Herot a na nami aqa aube Filip aqa ŋauqali Herodias yaiysiq ej. Deqa Jon yansnjro qaji a na Herot minjoqnej, “Ni ino segi was aqa uŋa em di kumbra bolesai. Ni kumbra ugetonum.” Jon a na Herot degsi minjoqnej. Deqa Herot a Jon qa minjiŋ oqetonaqa aqa qaja tamo qudei naŋgi qariŋnjrnaqa gilsib Jon ojsib sil na qosisib tonto talq waiyeb. 19Ariya Herot aqa ŋauqali a Jon qa tulaŋ ŋiriŋugetej. Deqa a na Herot waiŋyosiq minjoqnej, “Ni na Jon qalim moiem.” Yeqnaqa Herot na saidyoqnej. 20Di kiyaqa? Herot a Jon qa ulaosiq a geregere taqatoqnej deqa. Herot a qalieej, “Jon a tamo bole. Aqa jejamuq di une bei saiqoji. A Qotei aqa segi aŋgro.” Herot a degsi qalieosiq deqa Jon taqatoqnsiqa aqa anjam quoqnej. Quoqnsiqa are koba qaloqnej. A Jon aqa anjam quqwajqa arearetoqnej. Deqa aqa ŋauqali na Jon qalqa minjeqnaq a na saidyoqnej.

21Bati bei Herot aqa ŋauqali a na Jon qalim moiqajqa gam endegsi gereiyej. Herot aqa ŋambabo bationaqa Herot na maruro atsiqa aqa qaja tamo gate naŋgi ti Galili sawa taqato tamo naŋgi ti metnjrnaqa bosib aqa talq di koroeb. 22Koroosib iŋgi uyeqnabqa Herot aqa ŋauqali aqa asi a warum miligiq bosiqa naŋgi lou tuetnjroqnej. Onaqa naŋgi a unsibqa tulaŋ areboleboleinjrej. Deqa Herot na aŋgro sebiŋ di minjej, “Ni ijo iŋgi kie oqajqa merbqam emqai.” 23Osiqa aqa anjam di siŋgilatosiqa olo minjej, “Ijo anjam di e bole dauryqai. Ni ijo ñoro kalil ambleq na potosim oqajqa marqam emqai. E ijo anjam di uratqasai bolesai.”

24Onaqa aŋgro sebiŋ di a gilsiqa aqa aniqali nenemyej, “E iŋgi kie qa Herot minjqai?” Onaqa minjej, “Ni Jon yansnjro qaji aqa gate qa mare.” 25Onaqa a olo urur ti warum miligiq gilsiqa Herot minjej, “Ni Jon yansnjro qaji aqa gate tabirq di atsim ebe.” 26Onaqa Herot a aŋgro sebiŋ aqa anjam di qusiqa a Jon qalim moiqajqa are sosai deqa a are tulaŋ gulubekobaiyej. Aqa segi anjam tamo kalil naŋgo ulatamuq dia marsiq siŋgilatej qaji deqa ti are qalsiq are gulubekobaiyej. Aqa anjam di olo beltosim anjam bei marqas di a jemaiyqas. Deqa a na aŋgro sebiŋ di minjej, “Di kere. Ni Jon aqa gate oqam.” 27Osiqa aqa qaja tamo bei qariŋyosiqa minjej, “Ni gilsim Jon aqa kakoro gentosim aqa gate osau.” Degsi minjnaqa a gilsiqa tonto talq dia Jon aqa kakoro gentosiqa aqa gate tabirq di atsiqa osi bosiq aŋgro sebiŋ di yej. Yonaqa a na osi gilsiqa aqa aniqali yej.

29Onaqa Jon aqa aŋgro naŋgi deqa qusibqa bosib Jon aqa qusa osi gilsib subq ateb.

Yesus na tamo 5,000 naŋgi iŋgi anainjrej

30Bati bei Yesus aqa aŋgro 12-pela nami qariŋnjrnaqa qure qureq giloqneb qaji naŋgi olo bosibqa Yesus aqa areq di koroosib kumbra kalil naŋgi yoqneb qaji deqa ti anjam kalil naŋgi palontosib maroqneb qaji deqa ti Yesus saiyoqneb. 31Saiyeqnabqa bati di tamo uŋgasari tulaŋ gargekoba naŋgi Yesus aqa aŋgro ti naŋgo areq di gile beoqneb. Deqa naŋgi iŋgi uyqa bati saiqoji. Deqa Yesus na aqa aŋgro naŋgi endegsi minjrej, “Niŋgi tigeliye. Iga tamo uŋgasari naŋgi uratnjrsim segitosimqa wadau sawaq dia kiñala aqaratqom.” 32Degsi minjrsiqa aqa aŋgro naŋgi joqsiqa koba na qobuŋ gogetosib wadau sawaq gileb.

