Rom 5 | BOJ | STEP | Ariya iga Yesus qa gago areqalo siŋgilatem deqa Qotei na iga tamo bole une saiqoji qa mergej. Gago Tamo Koba Yesus Kristus a jeu kobotej deqa iga Qotei ombla geregere unum.

Romans 5

Qotei na iga tamo bole une saiqoji qa mergej

1 Ariya iga Yesus qa gago areqalo siŋgilatem deqa Qotei na iga tamo bole une saiqoji qa mergej. Gago Tamo Koba Yesus Kristus a jeu kobotej deqa iga Qotei ombla geregere unum. 2 Yesus a na iga tamo uŋgasari a qa gago areqalo siŋgilateqnum qaji gam waqtetgej deqa Qotei a iga qa are tulaŋ boleiyonaqa iga eleŋej. Qotei na kumbra di iga egej deqa bini iga kumbra di osim tigelejunum. Deqa bini iga Qotei na laŋ qureq osi oqsim dia iga a ombla geregere sqajqa deqa tariŋeqnum. Iga deqa tulaŋ areboleboleigeqnaq unum. 3 Ariya iga deqa segi areboleboleigosai. Iga gulube oqnsim unum deqa ti areboleboleigeqnu. Di kiyaqa? Iga qalieonum, gulube dena gago are siŋgilatetgeqnaqa iga siŋgila na tigeleqnum. 4 Iga siŋgila na tigeleqnum deqa gulube gagoq beqnaqa iga na gotraŋyeqnum. Iga gulube gotraŋyoqnsim deqa iga Qotei qa gago areqalo siŋgilatoqnsim a na iga laŋ qureq osim oqwajqa deqa tariŋoqnsim unum. 5 Ariya iga laŋa tariŋosaieqnum. Qotei na aqa Mondor Bole iga egej deqa Mondor dena aqa qalaqalaiyo kumbra gago are miligiq di atej unu.

6 Iga gago segi jejamu aqaryaiyqa keresai sonamqa Kristus a iga tamo uŋgasari kumbra uge uge yeqnum qaji iga qa osiq moiej. Bati Qotei a nami atej qaji di brantonaqa a iga qa moiej. 7 Bole, tamo bei a tamo bole bei aqaryaiyqa osim moiqasai. Ariya tamo tulaŋ boledamu bei soqnim a qa kio tamo bei a are siŋgilatosim moiqas. 8 Ariya iga une tamo sonamqa Kristus a iga qa moiej. Aqa kumbra dena Qotei na iga osorgwo, a iga tulaŋ qalaqalaigeqnu. 9 Kristus a moinaqa aqa leŋ aisiq gago une kobotetgej deqa bini Qotei a iga tamo bole une saiqoji qa mergeqnu. Deqa iga bole qalieonum, mondoŋ Qotei a Kristus aqa baŋ na iga oqas. Yim aqa minjiŋ oqwa batiamqa iga so bole sqom. 10 Iga Qotei ti jeu sonamqa aqa Ŋiri a jeu kobotqa marsiq moiej. Deqa aqa wau dena iga bini Qotei ombla geregere unum. Ariya Qotei aqa Ŋiri a olo ŋambile unu. Deqa iga bole qalieonum, aqa ŋambile dena Qotei na iga olo oqas. 11 Anjam bei dego unu. Gago Tamo Koba Yesus Kristus aqa siŋgila na iga Qotei ombla geregere unum deqa iga tulaŋ areboleboleigeqnu.

Adam a moio qa utru. Ariya Yesus a ŋambile qa utru

12 Iga qalie, tamo qujai Adam a une atej. Aqa une dena aqa leŋ kalil naŋgi dego une eleŋeb. Adam a une ti deqa a moiej. Aqa leŋ naŋgi dego aqa une osib kalil moreŋeb. 13 Dal anjam a bosaisonaqa bati deqa tamo kalil naŋgi une atsib laqneb. Ariya dal anjam sosai deqa Qotei a naŋgo une geregere ubtqa keresai. 14 Ariya Adam a soqnej dena bosi bosiq Moses aqa bati qa tamo kalil naŋgi moreŋoqneb. Adam a Qotei aqa dal anjam qujai gotraŋyej. Ariya Adam aqa une di tamo bei na yosai. Adam a segi na yej. Ariya tamo kalil naŋgi dego Adam aqa une di osib moreŋeb.

