Mark 9

1Osiqa minjrej, “Niŋgi quiye. E bole merŋgwai. Tamo qudei ijo areq endia tigelejunub qaji naŋgi moreŋosaisoqnibqa Qotei a siŋgila ti bosim nuŋgo Mandor Koba sosim niŋgi taqatŋgesoqnim niŋgi unqab.”

Yesus a mana goge dia aqa jejamu bulyonaq aqa aŋgro qalub naŋgi unobeiteb

2Yesus a na naŋgi anjam degsi minjrsiq koboonaqa bati 6-pela onaqa a tigelosiqa Pita na Jems na Jon na naŋgi qalub joqsiqa koba na mana goge kobaq oqeb. Naŋgi segi qalub oqsib di soqneb. Sosibqa Yesus aqa jejamu bulyonaq naŋgi unobeiteb. 3Aqa gara dego tulaŋ puloŋosiq qatekritej. Tamo bei na gara yansqas di a degsim qatqa keresai. 4Onaqa tamo aiyel brantosib Yesus ombla na anjam maroqneb. Tamo aiyel di Moses wo Elaija wo. Naŋgi aiyel brantonabqa Yesus aqa aŋgro naŋgi na unjrsibqa Pita na Yesus minjej, “O Tamo Koba, Moses wo Elaija wo bosib iga koba na endi unum di bolequja. Deqa ni marimqa iga tal kiñilala qalub gereiyqom. Bei ino. Bei Moses aqa. Bei Elaija aqa.” 6Naŋgi tulaŋ ulaugeteb deqa Pita a anjam bei marqa saiiyonaqa laŋa marej. 7Onaqa laŋbi aisiqa naŋgi kabutnjrnaqa laŋbi miligiq dena anjam bei endegsi brantonaq naŋgi queb, “Endi ijo Aŋgro qujai e na tulaŋ qalaqalaiyeqnum qaji. Niŋgi aqa anjam quetoqniye.” 8Onaqa Yesus aqa aŋgro naŋgi bulosib ŋam ateb naŋgi tamo aiyel di olo unjrosai. Yesus a segi naŋgi koba na sonab uneb.

9Ariya naŋgi Yesus ombla manaq dena olo aioqnsibqa Yesus na minjrej, “Kumbra niŋgi mana goge di unonub qaji di ubtsib tamo qudei minjraib. Bunuqna e Tamo Aŋgro moisiy olo subq na tigelotqa bati deqa niŋgi na ubtsib minjroqnqab.” 10Onaqa naŋgi Yesus aqa anjam di qusib segi segi maroqneb, “Yesus a kiyaqa subq na tigelqa marqo? Anjam di aqa utru iga poigosai.” Degsi marsibqa Yesus aqa anjam di naŋgo areqaloq di atnab soqnej. 11Osib Yesus minjeb, “Dal anjam qalie tamo naŋgi mareqnub, ‘Elaija a namo bamqa Kristus a bunuqna bqas.’ Anjam di kiyaqa degsib mareqnub?” 12Onaqa Yesus na minjrej, “Naŋgo anjam di bole. Elaija a namo bosim tamo uŋgasari kalil naŋgo areqalo gereiyetnjrsim soqnimqa bunuqna Kristus bqas. Qotei aqa anjam nami degsib neŋgreŋyeb unu. 13Ariya e niŋgi endegsi merŋgwai. Elaija agi bej. Bonaqa kumbra kalil naŋgi a qa yqajqa are soqnej qaji agi yeb. Ysibqa agi qaleb. A qa nami anjam degsib neŋgreŋyeb unu. E Tamo Aŋgro dego degsib kumbra uge ebqab. Anjam di dego nami neŋgreŋyeb unu.”

Yesus na aŋgro mel mondor uge ti so qaji a boletej

14Ariya Yesus na aqa aŋgro qalub naŋgi di joqsiqa koba na manaq dena olo aisib ŋam ateb mana utruq dia Yesus aqa aŋgro naŋgi ti dal anjam qalie tamo qudei ti anjam na qoteqnab unjreb. Tamo uŋgasari tulaŋ gargekoba naŋgi dego mana utruq dia Yesus qa tariŋosib aqa aŋgro naŋgi kaiŋnjresonab unjreb. 15Onaqa tamo uŋgasari kalil naŋgi Yesus unsibqa naŋgi tulaŋ prugeleŋosib gurgur ti aqa areq bosib minjeb, “O Tamo Koba, kaiye.” 16Degsi minjnabqa Yesus na aqa aŋgro naŋgi nenemnjrej, “Niŋgi anjam kie qa dal anjam qalie tamo naŋgi ti anjam na qoteqnub?” 17Onaqa tamo uŋgasari naŋgo ambleq dena tamo bei brantosiqa Yesus minjej, “O Qalie Tamo Koba, e ijo aŋgro mel osi bonum agiende. Ni na boletqajqa deqa osi bonum. A mondor uge ti. Deqa aqa medabu geteŋyejunu. 18Mondor uge dena aqa jejamu ojoqnsiqa mandamq waiyeqnaqa ara gijiriqtoqnsiqa tindaŋeqnu. Oqnsiqa maul aieqnu. Deqa e na ino aŋgro naŋgi minjronum, ‘Niŋgi mondor uge di wiyiye.’ Minjronumqa naŋgi na wiyqa yonub keresaiinjrqo.”

