Mat 27 | BOJ | STEP | Onaqa nobqolo malu qameqnaq atra tamo kokba ti Juda gate kokba ti naŋgi kalil koroesosibqa Yesus qalib moiqajqa anjam keretoqneb. Anjam kereonaq naŋgi Yesus aqa baŋ tontetosib osi gilsib Rom naŋgo Tamo Koba Pailat aqa baŋq di ateb.

Matthew 27

Naŋgi Yesus osib Pailat aqa baŋq di ateb

1 Onaqa nobqolo malu qameqnaq atra tamo kokba ti Juda gate kokba ti naŋgi kalil koroesosibqa Yesus qalib moiqajqa anjam keretoqneb. Anjam kereonaq naŋgi Yesus aqa baŋ tontetosib osi gilsib Rom naŋgo Tamo Koba Pailat aqa baŋq di ateb.

Judas a aqa segi jejamu qalsiq moiej

3 Ariya atra tamo kokba ti Juda gate kokba ti naŋgi anjam keretosib Yesus qalqajqa marnabqa Judas a qusiqa olo areqalo bei osiqa naŋgo areq bosiq minjrej, “E une kobaquja yonum. Tamo e nuŋgo baŋq di atonum qaji di a une saiqoji. Niŋgi a laŋa qalsib moiotqab. Deqa meniŋ silali 30 niŋgi na ebeb qaji endi olo oiye.” Degsi minjrnaqa naŋgi na kamba minjeb, “Di ino segi une. Silali di olo iga egaim. Di ni ame.” 5 Onaqa Judas a silali di olo osi gilsiqa atra tal meq di breiyosiqa aisiq a segi na aqa kakoroq di sil waiysiq gaiŋosiq moiej.

6 Onaqa atra tamo kokba naŋgi atra tal meq gilsib silali Judas na breiyej qaji di unsib mareb, “Silali endi tamo qalim moiqajqa aqa awai. Deqa iga silali endi atra tal aqa silali ti turtqasai.” 7 Naŋgi degsib marsibqa silali di olo osib web gereiyo qaji tamo bei aqa mandam taqal bei awaiyeb. Yauŋ tamo naŋgi moreŋoqnibqa mandam dia subq ateleŋoqnqajqa deqa awaiyeb. 8 Silali dena mandam taqal di awaiyeb deqa aqa ñam “Leŋ Aio Qaji Mandam” degsib ñam waiyeb. Bini tamo naŋgi ñam degsib mareqnub. 9 Naŋgi degyeb deqa anjam bei Qotei aqa medabu o tamo Jeremaia a nami marej qaji di aqa damu brantej. A endegsi marej, “Israel tamo uŋgasari naŋgi Kristus aqa jejamu qalib moiqajqa aqa awai meniŋ silali 30 atqab. Amqa silali di osib web gereiyo qaji tamo bei aqa mandam taqal bei awaiyqab. Tamo Koba Qotei a na anjam degsi merbqo.” Jeremaia a nami degsi marej.

Pailat a na Yesus nenemyej, “Ni Juda naŋgo Mandor Koba e?”

11 Onaqa naŋgi Yesus osib Pailat aqa ulatamuq dia tigeltonabqa Pailat na nenemyej, “Ni Juda naŋgo Mandor Koba e?” Onaqa Yesus na minjej, “Od. Anjam agi ni na maronum di kere.” 12 Onaqa atra tamo kokba ti Juda gate kokba ti naŋgi Yesus aqa anjam di qusib naŋgi minjiŋ oqetnjrnaqa Yesus gisaŋyoqnsib aqa jejamuq di anjam gargekoba qameleŋoqneb. Onaqa Yesus a torei mequmej. A anjam bei kamba yala marosai. 13 Deqa Pailat na olo Yesus nenemyej, “Naŋgi anjam gargekoba ino jejamuq di qameleŋeqnub. Di ni queqnum e?” 14 Onaqa Yesus a kamba anjam bei marosai. Deqa Pailat a tulaŋ prugugetej.

