Rom 10 | BOJ | STEP | O was qu, ijo areqalo koba agiende. Qotei na Israel tamo uŋgasari naŋgi eleŋqajqa deqa e are koba qaleqnum. Osim deqa e gaigai Qotei pailyeqnum.

Romans 10

Israel naŋgi Qotei aqa kumbra qaliesai

1 O was qu, ijo areqalo koba agiende. Qotei na Israel tamo uŋgasari naŋgi eleŋqajqa deqa e are koba qaleqnum. Osim deqa e gaigai Qotei pailyeqnum. 2 E Israel naŋgi qa qalieem deqa e endegsi mareqnum, naŋgi kumbra Qotei a areareteqnu qaji di dauryqajqa tulaŋ siŋgilaeqnub. Ariya naŋgi Qotei aqa kumbra deqa geregere poinjrosaieqnu. 3 Qotei a iga tamo bole une saiqoji qa mergeqnu aqa kumbra di naŋgi qaliesai. Deqa naŋgi naŋgo segi siŋgila na tamo bole une saiqoji sqajqa are qaleqnub. Deqa naŋgi Qotei aqa sorgomq di sosib a segi na naŋgi aqaryainjrimqa naŋgi tamo bole une saiqoji sqajqa olo urateqnub. 4 Iga qalie, Kristus na Moses aqa dal anjam kalil keretekritej. Aqa kumbra dena tamo uŋgasari kalil a qa naŋgo areqalo siŋgilateqnub qaji naŋgi Qotei aqa ŋamgalaq di tamo bole une saiqoji sqab.

5 Tamo naŋgi dal anjam dauryeqnub qaji naŋgi Qotei na kiersim tamo bole une saiqoji qa minjrqas? Moses a deqa osiqa nami endegsi neŋgreŋyej, “Tamo bei a dal anjam kalil dauryekritosim di a ŋambile sqas.” Moses a anjam degsi neŋgreŋyej. 6 Ariya tamo naŋgi Kristus qa naŋgo areqalo siŋgilateqnub qaji naŋgi Qotei na tamo bole une saiqoji qa minjrqas. Deqa Moses a naŋgi qa osiq anjam endegsi neŋgreŋyej, “Niŋgi nuŋgo segi are miligiq na endegsib maraib, ‘Yai a laŋ qureq oqwas?’” Niŋgi degsib marqab di niŋgi Kristus osib mandamq osi bqab. Di keresai. 7 “Niŋgi endegsib maraib, ‘Yai a moio qureq aiqas?’” O was qu, niŋgi degsib marqab di niŋgi Kristus olo subq na tigeltqab. Di dego keresai. 8 Ariya anjam di aqa utru endegsi unu, “Anjam di a jojom di unu. A isaq di sosai. A nuŋgo medabuq di unu. A nuŋgo are miligiq di dego unu.” O was qu, tamo naŋgi Yesus qa naŋgo areqalo siŋgilatqajqa anjam di agi iga mare mare laqnum. 9 Deqa niŋgi nuŋgo medabu waqtosib Yesus a segi qujai Tamo Koba degsib boleq na marqab di Qotei na niŋgi oqas. Qotei a Yesus subq na olo tigeltej anjam di nuŋgo are miligiq di siŋgilatosib sqab di Qotei na niŋgi oqas. 10 Gago are miligiq na iga Yesus qa gago areqalo siŋgilateqnum deqa Qotei na iga tamo bole une saiqoji qa mergeqnu. Ariya gago medabu na iga Yesus aqa ñam soqtoqnsim boleq na mareqnum deqa Qotei na iga oqas.

11 Agi Qotei aqa anjam bei nami endegsib neŋgreŋyeb unu, “Tamo naŋgi Kristus qa naŋgo areqalo siŋgilatqab di naŋgi jemainjrqasai.” 12 Iga Juda tamo ti Grik tamo ti iga kalil kerekere unum. Tamo Koba Kristus a gago kalil qa Tamo Koba. Deqa a na tamo kalil Kristus metoqnsib pailyeqnub qaji naŋgi tulaŋ geregereinjreqnu. 13 Agi Qotei aqa anjam bei endegsi unu, “Tamo kalil Tamo Koba Kristus metoqnsib pailyeqnub qaji naŋgi a na oqas.”

14 Ariya naŋgi a qa naŋgo areqalo siŋgilatqasai di naŋgi kiersib a metosib pailyqab? Naŋgi aqa anjam quqwasai di naŋgi kiersib a qa naŋgo areqalo siŋgilatqab? Anjam palonto tamo naŋgi Qotei aqa anjam palontqasai di naŋgi kiersib aqa anjam quqwab? 15 Qotei na anjam palonto tamo naŋgi qariŋnjrqasai di naŋgi kiersib aqa anjam palontqab? Agi Qotei aqa anjam bei nami endegsib neŋgreŋyeb unu, “Tamo naŋgi Qotei aqa anjam bole mare mare laqnub deqa tamo uŋgasari naŋgi unjroqnsib tulaŋ areboleboleinjreqnu.”

Israel naŋgi Qotei aqa anjam bole osib dauryosai

16 Ariya tamo uŋgasari kalil naŋgi anjam bole di qusib dauryosaieqnub. Agi naŋgi qa Aisaia a nami endegsi marej, “O Tamo Koba, tamo yai naŋgi gago anjam di qusib naŋgo areqaloq di siŋgilateqnub?” 17 Ariya was qu, iga qalie, iga Qotei aqa anjam di quoqnsim gago areqaloq di siŋgilateqnum. Anjam iga queqnum qaji di Kristus aqa medabuq na branteqnu.

18 Ariya e niŋgi endegsi nenemŋgwai. Israel naŋgi Kristus aqa anjam bole di nami quosai kio? Sai. Naŋgi quoqneb. Agi Qotei aqa anjam endegsi unu, “Qotei aqa anjam di gilsiq sawa sawa kalil keretonaqa tamo uŋgasari kalil naŋgi quoqneb.” 19 Deqa e niŋgi olo nenemŋgwai. Israel naŋgi anjam di aqa utru poinjrosai kio? Sai. Naŋgi poinjrej. Agi Moses a nami Qotei aqa anjam bei endegsi marej, “Sawa bei bei qaji naŋgi ijo ŋamgalaq di ñam saiqoji. Naŋgi tamo bolesai. Naŋgi e qa qaliesai dego. Ariya e na naŋgi eleŋosiy ijo kumbra dena e na Israel naŋgo are ugetetnjrit naŋgi ŋiriŋqab.” 20 Agi Aisaia a dego nami anjam endegsi siŋgila na marej, “Tamo naŋgi e qa ŋamosaioqneb qaji naŋgi e itbeb. Tamo naŋgi e qa marosaioqneb qaji naŋgi qa e brantonam naŋgi e nubeb.” 21 Ariya Aisaia a Israel naŋgi qa are qalsiq endegsi marej, “E bati gaigai naŋgi qa tariŋoqnsim metnjreqnam naŋgi olo diqoqnsib ijo anjam gotraŋyeqnub.”