19Onaqa Yesus a anjam di qusiqa marej, “Niŋgi tamo uŋgasari bini bati endeqa unub qaji nuŋgo areqalo e qa siŋgilatosai bolesai? Bati gembub e niŋgi koba na sosiyqa nuŋgo gulube di qoboiyoqnqai? Aŋgro mel di ijo areq osi boiye.” 20Onaqa osi bonabqa mondor uge dena Yesus unsiqa aŋgro di qunjimyonaqa a mandamq aisiqa belbelonaqa aqa medabuq na maul aioqnej.

21Onaqa Yesus na aŋgro di aqa abu nenemyej, “Bati gembub a degesoqnej?” Onaqa minjej, “A aŋgro kiñala qa degesoqnej agi bini unu. 22Mondor uge na a qalsim moiotqa oqnsiqa bati gaigai a ŋamyuoq o yaq waiyeqnu. Deqa ni na iga aqaryaigwa kereamqa aqaryaige.” 23Onaqa Yesus na minjej, “‘Kereamqa’ degsi merbaim. Ni e qa ino areqalo siŋgilatqam di ni kumbra kalil yqa kere.” 24Onaqa tamo dena leleŋosiqa Yesus minjej, “E ni qa ijo areqalo siŋgilatonum di ijo areqalo olo gulubeibeqnu. Deqa ni na aqaryaibimqa e geregere ijo areqalo ni qa siŋgilatsiy sqai.” 25Onaqa tamo uŋgasari tulaŋ gargekoba naŋgi gurgur ti bosib Yesus aqa areq di koroeqnabqa Yesus a naŋgi unjrsiqa mondor uge di ŋiriŋtosiq minjej, “Ni mondor uge. Ni na aŋgro di aqa dabkala getentonum. Ni aqa medabu dego getentonum. Deqa ni aŋgro di uratosim ulaŋ. Olo aqa jejamuq gilaim.” 26Degsi minjnaqa mondor uge a leleŋkobayosiqa aŋgro di siŋgila na qunjimyosiqa a uratosiq ulaŋej. Ulaŋonaqa aŋgro di a moiobulosiqa ŋeiesonaqa tamo qudei naŋgi unsib mareb, “A moiqo.” 27Onaqa Yesus na aŋgro di aqa baŋ titonaqa a boleosiq tigelej.

28Onaqa Yesus aqa aŋgro naŋgi aqa areq lumu bosib nenemyeb, “Iga kiyaqa mondor uge di wiyqa yonumqa keresaiigwo?” 29Onaqa Yesus na minjrej, “Niŋgi mondor uge deqaji winjrqa osibqa Qotei pailyqab dena qujai niŋgi na mondor uge winjrib jaraiqab. Gam bei na sai.”

Yesus a olo aqa moio qa ti a olo subq na tigelo qa ti anjam marej

30Onaqa Yesus a na aqa aŋgro naŋgi olo joqsiqa koba na sawa di uratosib Galili sawa ambleq na walwelosib giloqneb. Tamo uŋgasari naŋgi a qa qalieaib deqa naŋgi uliosib giloqneb. 31Giloqnsibqa gamq dia Yesus na aqa aŋgro naŋgi anjam endegsi minjrej, “E Tamo Aŋgro. Deqa jeu tamo naŋgi na e ojsibqa qaja tamo naŋgo baŋq di atib lubib moiqai. Bati qalub koboamqa e olo subq na tigelqai.” 32Onaqa Yesus aqa aŋgro naŋgi aqa anjam di geregere poinjrosai. Deqa naŋgi a olo nenemyqajqa ulaeb.