Pailat a naŋgi Yesus ŋamburbasq di qamqajqa minjrej

15 Pailat aqa kumbra agiende. Wausau gaigai Juda naŋgo yori bati koba brantoqnimqa Juda tamo qudei naŋgi tonto talq di soqnibqa Juda naŋgi na bei aqa ñam maroqnibqa Pailat na uratoqnim giloqnqas. 16 Ariya bati di Juda tamo bei aqa ñam Barabas a tonto talq di atnab soqnej. A leŋ ojo tamo. 17 Deqa tamo uŋgasari kalil naŋgi Pailat aqa areq di koroonabqa a na nenemnjrej, “E Juda tamo yai tonto talq dena uratsiy eŋgwai? E Barabas uratsiy eŋgwai kio Yesus agi niŋgi Kristus qa mareqnub qaji a uratsiy eŋgwai kio? Niŋgi na merbiye.” 18 Pailat a naŋgi degsi minjrej. Di kiyaqa? A qalieej, atra tamo kokba naŋgi Yesus qa are tulaŋ minjiŋ oqetnjrnaqa deqa ojsib Pailat aqa baŋq di ateb. 19 Ariya Pailat a une pegiyo qaji awo jaramq di awesonaqa aqa ŋauqali na anjam bei pepa mutu kiñalaq di neŋgreŋyosiq Pailat aqaq qariŋyej. A endegsi neŋgreŋyej, “Yesus aqa jejamuq di une bei saiqoji. Deqa ni a kumbra uge bei yaim. Qolo e ŋeiobilqeiosim Yesus unonum. Deqa e are tulaŋ gulubekobaibqo.”

20 Ariya atra tamo kokba ti Juda gate kokba ti naŋgi na tamo uŋgasari kalil naŋgo areqalo tigeltetnjreb. Naŋgi na Pailat minjibqa a na Barabas uratsim enjrsim Yesus osim qalim moiqajqa deqa naŋgo areqalo tigeltetnjreb. 21 Onaqa Pailat na olo tamo uŋgasari naŋgi nenemnjrej, “Juda tamo aiyel tonto talq di unub. E tamo yai uratsiy eŋgwai? Niŋgi na merbiye.” Onaqa naŋgi na kamba minjeb, “Ni Barabas uratsi ege.” 22 Onaqa Pailat na olo minjrej, “E na niŋgi Barabas eŋgwajqa merbonub. Deqa e Yesus kieryqai? Agi niŋgi a qa mareqnub. ‘A Kristus.’” Onaqa naŋgi kalil murqumyosib minjeb, “Ni Yesus osim ŋamburbasq di qame.” 23 Onaqa minjrej, “Kiyaqa Yesus qalit moiqas? A une kie yqo deqa a ŋamburbasq di qamqai?” Degsi minjrnaqa naŋgi olo tulaŋ koba murqumyoqnsib waiŋyoqnsib minjoqneb, “Ni a ŋamburbasq di qame.”

24 Naŋgi Pailat degsib waiŋyosib minjnabqa a qusiqa endegsi poiyej, “Tamo uŋgasari naŋgi ijo anjam quetbqasai. E naŋgi saidnjrqai di naŋgi ŋiriŋosib qoto tigelqab.” Pailat a degsi poiyej deqa a tamo uŋgasari naŋgo ulatamuq dia ya bei tabirq di qamsiqa ya dena aqa baŋ yansosiqa minjrej, “Yesus a moiqas di nuŋgo une. Ijo une sai.” 25 Onaqa tamo uŋgasari naŋgi na minjeb, “Di kere. Uŋgum. Yesus a moiqas di gago une na moiqas. Gago aŋgro naŋgi dego une di o ti sqab.” 26 Naŋgi Pailat degsib minjnabqa a naŋgo anjam di dauryosiqa Barabas tonto talq dena oqeq atsiqa naŋgi enjrej. Osiqa olo Yesus osiq qaja tamo naŋgo baŋq di atsiqa minjrej, “Niŋgi Yesus bu toqoŋ na kumbaiŋyiye.” Degsi minjrnaqa naŋgi na Yesus osib kumbaiŋyeb. Kumbaiŋysib koboonaqa Pailat na olo minjrej, “Niŋgi na Yesus ŋamburbasq di qamqajqa osib giliye.”

Qaja tamo naŋgi na Yesus misiliŋyosib gisaŋ na biŋiyoqneb

27 Osiqa naŋgi qariŋnjrnaqa naŋgi Yesus osib Rom naŋgo tal kobaqujaq osi gileb. Osi gilsib qaja tamo kalil naŋgi metnjrnab bosib tal dia koroeb. 28 Koroosib Yesus aqa gara jugo qaji di piqtetosib gara jugo olekoba lent mandor kokba naŋgi gaigai jigeqnub deqaji bei osib Yesus jigeteb. 29 Osib sil luwit osib lulumosib sil dena mandor kokba naŋgo gate tatal bul gereiysib aqa gateq di atetosib siŋgila na teqiyeb. Osib bu toqoŋ kaneŋo osib aqa baŋ woq di yonab a mandor koba bul ojsiq tigelesoqnej. Yesus a segi qa mandor koba maroqnej deqa naŋgi na kumbra degyeb. Osib aqa areq di siŋga pulutosib a misiliŋyosib gisaŋ na biŋiyosib minjoqneb, “O Juda naŋgo Mandor Koba, kaiye.” 30 Degsib Yesus minjoqnsib bu toqoŋ esoqnej qaji di tatruiysib dena aqa gateq di qaloqnsib miselyoqneb. 31 Naŋgi degsib Yesus misiliŋyosib koboonaqa gara lent di piqtetosib aqa segi gara jugo qaji di olo jigetosib aqa qawarq di aqa segi ŋamburbas atetosib a baŋ ojsib qamqajqa osi gileb.

Naŋgi Yesus osi gilsib ŋamburbasq di qameb

32 A osi giloqnsibqa gamq dia tamo bei walwelosiq aieqnaqa a turosib ojsib Yesus aqa qawarq dena ŋamburbas yaiyosib tamo di yonabqa a kamba qoboiyosiqa Yesus gam na dauryosiq giloqnej. Tamo di aqa ñam Saimon. A Sairini qure qaji. 33 Naŋgi Yesus osi gilsib sawa agu kiñala aqa ñam Golgota di branteb. Ñam di aqa damu, “Tamo gate tanu.” 34 Di brantosib qaja tamo naŋgi na wain ya ti kial aqa ya isa koba de ti bulyosib Yesus anaiyonab uyo oneiyonaq ugeiyonaq uratej. 35 Onaqa qaja tamo naŋgi na Yesus osib ŋamburbasq di qameb. Qamsib Yesus aqa gara eleŋqa marsib gilteleŋeb. Gilteleŋosib meniŋ silali alaŋeb. Tamo yai aqa meniŋ na buŋnjrqas a na gara oqas. Degsib marsib meniŋ silali alaŋosib gara eleŋeb. 36 Ariya Yesus a ŋamburbas goge di gaiŋesonaqa qaja tamo naŋgi ŋamburbas utruq dia awoosib Yesus taqatesoqneb. 37 Osib ŋam sarqei bei osib quraq di anjam endegsib neŋgreŋyeb, “Tamo endi Yesus. A Juda naŋgo Mandor Koba.” Degsib neŋgreŋyosib ŋam sarqei di osib Yesus aqa ŋamburbas mutu gogeq di qameb. Osib mareb, “Yesus aqa une agi a marqo, ‘E Juda naŋgo Mandor Koba.’ A degsi marqo deqa anjam di agi ŋamburbas mutu gogeq di qamonum.”

38 Bati deqa bajiŋ tamo aiyel dego ŋamburbasq di gaintnjrsib ñumeb. Bei Yesus aqa baŋ woq di qameb. Bei Yesus aqa baŋ qonaŋq di qameb. 39 Ariya Yesus a ŋamburbas goge di gaiŋesonaqa tamo uŋgasari naŋgi aqa ulatamuq dena walwelosib gile beoqnsib a misiliŋyoqnsibqa gate gaiŋyoqnsib minjoqneb, 40 “Ni nami marem, ‘E atra tal koba koŋgrontosiyqa bati qalub qa olo tigeltqai.’ Ni degsi marem. Deqa ni ino segi jejamu aqaryaiye. Ni Qotei aqa Ŋiri boleamqa ni ino segi jejamu aqaryaiyosim ŋamburbas uratosim mandamq aie.” 41 Atra tamo kokba ti dal anjam qalie tamo naŋgi ti Juda gate kokba ti naŋgi dego Yesus degsib misiliŋyoqneb. Osib segi segi maroqneb, “A na tamo uŋgasari gargekoba aqaryainjroqnej. Ariya a na aqa segi jejamu aqaryaiyqa keresai. A Israel naŋgo Mandor Koba boleamqa a na aqa segi jejamu aqaryaiyosim ŋamburbas uratosim mandamq aiimqa iga unsim marqom, ‘Bole.’ 43 A segi mareqnu, ‘E Qotei qa ijo areqalo siŋgilatejunum. E segi Qotei aqa Ŋiri.’ Aqa anjam di boleamqa Qotei na a aqaryaiyim ŋamburbas uratosim mandamq aiem.” 44 Onaqa bajiŋ tamo aiyel Yesus aqa areq di gaintnjreb qaji naŋgi dego Yesus degsib misiliŋ anjam minjoqneb.

Yesus a moiej

45 Ariya qanam jige seŋ bati 12 onaqa sawa kalil tulaŋ ambruosi sonaq gilsiq seŋ bati 3 onaq bilaqtej. 46 Onaqa Yesus a tulaŋ koba leleŋosiq marej, “Eloi, Eloi, lema sabaktani?” Di Hibru anjam. Anjam di aqa damu, “O ijo Qotei, O ijo Qotei. Ni kiyaqa e qoreibonum?” 47 Onaqa tamo qudei Yesus aqa areq di tigelesoqneb qaji naŋgi aqa anjam di qusib mareb, “Niŋgi quiye. A Elaija meteqnu.” 48 Degsi marnabqa tamo bei a urur ti gilsiq gara ñeŋgi bei osiq wain isa kobaq di tuqtosiqa soruq di qosisiqa osi bosiqa Yesus anaiyqajqa soqtosiqa aqa medabuq di atej. 49 Onaqa tamo qudei naŋgi mareb, “Iga mati tariŋosim koqyesqom. Elaija a bosim Yesus ŋamburbasq dena osim mandamq atqas kio?” 50 Naŋgi degsib marsib tariŋosi sonabqa Yesus a olo tulaŋ koba leleŋosiqa mondor titosiq aqa ŋambile uratosiq moiej.

51 Onaqa bati qujai deqa gara kobaquja atra tal miligiq di gaiŋesoqnej qaji a goge na braŋosiq aisiq poaiyelej. Onaqa mimiŋ kobaquja dego dosiq mandam reŋgiŋyonaqa meniŋ kokba paraparaeleŋeb. 52 Onaqa bati deqa Qotei aqa segi tamo uŋgasari gargekoba nami moreŋeb qaji naŋgo sub waqeleŋonabqa naŋgi olo subq na tigeleb. Ariya bunuqna Yesus a dego subq na tigelonaqa tamo uŋgasari naŋgi di Qotei aqa qure koba miligiq gilnabqa tamo uŋgasari gargekoba naŋgi na unjreb. 54 Ariya qaja tamo naŋgi ŋamburbasq dia Yesus taqatesoqneb qaji naŋgo gate koba ombla na mimiŋ dosiq mandam reŋgiŋyonaq meniŋ kokba paraparaeleŋonab unsibqa naŋgi tulaŋ ulaugetosib mareb, “Bole. Tamo endi a Qotei aqa Ŋiri.”

