Rev 1 | BOJ | STEP | Nami anjam endi uliesonaqa Yesus Kristus na olo babtej. Qotei na anjam endi Yesus osoryej. Yimqa kumbra mondoŋ urur brantoqujatqas qaji di Yesus na kamba olo aqa wau tamo naŋgi osornjrqajqa deqa. Ariya Yesus a na aqa laŋ aŋgro qariŋyonaqa a e qa bosiqa anjam endi e ebej. Yim e na kamba olo aqa wau tamo qudei naŋgi minjrqajqa deqa. E Jon. E Yesus aqa wau tamo.

Revelation of John 1

1 Nami anjam endi uliesonaqa Yesus Kristus na olo babtej. Qotei na anjam endi Yesus osoryej. Yimqa kumbra mondoŋ urur brantoqujatqas qaji di Yesus na kamba olo aqa wau tamo naŋgi osornjrqajqa deqa. Ariya Yesus a na aqa laŋ aŋgro qariŋyonaqa a e qa bosiqa anjam endi e ebej. Yim e na kamba olo aqa wau tamo qudei naŋgi minjrqajqa deqa. E Jon. E Yesus aqa wau tamo. 2 E kumbra kalil endi unem deqa e Qotei aqa anjam ti Yesus Kristus aqa anjam ti boleq na marem. Osim marem, anjam endi bole.

3 E Qotei aqa medabu osim deqa anjam endi neŋgreŋyonum. Anjam endi Qotei aqaq na bej. Deqa tamo a anjam endi sisiyqas di a tulaŋ areboleboleiyqas. Tamo uŋgasari naŋgi Qotei aqa anjam e neŋgreŋyonum qaji endi qusib dauryqab di naŋgi dego tulaŋ areboleboleinjrqas. Di kiyaqa? Kumbra kalil endi brantqajqa bati jojomqo.

Jon a anjam endi neŋgreŋyosiq tamo uŋgasari qure 7-pelaq dia Yesus aqa ñam qa koroosib loueqnub qaji naŋgi qa qariŋyej

4 E Jon. E na anjam endi neŋgreŋyosim niŋgi tamo uŋgasari qure 7-pelaq dia Yesus aqa ñam qa koroosib loueqnub qaji niŋgi qa qariŋyonum. Niŋgi agi Esia sawaq di unub. Qotei bini unu, nami soqnej, bunuqna bqas qaji a niŋgi qa are tulaŋ boleiyimqa niŋgi are lawo na soqniye. Mondor 7-pela Qotei aqa awo jaram koba namoq di unub qaji naŋgi dego niŋgi qa are tulaŋ boleinjrimqa niŋgi are lawo na soqniye. 5 Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye.

Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej. 6 Iga aqa Abu Qotei aqa atra tamo sqajqa deqa a na iga giltgej. Iga Qotei ombla mandor kokba sqajqa deqa ti iga giltgej. Yesus Kristus a bati gaigai ñam koba ti siŋgila koba ti sqas. Bole.

7 Niŋgi uniye. Yesus a laŋbi ambleq na boqnimqa tamo kalil naŋgi a unqab. Tamo kalil nami a qaja na qameb qaji naŋgi dego a unqab. Tamo uŋgasari kalil mandamq endi unub qaji naŋgi a qa are ugeinjrimqa tulaŋ akamugetqab. Od, kumbra di brantqas. Bole.

8 Tamo Koba Qotei siŋgila koba ti unu qaji a marej, “E segi qujai namoq di unum. E segi qujai bunuq di sqai.” Qotei a degsi marej. Agi a segi qujai nami soqnej. A bini unu. A olo bunuqna bqas.

Jon a Kristus unej

9 E nuŋgo was Jon. E ti niŋgi ti Yesus aqa tamo unum deqa iga kalil gulube koba qoboiyoqnsim jaqatiŋ eleŋeqnum. Qotei a gago Mandor Koba sosiq iga taqatgeqnu. Deqa iga kalil koba na siŋgila na tigeloqnsimqa gulube qoboiyejunum. E Qotei aqa anjam ti Yesus aqa anjam ti palontsim laqnem deqa jeu tamo naŋgi na e taqal waibosib nui ñam Patmos endia e ateb unum. 10 E Patmos nui endi sonamqa Tamo Koba aqa batiej. Onaqa Qotei aqa Mondor Bole na e siŋgilatbonaqa ijo qoreq di tamo bei leleŋonaqa e aqa kakoro quem. A tulaŋ koba leleŋej. Gul anjameqnu dego kere. 11 Leleŋosiq merbej, “Kumbra kalil ni unqam qaji di neŋgreŋyosim qariŋyimqa tamo uŋgasari qure 7-pelaq dia Yesus aqa ñam qa koroosib loueqnub qaji naŋgoq gilqas. Tamo uŋgasari agi Efesus qureq dia, Smerna qureq dia, Pergamum qureq dia, Taiataira qureq dia, Sardis qureq dia, Filadelfia qureq dia, Laodisia qureq dia Yesus aqa ñam qa koroosib loueqnub qaji naŋgoq qariŋyim gilem.”

12 Onaqa e tamo anjam merbej qaji di unqajqa bulosim ŋam atem lam 7-pela gol na gereiyo qaji di sonab unjrem. 13 Lam naŋgo ambleq di tamo bei sonaq unem. Tamo di a Tamo Aŋgro bul. A gara olekoba jugnaq aisiq siŋga kabutej. Aqa are targaq di alalag gol na gereiyo qaji dena kaiŋyej. 14 Aqa gate ti gate baŋga ti laŋbi bul tulaŋ qat soqnej. Aqa ŋamdamu ŋam puloŋ bul puloŋoqnej. 15 Aqa siŋga minjaloqnej. Bras ŋamyuo na koiteqnab minjaleqnu dego kere. E aqa kakoro quem di ya kobaquja meli dosiq anjam ateqnu dego kere. 16 Aqa baŋ wo na bongar 7-pela ojeleŋesoqnej. Aqa medabuq dena serie olekoba qala aiyel tulaŋ qala uge brantej. Aqa ulatamu seŋ bul tulaŋ suwaŋoqnej.

17 E tamo di unsimqa tulaŋ ulaugetosim ŋam ambruibonaqa e aqa siŋga jojomq di uloŋosim moiobulem. Onaqa a na aqa baŋ wo ijo gateq di atsiqa merbej, “Ni ulaaim. E segi qujai namoq di unum. E segi qujai bunuq di sqai. 18 E ŋambile gaigai sqajqa utru. Nami e moiem. Bini ni e nube. E olo ŋambile unum. E bati gaigai ŋambile sqai. E segi na moio ti moio qure ti taqatejunum. 19 Deqa kumbra ni bini unonum qaji deqa neŋgreŋye. Kumbra bini unu qaji ti kumbra bunuqna branteleŋqas qaji deqa ti neŋgreŋye. 20 Bongar 7-pela ijo baŋ woq di unub qaji naŋgi ti lam 7-pela gol na gereiyo qaji naŋgi ti di ni unjronum. Di anjam ulito qaji. Aqa utru agi mermqai. Ni que. Bongar 7-pela di agi tamo uŋgasari qure 7-pelaq dia e qa loueqnub qaji naŋgo laŋ aŋgro 7-pela naŋgi. Lam 7-pela di agi tamo uŋgasari qure 7-pelaq dia e qa loueqnub qaji naŋgi.”