Adam a Kristus bunuqna bqas qaji a sigitej. 15 Ariya Adam aqa une qujai de ti Qotei a iga qa are tulaŋ boleiyeqnu aqa kumbra de ti ombla kerekere sai. Tamo qujai Adam a une atej dena tamo gargekoba naŋgi moreŋoqneb. Ariya Qotei a tamo gargekoba naŋgi qa are tulaŋ boleiyeqnu aqa kumbra dena moio kobotej. Deqa iga bole qalieonum, tamo qujai Yesus Kristus a tamo gargekoba naŋgi qa are boleiyej aqa kumbra di tulaŋ boledamu. Qotei na iga Yesus laŋa egej awai saiqoji. 16 Qotei na iga Yesus laŋa egej aqa kumbra de ti Adam aqa une ti ombla kerekere sai. Adam a une qujai yej dena Qotei na tamo uŋgasari naŋgi une enjrsiqa minjrej, “Niŋgi une ti deqa niŋgi awai uge oqab.” Ariya Qotei na iga Yesus laŋa egej aqa kumbra di aqa utru agiende. Tamo uŋgasari naŋgi une gargekoba yeqnabqa Qotei a naŋgi qa olo are tulaŋ boleiyonaqa naŋgi tamo bole une saiqoji qa minjrej. 17 Tamo qujai Adam a Qotei aqa dal anjam gotraŋyej. Aqa une dena tamo kalil naŋgi moreŋeb. Ariya Qotei a iga qa are boleiyonaqa iga Yesus laŋa egej aqa kumbra dena moio aqa siŋgila tulaŋ buŋyosiqa kobaqujaej. Deqa iga bole qalieonum, Qotei a tamo naŋgi qa are boleiyimqa naŋgi kalil aqa ŋamgalaq di tamo bole une saiqoji sosibqa naŋgi tamo qujai Yesus Kristus aqa wau na ŋambile osib mandor kokba gaigai sqab.

18 Iga Yesus aqa wau deqa geregere are qaloqnqom. Tamo qujai Adam a dal anjam gotraŋyej. Aqa une dena Qotei na iga tamo uŋgasari kalil une ti qa mergej. Dego kere tamo qujai Kristus a kumbra bole tiŋtiŋ yej. Qotei a deqa are qalsiqa iga kalil tamo bole une saiqoji qa mergsiqa ŋambile egej. 19 Tamo qujai Adam a Qotei aqa anjam gotraŋyej. Aqa kumbra dena tamo uŋgasari gargekoba naŋgi dego une eleŋeb. Dego kere tamo qujai Kristus a Qotei aqa anjam dauryej. Aqa kumbra dena tamo uŋgasari gargekoba naŋgi tamo bole une saiqoji sqab.

20 Tamo naŋgi nami dal anjam eb bati deqa naŋgi dal anjam tulaŋ koba gotraŋyoqneb. Naŋgi une tulaŋ gargekoba yoqneb ariya Qotei a olo naŋgi qa are tulaŋ boleiyoqnej. 21 Une aqa kumbra na moio babtej deqa une na iga siŋgila na taqatgesoqnej. Ariya bini Qotei a iga qa are tulaŋ boleiyeqnu aqa kumbra dena iga olo taqatgejunu. Gago Tamo Koba Yesus Kristus aqa wau na Qotei a iga qa are tulaŋ boleiyoqnsiqa iga tamo bole une saiqoji qa mergeqnu. Kumbra dena iga ŋambile gaigai sqom.