2 Samuel 10
1ⲁⲥϣⲱⲡⲉ ⲇⲉ ⲙⲛⲛⲥⲁ ⲛⲁⲓ ⲁϥⲙⲟⲩ ⲛϭⲓ ⲡⲣⲣⲟ ⲛⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲁϥⲣⲣⲣⲟ ⲛϭⲓ ⲁⲛⲛⲱⲛ ⲡⲉϥϣⲏⲣⲉ ⲉⲡⲉϥⲙⲁ 2ⲡⲉϫⲉⲇ︤ⲁ︦ⲇ︥ ϫⲉ ϯⲛⲁⲉⲓⲣⲉ ⲛⲟⲩⲛⲁ ⲙⲛ ⲁⲛⲛⲱⲛ ⲡϣⲏⲣⲉ ⲛⲛⲁⲁⲁⲥ ⲕⲁⲧⲁ ⲑⲉ ⲛⲧⲁⲡⲉϥⲉⲓⲱⲧ ⲉⲓⲣⲉ ⲛⲙⲙⲁⲓ ⲛⲟⲩⲛⲁ ⲁⲩⲱ ⲁϥϫⲟⲟⲩ ⲛϭⲓ ⲇⲁⲩⲉⲓⲇ ⲉⲥⲗⲥⲱⲗϥ ⲉⲃⲟⲗ ϩⲓⲧⲟⲟⲧⲟⲩ ⲛⲛⲉϥϩⲙϩⲁⲗ ⲉϫⲙ ⲡⲉϥⲉⲓⲱⲧ ⲁⲩⲉⲓ ⲇⲉ ⲛϭⲓ ⲛϩⲙϩⲁⲗ ⲛⲇⲁⲩⲉⲓⲇ ⲉϩⲣⲁⲓ ⲉⲡⲕⲁϩ ⲛⲁⲙⲙⲱⲛ 3ⲁⲩⲱ ⲛⲉⲁⲣⲭⲱⲛ ⲛⲛⲉϣⲏⲣⲉ ⲛⲁⲙⲙⲱⲛ ⲡⲉϫⲁⲩ ⲉϩⲟⲩⲛ ϩⲛ ⲁⲛⲛⲱⲛ ⲡⲉⲩϫⲟⲉⲓⲥ ϫⲉ ⲙⲏ ⲉⲃⲟⲗ ϫⲉ ⲉⲣⲉⲇⲁⲩⲉⲓⲇ ⲟⲩⲱϣ ⲉϯⲉⲟⲟⲩ ⲙⲡⲉⲕⲉⲓⲱⲧ ⲙⲡⲉⲕⲙⲧⲟ ⲉⲃⲟⲗ ⲁϥⲧⲛⲛⲟⲟⲩ ⲛⲁⲕ ⲛⲛⲉⲧⲛⲁⲥⲗⲥⲱⲗⲕ ⲁⲗⲗⲁ ⲛⲧⲁϥⲧⲛⲛⲟⲟⲩⲥⲉ ⲛⲧⲟϥ ϫⲉⲕⲁⲥ ⲉⲩⲉⲙⲉϣⲧⲧⲡⲟⲗⲓⲥ ⲛⲥⲉϯϩⲧⲏⲩ ⲉⲣⲟⲥ ⲇ︤ⲁ︦ⲇ︥ ⲛⲧⲟϥ ϫⲉⲕⲁⲥ ⲉⲩⲉⲙⲉϣⲧⲧⲡⲟⲗⲓⲥ ⲛⲥⲉϯϩⲧⲏⲩ ⲉⲣⲟⲥ ⲇ︤ⲁ︦ⲇ︥ ⲇⲉ ⲁϥⲧⲛⲛⲟⲟⲩ ⲛⲛⲉϥϩⲙϩⲁⲗ ϣⲁⲣⲟⲕ ⲉϫⲓϫⲛⲓⲧ ⲛⲧⲡⲟⲗⲓⲥ ⲉϯϩⲧⲏⲩ ⲉⲣⲟⲥ 4ⲁⲩⲱ ⲁⲛⲛⲱⲛ ⲁϥϫⲓ ⲛⲛⲉϩⲙϩⲁⲗ ⲛⲇ︤ⲁ︦ⲇ︥ ⲁϥϩⲉⲕⲉⲛⲉⲩⲙⲟⲣⲧ ⲁⲩⲱ ⲁϥϣⲉϥⲛⲉⲩϩⲟⲉⲓⲧⲉ ⲉⲧⲉⲩⲡⲁϣⲉ ϣⲁ ⲉϩⲣⲁⲓ ⲉⲛⲉⲩⲓⲥⲭⲓⲱⲛ ⲁϥⲟⲩⲟⲟⲧⲟⲩ ⲉⲃⲟⲗ 5ⲁⲩϫⲓⲡⲟⲩⲱ ⲇⲉ ⲛⲇ︤ⲁ︦ⲇ︥ ⲉⲧⲃⲉ ⲛⲉϥⲣⲱⲙⲉ ⲁⲩⲱ ⲁϥϫⲟⲟⲩ ⲉⲣⲁⲧⲟⲩ ⲉⲃⲟⲗ ϫⲉ ⲛⲣⲱⲙⲉ ⲁⲩⲥⲟϣⲟⲩ ⲉⲙⲁⲧⲉ ⲉⲣⲉⲡⲣⲣⲟ ϫⲱ ⲙⲙⲟⲥ ⲉⲣⲟⲟⲩ ϫⲉ ϩⲙⲟⲟⲥ ⲛⲏⲧⲛ ϩⲛ ϩⲓⲉⲣⲓⲭⲱ ϣⲁⲛⲧⲉⲛⲉⲧⲛⲙⲟⲣⲧ ⲣⲱⲧ ⲛⲧⲉⲧⲛⲕⲉⲧⲧⲏⲩⲧⲛ ϣⲁⲣⲟⲓ 6ⲁⲩⲱ ⲛⲧⲉⲣⲟⲩⲛⲁⲩ ⲛϭⲓ ⲛⲉϣⲏⲣⲉ ⲛⲁⲙⲙⲱⲛ ϫⲉ ⲁⲩϫⲓϣⲓⲡⲉ ⲛϭⲓ ⲛⲁⲡⲗⲁⲟⲥ ⲛⲇⲁⲩⲉⲓⲇ ⲁⲩϫⲟⲟⲩ ⲛϭⲓ ⲛϣⲏⲣⲉ ⲛⲁⲙⲙⲱⲛ ⲁⲩⲙⲓⲥⲑⲟⲩ ⲛⲧⲥⲩⲣⲓⲁ ⲙⲛ ϩⲣⲱⲟⲃ ⲉⲩⲛⲁⲣⲧⲃⲁ ⲥⲛⲁⲩ ⲛⲣⲙⲣⲁⲧⲟⲩ ⲁⲩⲱ ⲡⲣⲣⲟ ⲙⲡⲁⲙⲁⲗⲏⲕ ⲉⲩⲛⲁⲣⲙⲛⲧⲏ ⲛϣⲉ ⲛⲣⲱⲙⲉ ⲁⲩⲱ ⲛⲁⲉⲓⲥⲧⲱϥ ⲉⲩⲛⲁⲣⲙⲛⲧⲥⲛⲟⲟⲩⲥ ⲛϣⲉ ⲛⲣⲱⲙⲉ 7ⲇⲁⲩⲉⲓⲇ ⲇⲉ ⲁϥϫⲟⲟⲩ ⲛⲓⲱⲁⲃ ⲛⲧⲉⲣⲉϥⲥⲱⲧⲙ ⲙⲛ ⲡⲉϥⲙⲏⲏϣⲉ ⲧⲏⲣϥ ⲛⲇⲩⲛⲁⲧⲟⲥ ⲧⲏⲣⲟⲩ 8ⲁⲩⲉⲓ ⲇⲉ ⲉⲃⲟⲗ ⲛϭⲓ ⲛⲉϣⲏⲣⲉ ⲛⲁⲙⲙⲱⲛ ⲁⲩⲥⲉⲣⲙⲗⲁϩ ⲉⲃⲟⲗ ⲉⲡⲡⲟⲗⲉⲙⲟⲥ ϩⲁⲧⲛ ⲡⲣⲟ ⲛⲧⲡⲩⲗⲏ ⲛⲧⲥⲩⲣⲓⲁ ⲛⲥⲟⲩⲃⲁ ⲙⲛ ϩⲣⲱⲟⲃ ⲙⲛ ⲓⲥⲧⲱⲃ ⲛⲁⲙⲁⲗⲏⲕ ⲇⲉ ⲙⲁⲩⲁⲁⲩ ⲛⲉⲩϩⲛⲧⲥⲱϣⲉ 9ⲛⲧⲉⲣⲉϥⲛⲁⲩ ⲇⲉ ⲛϭⲓ ⲓⲱⲁⲃ ϫⲉ ⲁⲩⲁϩⲉⲣⲁⲧⲟⲩ ⲉⲣⲟϥ ⲛϩⲟ ϩⲓ ϩⲟ ⲉⲡⲟⲗⲉⲙⲉⲓ ⲛⲙⲙⲁϥ ⲉⲡⲥⲁ ⲡⲥⲁ ⲁϥⲥⲱⲡⲧ ⲉⲃⲟⲗ ϩⲛ ⲛⲉϩⲉⲣϣⲓⲣⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲁⲩⲁϩⲉⲣⲁⲧⲟⲩ ⲟⲩⲃⲉ ⲧⲥⲩⲣⲓⲁ 10ⲡⲕⲉⲥⲉⲉⲡⲉ ⲇⲉ ⲙⲡⲗⲁⲟⲥ ⲁϥⲧⲁⲁⲩ ⲉϩⲣⲁⲓ ⲉⲧϭⲓϫ ⲙⲡⲉϥⲥⲟⲛ ⲁⲩⲁϩⲉⲣⲁⲧⲟⲩ ϩⲱⲟⲩ ⲟⲩⲃⲉ ⲛϣⲏⲣⲉ ⲛⲁⲙⲙⲱⲛ 11ⲉⲣⲉⲓⲱⲁⲃ ϫⲱ ⲙⲙⲟⲥ ⲛⲛⲁⲡⲉϥⲥⲟⲛ ϫⲉ ⲉⲣϣⲁⲛⲧⲥⲩⲣⲓⲁ ϭⲙϭⲟⲙ ⲉϩⲟⲩⲛ ⲉⲣⲟⲓ ⲉⲧⲉⲧⲛⲛⲉϯ ⲛⲧⲟⲟⲧⲧⲏⲩⲧⲛ ⲛⲙⲙⲁⲓ ⲉⲣϣⲁⲛⲛⲉⲣⲱⲙⲉ ⲇⲉ ⲛⲁⲙⲙⲱⲛ ϭⲙϭⲟⲙ ⲉϩⲟⲩⲛ ⲉⲣⲟⲕ ⲁⲛⲟⲛ ϩⲱⲱⲛ ⲧⲛⲛⲁϯ ⲛⲧⲟⲟⲧⲛ ⲛⲙⲙⲁⲕ 12ⲧⲱⲕ ⲛⲧⲉⲧⲛϭⲙϭⲟⲙ ⲉⲧⲃⲉ ⲡⲉⲛⲗⲁⲟⲥ ⲁⲩⲱ ⲉⲧⲃⲉ ⲙⲡⲟⲗⲓⲥ ⲙⲡⲉⲛⲛⲟⲩⲧⲉ ⲁⲩⲱ ⲡϫⲟⲉⲓⲥ ϥⲛⲁⲉⲓⲣⲉ ⲙⲡⲁⲅⲁⲑⲟⲛ ⲛⲁϩⲣⲁϥ 13ⲓⲱⲁⲃ ⲇⲉ ⲙⲛ ⲡⲗⲁⲟⲥ ⲉⲧⲛⲙⲙⲁϥ ⲁⲩϯ ⲙⲡⲉⲩⲟⲩⲟⲓ ⲉϩⲟⲩⲛ ⲉⲡⲟⲗⲉⲙⲉⲓ ⲙⲛ ⲧⲥⲩⲣⲓⲁ ⲁⲩⲱ ⲁⲩϭⲱⲧⲡ ϩⲁ ⲧⲉϥϩⲏ 14ⲛϣⲏⲣⲉ ⲇⲉ ϩⲱⲟⲩ ⲛⲁⲙⲙⲱⲛ ⲛⲧⲉⲣⲟⲩⲛⲁⲩ ϫⲉ ⲁⲧⲥⲩⲣⲓⲁ ϭⲱⲧⲡ ⲁⲩⲗⲟ ϩⲱⲟⲩ ϩⲁ ⲡϩⲟ ⲛⲁⲃⲓⲥⲁ ⲁⲩⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲓⲱⲁⲃ ϩⲱⲱϥ ⲁϥⲕⲧⲟϥ ⲉⲃⲟⲗ ϩⲛ ⲛⲉϣⲏⲣⲉ ⲛⲁⲙⲙⲱⲛ ⲁϥⲓ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ 15ⲧⲥⲩⲣⲓⲁ ⲇⲉ ⲛⲧⲉⲣⲉⲥⲛⲁⲩ ϫⲉ ⲁⲩϭⲱⲧⲡ ϩⲓⲑⲏ ⲙⲡⲓ︤ⲏ︦ⲗ︥ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲉⲣⲏⲩ 16ⲁⲩⲱ ⲁϥϫⲟⲟⲩ ⲛϭⲓ ⲁⲇⲣⲁⲁⲍⲁⲣ ⲁϥⲥⲱⲟⲩϩ ⲉϩⲟⲩⲛ ⲛⲧⲥⲩⲣⲓⲁ ⲛⲉⲧϩⲓⲡⲉⲕⲣⲟ ⲙⲡⲓⲟⲣⲇⲁⲛⲏⲥ ⲭⲁⲗⲁⲙⲁⲕ ⲁⲩⲱ ⲁⲩⲉⲓ ⲉⲑⲁⲓⲗⲁⲙ ⲥⲱⲃⲁⲕ ⲇⲉ ⲡⲁⲣⲭⲱⲛ ⲛⲧϭⲟⲙ ⲛⲁⲇⲣⲁⲁⲍⲁⲣ ⲛⲉϥⲙⲟⲟϣⲉ ϩⲓⲑⲏ ⲙⲙⲟⲟⲩ 17ⲁⲩⲧⲁⲙⲉⲇ︤ⲁ︦ⲇ︥ ⲇⲉ ⲁⲩⲱ ⲁϥⲥⲱⲟⲩϩ ⲉϩⲟⲩⲛ ⲙⲡⲓ︤ⲏ︦ⲗ︥ ⲧⲏⲣϥ ⲁϥϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲁϥⲓ ⲉϩⲣⲁⲓ ⲉⲁⲓⲗⲁⲙ ⲁⲧⲥⲩⲣⲓⲁ ⲁϩⲉⲣⲁⲧⲟⲩ ⲟⲩⲃⲉ ⲇⲁⲩⲉⲓⲇ ⲁⲩⲡⲟⲗⲉⲙⲉⲓ ⲛⲙⲙⲁϥ 18ⲁⲩⲱ ⲧⲥⲩⲣⲓⲁ ⲁⲥϭⲱⲧⲡ ϩⲓⲑⲏ ⲛⲇⲁⲩⲉⲓⲇ ⲁⲩⲱ ⲇⲁⲩⲉⲓⲇ ⲁϥⲙⲟⲩⲟⲩⲧ ⲉⲃⲟⲗ ϩⲛ ⲧⲥⲩⲣⲓⲁ ⲛϥⲧⲟⲟⲩ ⲛϣⲉ ⲛϩⲁⲣⲙⲁ ⲁⲩⲱ ϥⲧⲟⲟⲩ ⲛⲧⲃⲁ ⲛϩⲓⲡⲡⲉⲩⲥ ⲁⲩⲱ ⲥⲱⲃⲁⲗ ⲡⲁⲣⲭⲱⲛ ⲛⲧⲉϥϭⲟⲙ ⲁϥⲡⲁⲧⲁⲥⲥⲉ ⲙⲙⲟϥ ⲁϥⲙⲟⲩ ⲙⲡⲙⲁ ⲉⲧⲙⲙⲁⲩ 19ⲁⲩⲱ ⲛⲧⲉⲣⲟⲩⲛⲁⲩ ⲛϭⲓ ⲛⲣⲣⲱⲟⲩ ⲧⲏⲣⲟⲩ ⲛⲉⲧⲟ ⲛϩⲙϩⲁⲗ ⲛⲁⲇⲣⲁⲁⲍⲁⲣ ϫⲉ ⲁⲩϭⲱⲧⲡ ϩⲓⲑⲏ ⲙⲡⲓ︤ⲏ︦ⲗ︥ ⲁⲩⲡⲱⲧ ⲉⲣⲁⲧϥ ⲙⲡⲓ︤ⲏ︦ⲗ︥ ⲁⲩⲥⲙⲛⲇⲓⲁⲑⲏⲕⲏ ⲛⲙⲙⲁⲩ ⲁⲩⲣϩⲙϩⲁⲗ ⲛⲁⲩ ⲁⲩⲱ ⲛⲁⲧⲥⲩⲣⲓⲁ ⲁⲩⲣϩⲟⲧⲉ ⲉⲃⲱⲕ ⲛϫⲓⲛ ⲉⲡⲉⲓⲛⲁⲩ ⲉⲙⲓϣⲉ ⲉϫⲛ ⲛⲉϣⲏⲣⲉ ⲛⲁⲙⲙⲱⲛ
Copyright information for
CopSahBible2