33Naŋgi qobuŋ na gileqnabqa tamo uŋgasari kalil naŋgi ŋam atsib Yesus unsibqa aqa ulatamu poinjrnaqa naŋgo segi qure qureq dena tigelosibqa siŋga na gurgurosib Yesus tiryqajqa sawaq dia namoosib bumbraŋyeb. 34Onaqa Yesus a qobuŋ na gilsiq tiryosiqa ŋam atej tamo uŋgasari tulaŋ gargekoba nami tiryqa sawaq dia tariŋesonab unjrej. Naŋgi kaja bul mandor saiqoji. Deqa Yesus a naŋgi qa are ugeiyej. Osiqa naŋgo areq aisiqa Qotei aqa anjam gargekoba minjroqnej. 35Ariya seŋ aieqnaqa Yesus aqa aŋgro naŋgi aqa areq bosib minjeb, “O Tamo Koba, endi wadau sawa. Seŋ aieqnu. Qoloqas. 36Deqa ni na tamo uŋgasari naŋgi minjrimqa naŋgi qure qureq gilsib dia iŋgi uysib ŋereŋqab.” 37Onaqa Yesus na minjrej, “Niŋgi na iŋgi anainjriye.” Degsi minjrnaqa naŋgi na kamba minjeb, “Iga kiersim iŋgi anainjrqom? Iga 200 kina qabe na osimqa iŋgi awaiysim naŋgi anainjrqom?” 38Onaqa Yesus na nenemnjrej, “Niŋgi iŋgi gembub unu? Niŋgi gilsib uniye.” Onaqa naŋgi gilsib unsib minjeb, “Iga bem 5-pela qe aiyela segi unu.”

39Onaqa Yesus na tamo uŋgasari kalil naŋgi minjrej, “Niŋgi qur segi segi ysibqa ñiŋq di awoeleŋoiye.” 40Onaqa naŋgi kalil dedegsib awoeb. Qudei naŋgi qur segi segi 100 awoeleŋeb. Qudei naŋgi qur segi segi 50 awoeleŋeb. 41Awoonabqa Yesus a na bem 5-pela ti qe aiyel ti di osiqa laŋ goge tarosiq Qotei pailyej. Pailyo koboonaqa bem giŋgeŋyosiqa aqa aŋgro naŋgi enjrsiqa minjrej, “Bem endi jeisib tamo uŋgasari naŋgi anainjriye.” Osiqa qe aiyel dego giŋgeŋyosiqa aqa aŋgro naŋgi enjrsiqa minjrej, “Qe endi dego jeisib tamo uŋgasari naŋgi anainjriye.” Degsi minjrnaqa naŋgi bem ti qe ti osi giloqnsibqa tamo uŋgasari naŋgi jeisib enjreqnab uyoqneb. 42Uynab kalil menetnjrej. 43Onaqa iŋgi oto urateleŋeb qaji di Yesus aqa aŋgro naŋgi na koroiyosib gumba kokba 12-pelaq di jignab maqeleŋej. 44Tamo kalil bem ti qe ti uyeb qaji naŋgi sisiyeb 5,000.

Yesus a ya baŋgaq na walwelej

45Onaqa Yesus a na aqa aŋgro naŋgi endegsi minjrej, “Niŋgi qobuŋ gogetosib namoosib gilsib Betsaida qureq di tiryosib soqniye. E na tamo uŋgasari naŋgi minjritqa naŋgo qure qureq jaraioqnib bqai.” 46Onaqa Yesus aqa aŋgro naŋgi namoosib gileqnabqa Yesus a na tamo uŋgasari naŋgi minjrnaq jaraieqnabqa a segi Qotei pailyqa marsiq manaq oqej. 47Oqsiq a segi mana goge di sonaqa bilaqtej. Onaqa aqa aŋgro naŋgi qobuŋ suweiyosib isaq gilsib ya agu ambleq di gileqnabqa jagwa koba tigelosiqa ya korkortosiqa naŋgi pulutnjrej. Nobqolo ambru Yesus a aqa aŋgro naŋgi qa bosiqa ya baŋgaq na walwelosiqa naŋgi daurnjrsiq gilej. Gilsiq naŋgi jojomnjrsiq buŋnjrqa laqnaqa ŋam ateb Yesus a ya baŋgaq na walwelosiq beqnaqa unsib mareb, “Di buga beqnu.” Osib tulaŋ ulaugetosib leleŋkobayeb. Onaqa Yesus na minjrej, “Nuŋgo are siŋgilatiye. Endi e beqnum. Ulaaib.” 51Degsi minjrsiqa qobuŋ gogetonaqa jagwa laej. Onaqa Yesus aqa aŋgro naŋgi aqa siŋgila di unsibqa naŋgi tulaŋ prugeleŋeb. Di kiyaqa? Naŋgi Yesus aqa siŋgila di unsib utru geregere poinjrosai deqa. Nami Yesus na tamo 5,000 naŋgi iŋgi anainjrej kumbra di uneb naŋgi poinjrosai. Naŋgo areqalo geteŋnjresoqnej.

Yesus a Genesaret sawaq dia ma tamo gargekoba naŋgi boletnjroqnej

53Ariya Yesus aqa aŋgro naŋgi koba na qobuŋ na gilsib ya agu taqal beiq di brantosib Genesaret sawaq di tiryeb. 54Tiryonabqa qure deqaji tamo uŋgasari naŋgi Yesus unsibqa aqa ulatamu poinjrnaqa tigelosib gurgur ti qure qureq giloqnsibqa Yesus tiryej qaji sawa di tamo uŋgasari naŋgi minjreqnab quoqnsib naŋgo ma tamo naŋgi sapera ateleŋoqnsib qoboiyosib Yesus aqa areq osi beleŋeqnab a na naŋgi boletnjroqnej. 56Osiqa walwelosiqa qure kiñilala ti qure kokba ti naŋgo segi segi gamq dia dego branteqnaqa tamo uŋgasari naŋgi a unoqnsibqa tamo ma ti naŋgi joqoqnsib naŋgo qure ambleq dia atoqnsib minjoqneb, “O Tamo Koba, naŋgi ino gara mutu segi ojibqa naŋgo ma saioqnqas.” Onaqa Yesus a na naŋgi odnjreqnaqa ma tamo kalil naŋgi aqa areq boqnsib aqa gara mutu ojoqneb. Ojeqnab naŋgo ma kalil saieleŋoqnej.