1Sa 31 | CopSahBible2 | STEP | ⲛⲁⲗⲗⲟⲫⲩⲗⲟⲥ ⲇⲉ ⲁⲩⲡⲟⲗⲉⲙⲉⲓ ⲙⲛ ⲡ ⲓ︤ⲏ︦ⲗ︥ ⲁⲩⲱ ⲛⲣⲱⲙⲉ ⲙⲡ ⲓ︤ⲏ︦ⲗ︥ ⲁⲩϭⲱⲧⲡ ϩⲁ ⲡϩⲟ ⲛⲛⲁⲗⲗⲟⲫⲩⲗⲟⲥ ⲁⲩϩⲉ ⲉⲩϣⲟⲟϭⲉ ϩⲙ ⲡⲧⲟⲟⲩ ⲛⲅⲉⲗⲃⲟⲩⲉ

1 Samuel 31

1 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲡⲟⲗⲉⲙⲉⲓ ⲙⲛ ⲡⲓ︤ⲏ︦ⲗ︥ ⲁⲩⲱ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩϭⲱⲧⲡ ϩⲁ ⲡϩⲟ ⲛⲛⲁⲗⲗⲟⲫⲩⲗⲟⲥ ⲁⲩϩⲉ ⲉⲩϣⲟⲟϭⲉ ϩⲙ ⲡⲧⲟⲟⲩ ⲛⲅⲉⲗⲃⲟⲩⲉ 2 ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲕⲱⲧⲉ ⲉⲥⲁⲟⲩⲗ ⲁⲩⲱ ⲉⲛⲉϥϣⲏⲣⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲣⲱⲣϩⲧ ⲛⲓⲱⲛⲁⲑⲁⲛ ⲙⲛ ⲁⲙⲓⲛⲁⲇⲁⲃ ⲙⲛ ⲙⲉⲗⲭⲓⲥⲁ ⲛϣⲏⲣⲉ ⲛⲥⲁⲟⲩⲗ 3 ⲁⲩⲱ ⲡⲡⲟⲗⲉⲙⲟⲥ ⲁϥⲛϣⲟⲧ ⲉϫⲛ ⲥⲁⲟⲩⲗ ⲁⲩϩⲉ ⲉⲣⲟϥ ⲛϭⲓ ⲛⲉⲧⲛⲉϫⲥⲟⲧⲉ ⲁⲩⲛⲉϫⲥⲟⲧⲉ ⲉⲣⲟϥ ⲁⲩⲣⲁϩⲧϥ ⲉⲡⲥⲉⲗⲉⲡⲓⲛ ⲛϩⲏⲧϥ 4 ⲡⲉϫⲉⲥⲁⲟⲩⲗ ⲙⲡⲉⲧϥⲓ ⲛⲛⲉϥⲥⲕⲉⲩⲏ ϫⲉ ⲧⲱⲕⲙ ⲛⲧⲉⲕⲥⲏϥⲉ ⲛⲅⲕⲟⲟⲛⲥⲧ ⲛϩⲏⲧⲥ ⲙⲏⲡⲱⲥ ⲛⲥⲉⲉⲓ ⲛϭⲓ ⲛⲉⲓⲁⲧⲥⲃⲃⲉ ⲛⲥⲉⲙⲟⲟⲩⲧ ⲁⲩⲱ ⲛⲥⲉⲥⲱⲃⲉ ⲛⲥⲱⲓ ⲡⲉⲧϥⲓ ⲇⲉ ⲛⲛⲉϥⲥⲕⲉⲩⲏ ⲙⲡⲉϥⲟⲩⲱϣ ⲉⲙⲟⲟⲩⲧϥ ϫⲉ ⲁϥⲣϩⲟⲧⲉ ⲉⲙⲁⲧⲉ ⲁⲩⲱ ⲥⲁⲟⲩⲗ ⲁϥϫⲓ ⲛⲧⲉϥⲥⲏϥⲉ ⲁϥⲃⲟϭϥ ⲉϫⲱⲥ 5 ⲛⲧⲉⲣⲉϥⲛⲁⲩ ⲇⲉ ⲛϭⲓ ⲡⲉⲧϥⲓ ⲛⲛⲉϥⲥⲕⲉⲩⲏ ϫⲉ ⲁⲥⲁⲟⲩⲗ ⲙⲟⲩ ⲛⲧⲟϥ ϩⲱⲱϥ ⲁϥⲃⲟϫϥ ⲉϫⲛ ⲧⲉϥⲥⲏϥⲉ ⲁϥⲙⲟⲩ ⲛⲙⲙⲁϥ 6 ⲁⲩⲱ ⲥⲁⲟⲩⲗ ⲁϥⲙⲟⲩ ⲙⲛ ⲡⲉϥϣⲟⲙⲛⲧ ⲛϣⲏⲣⲉ ⲁⲩⲱ ⲡⲉⲧϥⲓ ⲛⲛⲉϥⲥⲕⲉⲩⲏ ⲁⲩⲱ ⲛⲕⲉⲣⲱⲙⲉ ⲧⲏⲣⲟⲩ ⲉⲧⲛⲙⲙⲁϥ ⲁⲩⲙⲟⲩ ⲙⲡⲉϩⲟⲟⲩ ⲉⲧⲙⲙⲁⲩ 7 ⲁⲩⲛⲁⲩ ⲇⲉ ⲛϭⲓ ⲛⲉⲣⲱⲙⲉ ⲙⲡⲓ︤ⲏ︦ⲗ︥ ⲛⲉⲧϩⲓⲡⲉⲕⲣⲟ ⲙⲡⲉⲓⲁ ⲁⲩⲱ ⲛⲉⲧϩⲓⲡⲉⲕⲣⲟ ⲙⲡⲓⲟⲣⲇⲁⲛⲏⲥ ϫⲉ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩϭⲱⲧⲡ ⲁⲩⲱ ϫⲉ ⲁϥⲙⲟⲩ ⲛϭⲓ ⲥⲁⲟⲩⲗ ⲙⲛ ⲛⲉϥϣⲏⲣⲉ ⲁⲩⲕⲁⲛⲉⲩⲡⲟⲗⲓⲥ ⲉⲃⲟⲗ ⲁⲩⲡⲱⲧ ϩⲱⲟⲩ ⲁⲩⲉⲓ ⲛϭⲓ ⲛⲁⲗⲗⲟⲫⲩⲗⲟⲥ ⲁⲩⲟⲩⲱϩ ⲛϩⲏⲧⲟⲩ 8 ⲁⲥϣⲱⲡⲉ ⲇⲉ ⲙⲡⲉϥⲣⲁⲥⲧⲉ ⲁⲩⲉⲓ ⲛϭⲓ ⲛⲁⲗⲗⲟⲫⲩⲗⲟⲥ ⲁⲩⲃⲱϣ ⲛⲛⲉⲧⲙⲟⲟⲩⲧ ⲁⲩϩⲉ ⲇⲉ ⲉⲥⲁⲟⲩⲗ ⲙⲛ ⲡⲉϥϣⲟⲙⲛⲧ ⲛϣⲏⲣⲉ ⲉⲩⲣⲁϩⲧ ϩⲙ ⲡⲧⲟⲟⲩ ⲛⲕⲉⲗⲃⲟⲩⲉ 9 ⲁⲩⲡⲟⲟⲛⲉϥ ⲁⲩⲃⲟϣϥ ⲛⲛⲉϥⲥⲕⲉⲩⲏ ⲁⲩϫⲟⲟⲩ ⲇⲉ ⲉⲃⲟⲗ ⲙⲡⲉⲩⲕⲱⲧⲉ ⲧⲏⲣϥ ⲙⲛ ⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲉⲩⲧⲁϣⲉⲟⲉⲓϣ ⲛⲛⲉⲩⲉⲓⲇⲱⲗⲟⲛ ⲙⲛ ⲡⲉⲩⲙⲏⲏϣⲉ 10 ⲛⲉϥⲥⲕⲉⲩⲏ ⲇⲉ ⲁⲩⲕⲁⲁⲩ ϩⲙ ⲡⲉⲩⲙⲁ ⲛⲉⲓⲇⲱⲗⲟⲛ ⲁⲩⲱ ⲡⲉϥⲥⲱⲙⲁ ⲁⲩⲟⲃⲧϥ ⲉⲡⲥⲟⲃⲧ ⲛⲃⲁⲓⲑⲥⲁⲛ 11 ⲛⲉⲧⲟⲩⲏϩ ⲇⲉ ϩⲛ ⲓⲁⲃⲓⲥ ⲛⲧⲉ ⲅⲁⲗⲁⲁⲇⲓⲧⲓⲥ ⲁⲩⲥⲱⲧⲙ ⲉⲛⲉⲛⲧⲁⲛⲁⲗⲗⲟⲫⲩⲗⲟⲥ ⲁⲁⲩ ⲛⲥⲁⲟⲩⲗ 12 ⲁⲩⲧⲱⲟⲩⲛ ⲛϭⲓ ⲛⲣⲱⲙⲉ ⲧⲏⲣⲟⲩ ⲛϫⲱⲱⲣⲉ ⲁⲩⲙⲟⲟϣⲉ ⲛⲧⲉⲩϣⲏ ⲧⲏⲣⲥ ⲁⲩⲱ ⲁⲩϫⲓ ⲙⲡⲥⲱⲙⲁ ⲛⲥⲁⲟⲩⲗ ⲁⲩⲱ ⲡⲥⲱⲙⲁ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲉⲃⲟⲗ ϩⲙ ⲡⲥⲟⲃⲧ ⲛⲃⲁⲓⲑⲥⲁⲛ ⲁⲩⲉⲛⲧⲟⲩ ⲉϩⲣⲁⲓ ⲉⲓⲁⲃⲓⲥ ⲁⲩⲱ ⲁⲩⲣⲟⲕϩⲟⲩ ϩⲙ ⲡⲙⲁ ⲉⲧⲙⲙⲁⲩ 13 ⲁⲩⲧⲟⲙⲥⲟⲩ ϩⲁ ⲧⲥⲓϯⲱϩⲉ ⲉⲧϩⲛⲓⲁⲃⲓⲥ ⲁⲩⲱ ⲁⲩⲛⲏⲥⲧⲉⲩⲉ ⲛⲥⲁϣϥ ⲛϩⲟⲟⲩ