55 Ariya Yesus a ŋamburbasq di moinaqa uŋgasari qudei naŋgi isaq di tigelesosib Yesus koqyesoqneb. Bei Maria Makdala qure qaji. Maria bei agi Jems wo Josep wo naŋgo ani. Ariya uŋa bei Sebedi aqa ŋiri aiyel naŋgo ani. Yesus a nami Galili sawaq di sonaqa uŋgasari naŋgi di a daurysib laqnsib kaŋgalyoqneb. Bunuqna Yesus a Galili sawa uratosiqa a na naŋgi joqsiqa koba na Jerusalem beleŋeb.

Josep a bosiq Yesus aqa jejamu osi gilsiq subq atej

57 Onaqa bilaqtonaqa ñoro tamo bei aqa ñam Josep a Yesus aqa jejamu osim subq atqa marsiqa Pailat a nenemyqa gilej. Josep a Arimatea qure qaji. A dego Yesus daurysi laqnej qaji. Deqa a Pailat aqa talq gilsiqa nenemyej, “Ni e odbimqa e Yesus aqa jejamu osiy subq atqa kere e?” Onaqa Pailat na odyosiqa aqa qaja tamo qudei naŋgi minjrej, “Niŋgi Yesus aqa jejamu osib Josep yiye.” 59 Onaqa qaja tamo naŋgi di Yesus aqa jejamu ŋamburbasq dena osib Josep yonabqa a na osi gilsiqa gara qat omu na dalaosiq aqa segi sub bunuj nami meniŋ miligiq di gereiyej qaji dia atej. Atsiqa meniŋ kobaquja belbeltosiq sub me getentosiqa olo aiej. 61 Onaqa Maria Makdala qure qaji naŋgi Maria bei wo bosib Josep na Yesus atej qaji sub areq dia awoosib taqatesoqneb.

Qaja tamo naŋgi sub me taqatesoqneb

62 Ariya Juda naŋgo yori bati brantqa laqnaqa yori bati aqa iŋgi iŋgi kalil gereiyosib atnab soqnej. Deqa atra tamo kokba ti Farisi naŋgi ti Pailat aqa talq gilsib minjeb, 63 “O Tamo Koba, Yesus a gisaŋ tamo. Deqa a moiosaisosiqa endegsi marnaq iga quem, ‘Bati qalub koboamqa e olo subq na tigelqai.’ A degsi marnaq quem. 64 Deqa ni na ino qaja tamo qudei qariŋnjrimqa naŋgi gilsib sub me geregere getentosib taqatesoqnibqa bati qalub koboqas. Ni degye. Ni degyqasai di Yesus aqa aŋgro naŋgi gilsib aqa jejamu bajiŋosib gisaŋosib tamo uŋgasari naŋgi minjrqab, ‘Yesus a subq na tigelqo.’ Yimqa naŋgo gisaŋ anjam di tulaŋ kobaosim Yesus aqa gisaŋ anjam nami marej qaji di tulaŋ buŋyqas.” 65 Onaqa Pailat na minjrej, “Di kere. Niŋgi segi na qaja tamo qudei joqsib gilibqa naŋgi na sub me geregere getentosib taqatesqab.” 66 Pailat a naŋgi degsi minjrnaqa naŋgi na qaja tamo qudei naŋgi joqsib gilsib minjreb, “Niŋgi na sub me geregere taqatesoqniye.” Degsib minjrsib meniŋ kobaquja nami sub me getentesoqnej qaji di olo geregere siŋgilatosib sub meq di saga waiyeb. Tamo qudei naŋgi na Yesus aqa jejamu bajiŋqa bosib saga taqal atibqa naŋgi bunuqna bosib saga unqab. Dena naŋgi poinjrqas, naŋgi Yesus bajiŋonub. Deqa osib saga waiyeb.