Yesus aqa aŋgro naŋgi aŋgro yai a segi qujai ñam ti tigelqas deqa anjam na qotoqneb

33Ariya naŋgi gilsib Kaperneam qureq di branteb. Brantosib tal bei gogetosib di sosibqa Yesus na aqa aŋgro naŋgi endegsi nenemnjrej, “Niŋgi gamq dia anjam kie qa anjam na qotoqnab?” 34Onaqa naŋgi mequmosib soqneb. Di kiyaqa? Naŋgi gamq dia aŋgro yai a segi qujai tamo ñam ti tigelqas deqa anjam na qotoqneb. 35Onaqa Yesus a awoosiqa aqa aŋgro 12-pela naŋgi metnjrnaqa aqa areq bonabqa minjrej, “Nuŋgo ambleq di aŋgro bei a ñam ti tigelqa marsimqa a mati nuŋgo kaŋgal tamo soqnem. Osimqa a ñam ti tigelqas.” 36Yesus a na naŋgi degsi minjrsiqa aŋgro kiñala bei osiqa naŋgo ambleq di tigeltosiqa olo soqoŋyosiqa naŋgi minjrej, 37“Tamo bei a ijo ñam qa are qalsimqa aŋgro kiñala endego bei osim geregereiyqas di a e dego osim geregereibqas. Tamo a e osim geregereibqas di a na e segi geregereibqasai. A na ijo Abu e qariŋbej qaji di dego osim geregereiyqas.”

Tamo naŋgi iga jeutgosaieqnub qaji naŋgi iga koba na wau qujai

38Onaqa Jon na Yesus minjej, “O Tamo Koba, ni que. Iga tamo bei unem. A ino ñam na mondor uge naŋgi winjreqnaqa iga na unsimqa saidyem. Di kiyaqa? A iga koba na wauosaieqnu deqa.” 39Onaqa Yesus na minjej, “Niŋgi a saidyaib. A ijo ñam na maŋwa bei babtqas di kere. Deqa a urur e misiliŋbqasai. 40Tamo naŋgi iga jeutgosaieqnub qaji naŋgi iga koba na wau qujai. 41Tamo bei a endegsi are qalqas, ‘Tamo di a Kristus aqa aŋgro.’ A degsi are qalsimqa tamo di ya qaryimqa ya tigsim anaiyqas di Qotei na kamba awai bole yqas. Yimqa aqa awai bole di tamo bei na olo yaiyqa keresai.

Tamo bei na aŋgro kiñala bei osim kumbra ugeq waiyqas di kumbra tulaŋ uge

42“Tamo bei na ijo aŋgro kiñala endego bei e qa aqa areqalo siŋgilatqo qaji di osim uneq waiyqas di uge. Tamo qudei naŋgi na tamo di ojsib meniŋ kobaquja osib sil na aqa kakoroq di tontosib waiyib ya robuq aisim moiqas di kere. 43Ino baŋ na ni titmosim uneq waimqa laqnimqa baŋ di gentsim waiy. Ni baŋ geŋo sosimqa ino baŋ na une bei yqasai di kere. Di ni ŋambile gaigai sqam. Ariya ni baŋ aiyel ti sosimqa ino baŋ na une yqam di keresai. Di Qotei na ni ŋamyuoq waimqas. Ŋamyuo di mosoqasai. Gaigai yuoqnqas. Ŋamyuoq dia tamo naŋgo ambli bati gaigai sosibqa naŋgi moreŋqa keresai. 45Ino siŋga na ni titmosim uneq waimqa laqnimqa siŋga di gentsim waiy. Ni siŋga geŋo sosimqa ino siŋga na une bei yqasai di kere. Di ni ŋambile gaigai sqam. Ariya ni siŋga aiyel ti sosimqa ino siŋga na une yqam di keresai. Di Qotei na ni ŋamyuoq waimqas. Ŋamyuo di mosoqasai. Gaigai yuoqnqas. Ŋamyuoq dia tamo naŋgo ambli bati gaigai sosibqa naŋgi moreŋqa keresai. 47Ino ŋamdamu na ni titmosim uneq waimqa laqnimqa ŋamdamu di otorosim waiy. Ni ŋamdamu qujai ti sosimqa ino ŋamdamu na une bei yqasai di kere. Di Qotei a ino Mandor Koba sosim ni taqatmqas. Ariya ni ŋamdamu aiyel ti sosimqa ino ŋamdamu na une yqam di keresai. Di Qotei na ni ŋamyuoq waimqas. 48Ŋamyuo di mosoqasai. Gaigai yuoqnqas. Ŋamyuoq dia tamo naŋgo ambli bati gaigai sosibqa naŋgi moreŋqa keresai.

49“Niŋgi quiye. Tamo naŋgi bar oqnsib iŋgiq di atoqnsib Qotei atraiyeqnub. Dego kere ŋamyuo na niŋgi kalil ekritqas.

50“Bar a bole. A qajarara koba. Ariya bar aqa qajarara koboqas di iŋgi kie na olo qajararatqas? Di keresai. Dego kere niŋgi bar bul sosibqa nuŋgo was naŋgi koba na geregere lawo na laqniye.”