2 Samuel 23

1ⲁⲩⲱ ⲛⲁⲓ ⲛⲉ ⲛⲉϣⲁϫⲉ ⲛⲇ︤ⲁ︦ⲇ︥ ⲛϩⲁⲉⲉⲩ ⲟⲩⲡⲓⲥⲧⲟⲥ ⲡⲉ ⲇ︤ⲁ︦ⲇ︥ ⲡϣⲏⲣⲉ ⲛⲓⲉⲥⲥⲁⲓ ⲁⲩⲱ ⲟⲩⲡⲓⲥⲧⲟⲥ ⲡⲉ ⲡⲣⲱⲙⲉ ⲡⲁⲓ ⲛⲧⲁⲡϫⲟⲉⲓⲥ ⲧⲟⲩⲛⲟⲥϥ ⲉϫⲙ ⲡⲉϥⲗⲁⲟⲥ ⲓⲁⲕⲱⲃ ⲁⲩⲱ ⲛⲉⲥⲱⲟⲩ ⲛⲉⲯⲁⲗⲙⲟⲥ ⲙⲡⲓ︤ⲏ︦ⲗ︥ 2ⲡⲉⲡ︤ⲛ︦ⲁ︥ ⲙⲡϫⲟⲉⲓⲥ ⲡⲉ ⲛⲧⲁϥϣⲁϫⲉ ϩⲣⲁⲓ ⲛϩⲏⲧ ⲁⲩⲱ ⲡⲉϥϣⲁϫⲉ ⲉϫⲙ ⲡⲁⲗⲁⲟⲥ 3ⲡⲉϫⲉ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲛⲧⲁϥϣⲁϫⲉ ⲛⲙⲙⲁⲓ ⲛϭⲓ ⲡⲉⲧⲣⲟⲉⲓⲥ ⲉⲡⲓ︤ⲏ︦ⲗ︥ ϫⲉ ⲧⲁⲩⲟ ⲛⲟⲩⲡⲁⲣⲁⲃⲟⲗⲏ ϩⲙ ⲡⲣⲱⲙⲉ ϫⲉ ⲉⲧⲉⲧⲛⲛⲁⲧⲁϫⲣⲟ ⲛⲁϣ ⲛϩⲉ ⲛⲑⲟⲧⲉ ⲙⲡⲉⲭ︤ⲣ︦ⲥ︥ 4ⲁⲩⲱ ϩⲙ ⲡⲟⲩⲟⲉⲓⲛ ⲙⲡⲛⲟⲩⲧⲉ ⲉⲧⲣⲉⲡⲣⲏ ϣⲁ ⲙⲡⲛⲁⲩ ⲛϩⲧⲟⲟⲩⲉ ⲁⲩⲱ ⲛⲑⲉ ⲛⲟⲩϯⲟⲩⲱ ⲉϩⲣⲁⲓ ϩⲙ ⲡⲕⲁϩ ⲉⲃⲟⲗ ϩⲙ ⲡϩⲟⲩⲙⲡⲏ 5ⲡⲁⲓ ⲅⲁⲣ ⲁⲛ ⲡⲉ ⲡⲁⲏⲓ ⲙⲛ ⲡⲛⲟⲩⲧⲉ ⲉⲧⲧⲁϫⲣⲏⲩ ⲟⲩⲇⲓⲁⲑⲏⲕⲏ ⲛϣⲁ ⲉⲛⲉϩ ⲁϥⲥⲙⲛⲧⲥ ⲛⲁⲓ ⲉⲥⲥⲃⲧⲱⲧ ⲉⲁϥϩⲁⲣⲉϩ ⲉⲣⲟⲥ ⲛⲟⲩⲟⲉⲓϣ ⲛⲓⲙ ϫⲉ ⲡⲁⲟⲩϫⲁⲓ ⲧⲏⲣϥ ⲁⲩⲱ ⲡⲁϣⲁϫⲉ ⲧⲏⲣϥ ⲉϥϣⲟⲟⲡ ϩⲙ ⲡϫⲟⲉⲓⲥ ϫⲉ ⲡⲡⲁⲣⲁⲛⲟⲙⲟⲥ ⲛⲁϯⲟⲩⲱ ⲁⲛ ⲉϩⲣⲁⲓ 6ϫⲉ ⲛⲧⲟⲟⲩ ⲧⲏⲣⲟⲩ ⲉⲩⲟ ⲛⲑⲉ ⲛⲟⲩϣⲟⲛⲧⲉ ⲉⲥⲛⲏϫ ⲉⲃⲟⲗ ϫⲉ ⲉⲩⲛⲁϭⲟⲡⲟⲩ ⲁⲛ ⲛϭⲓϫ 7ⲁⲩⲱ ⲡⲣⲱⲙⲉ ⲉϥⲛⲁϣⲉⲡϩⲓⲥⲉ ⲛϩⲏⲧⲟⲩ ⲁⲩⲱ ⲡⲡⲉⲛⲓⲡⲉ ⲧⲏⲣϥ ⲁⲩⲱ ⲡϣⲉ ⲛⲟⲩⲗⲟⲅⲭⲏ ϥⲛⲁⲣⲟⲕϩⲟⲩ ϩⲛ ⲟⲩⲥⲁⲧⲉ ⲁⲩⲱ ⲥⲉⲛⲁⲕⲱ ⲉϩⲣⲁⲓ ⲛⲛⲉⲩϣⲓⲡⲉ 8ⲛⲁⲓ ⲛⲉ ⲛⲉⲣⲁⲛ ⲛⲛⲉⲇⲩⲛⲁⲧⲟⲥ ⲛⲇ︤ⲁ︦ⲇ︥ ⲓⲉⲃⲟⲩⲥⲑⲉ ⲡⲉⲭⲁⲛⲁⲛⲁⲓⲟⲥ ⲛⲧⲟϥ ⲡⲉⲧⲟ ⲛⲁⲣⲭⲱⲛ ⲉϫⲙ ⲡϣⲟⲙⲛⲧ ⲛⲟⲩⲱⲛ ⲁⲩⲱ ⲁⲇⲓⲛⲱⲛ ⲡⲁⲍⲱⲛⲁⲓⲟⲥ ⲡⲁⲓ ⲅⲁⲣ ⲁϥⲧⲱⲕⲙ ⲛⲧⲉϥⲥⲏϥⲉ ⲉϫⲙ ⲡϣⲟⲙⲛⲧ ⲛϣⲉ ⲛⲣⲱⲙⲉ ⲁϥⲣⲁϩⲧⲟⲩ ⲛⲟⲩⲥⲟⲡ ⲛⲟⲩⲱⲧ 9ⲁⲩⲱ ⲙⲛⲛⲥⲱϥ ⲉⲗⲉⲁⲍⲁⲣ ⲡϣⲏⲛ ⲡⲥⲟⲛ ⲙⲡⲉϥⲉⲓⲱⲧ ⲡϣⲏⲣⲉ ⲛⲥⲱⲥⲓ ⲡⲉⲧϩⲙⲡϣⲟⲙⲛⲧ ⲛⲇⲩⲛⲁⲧⲟⲥ ⲛⲇⲁⲩⲉⲓⲇ ϩⲙ ⲡⲧⲣⲉϥⲛⲟϭⲛⲉϭ ⲛⲛⲁⲗⲗⲟⲫⲩⲗⲟⲥ ϩⲛ ϩⲣⲉⲥⲥⲁ ⲡⲙⲁ ⲛⲧⲁⲩⲥⲱⲟⲩϩ ⲉⲣⲟϥ ⲉⲡⲡⲟⲗⲉⲙⲟⲥ ⲁⲩⲱ ⲁϥⲱϣ ⲉⲃⲟⲗ ⲛϭⲓ ⲡⲣⲱⲙⲉ ⲙⲡⲓ︤ⲏ︦ⲗ︥ 10ⲛⲧⲟϥ ⲡⲉ ⲛⲧⲁϥⲧⲱⲟⲩⲛ ⲁⲩⲱ ⲁϥⲡⲁⲧⲁⲥⲥⲉ ⲛⲛⲁⲗⲗⲟⲫⲩⲗⲟⲥ ϣⲁⲛⲧⲉⲧⲉϥϭⲓϫ ϩⲓⲥⲉ ⲉϥϩⲓⲟⲩⲉ ⲛⲧⲉⲧⲉϥϭⲓϫ ⲧⲱϭⲉ ⲉϩⲟⲩⲛ ⲉⲧⲧⲱⲣⲉ ⲛⲧⲥⲏϥⲉ ⲁⲩⲱ ⲡϫⲟⲉⲓⲥ ⲁϥⲉⲓⲣⲉ ⲛⲟⲩⲛⲟϭ ⲛⲟⲩϫⲁⲓ ⲙⲡⲉϩⲟⲟⲩ ⲉⲧⲙⲙⲁⲩ ⲡⲗⲁⲟⲥ ⲇⲉ ⲛⲉϥϩⲓ ⲡⲁϩⲟⲩ ⲙⲙⲟϥ ⲉϣⲱⲗ 11ⲙⲛⲛⲥⲱϥ ⲥⲁⲙⲁⲓⲁ ⲡϣⲏⲣⲉ ⲛⲁⲥⲁ ⲡⲁⲣⲟⲩⲭⲁⲓⲟⲥ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉϩⲟⲩⲛ ⲉϫⲙ ⲡⲙⲁ ⲛϭⲱⲣϫ ⲛⲉⲥⲙⲙⲁⲩ ⲇⲉ ⲛϭⲓ ⲟⲩⲙⲉⲣⲓⲥ ⲛⲧⲉ ⲧⲥⲱϣⲉ ⲉⲥⲙⲉϩ ⲛⲁⲣϣⲓⲛ ⲁⲩⲱ ⲡⲗⲁⲟⲥ ⲁϥⲡⲱⲧ ϩⲁ ⲡϩⲟ ⲛⲛⲁⲗⲗⲟⲫⲩⲗⲟⲥ 12ⲁⲩⲱ ⲁϥⲁϩⲉⲣⲁⲧϥ ϩⲛ ⲧⲙⲏⲧⲉ ⲛⲧⲙⲉⲣⲓⲥ ⲁϥⲧⲟⲩϫⲟⲥ ⲁⲩⲱ ⲁϥⲡⲁⲧⲁⲥⲥⲉ ⲛⲛⲁⲗⲗⲟⲫⲩⲗⲟⲥ ⲁⲡϫⲟⲉⲓⲥ ⲉⲓⲣⲉ ⲛⲟⲩⲛⲟϭ ⲛⲟⲩϫⲁⲓ 13ⲁⲩⲱ ⲁⲩⲉⲓ ⲉϩⲣⲁⲓ ⲛϭⲓ ϣⲟⲙⲛⲧ ⲉⲃⲟⲗ ϩⲛ ⲧϣⲟⲙⲧⲉ ⲛⲁⲣⲭⲏ ⲏ ⲉⲃⲟⲗ ϩⲙ ⲡϣⲟⲙⲛⲧ ⲛⲉⲙⲗⲁϩ ⲁⲩⲉⲓ ⲉϩⲣⲁⲓ ⲉⲕⲁⲍⲱⲛ ⲉⲣⲱϥ ⲛⲇⲁⲩⲉⲓⲇ ⲉⲡⲉⲙϩⲁⲁⲩ ⲛⲟⲇⲟⲗⲗⲁⲙ ⲙⲛ ⲟⲩⲧⲁⲅⲙⲁ ⲛⲧⲉ ⲛⲁⲗⲗⲟⲫⲩⲗⲟⲥ ⲁⲩⲧⲁⲁⲩ ⲉϩⲣⲁⲓ ⲉⲡⲓⲁ ⲛⲛⲉϩⲣⲁⲫⲁⲉⲓⲛ 14ⲇ︤ⲁ︦ⲇ︥ ⲇⲉ ⲛⲉϥϣⲟⲟⲡ ϩⲛ ⲧⲡⲉⲣⲓⲟⲭⲏ ⲁⲩⲱ ⲡⲙⲏⲏϣⲉ ⲛⲧⲉ ⲛⲁⲗⲗⲟⲫⲩⲗⲟⲥ ⲛⲉϥϣⲟⲟⲡ ϩⲛ ⲃⲁⲓⲑⲗⲉⲉⲙ 15ⲇⲁⲩⲉⲓⲇ ⲇⲉ ⲁϥϣⲱⲡⲉ ϩⲛ ⲟⲩⲉⲡⲓⲑⲩⲙⲓⲁ ⲡⲉϫⲁϥ ϫⲉ ⲛⲓⲙ ⲡⲉⲧⲛⲁⲧⲥⲟⲓ ⲙⲙⲟⲟⲩ ⲉⲃⲟⲗ ϩⲙ ⲡϣⲏⲓ ⲉⲧϩⲛ ⲃⲏⲑⲗⲉⲉⲙ ⲡⲉⲧϩⲛ ⲧⲡⲩⲗⲏ ⲡⲙⲏⲏϣⲉ ⲇⲉ ⲛⲛⲁⲗⲗⲟⲫⲩⲗⲟⲥ ⲛⲉϥϩⲛⲃⲁⲓⲑⲗⲉⲉⲙ 16ⲁⲩⲱ ⲡϣⲟⲙⲛⲧ ⲛⲇⲩⲛⲁⲧⲟⲥ ⲁⲩⲛⲉϩⲛⲟⲩϩⲉ ⲉⲃⲟⲗ ⲁⲩϫⲱⲧⲉ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲁⲩⲙⲉϩⲙⲟⲟⲩ ⲉⲃⲟⲗ ϩⲙ ⲡϣⲏⲓ ⲛⲃⲁⲓⲑⲗⲉⲉⲙ ⲡⲉⲧϩⲛⲧⲡⲩⲗⲏ ⲁⲩⲱ ⲁⲩϫⲓ ⲙⲡⲟⲟⲩ ⲁⲩⲉⲓ ⲉⲣⲁⲧϥ ⲛⲇ︤ⲁ︦ⲇ︥ ⲙⲡⲉϥⲟⲩⲱϣ ⲉⲥⲟⲟϥ ⲁⲗⲗⲁ ⲁϥⲟⲩⲟⲧⲛⲉϥ ⲉⲃⲟⲗ ϩⲓⲑⲏ ⲙⲡϫⲟⲉⲓⲥ 17ⲉϥϫⲱ ⲙⲙⲟⲥ ϫⲉ ⲧⲟⲩϫⲟⲓ ⲡϫⲟⲉⲓⲥ ⲛⲛⲉⲥϣⲱⲡⲉ ⲙⲙⲟⲓ ⲉⲧⲣⲁⲣⲡⲁⲓ ⲉⲛⲉⲓⲉⲥⲱ ⲙⲡⲉⲥⲛⲟϥ ⲛⲛⲉⲓⲣⲱⲙⲉ ⲛⲁⲓ ⲛⲧⲁⲩⲛⲟⲩϫⲉ ⲛⲛⲉⲩⲯⲩⲭⲏ ⲉⲃⲟⲗ ⲁⲩⲡⲱⲧ ⲁⲩⲱ ⲙⲡⲉϥⲣϩⲛⲁϥ ⲉⲥⲟⲟϥ ⲛⲁⲓ ⲛⲉ ⲛⲧⲁⲩⲁⲁⲩ ⲛϭⲓ ⲡϣⲟⲙⲛⲧ ⲛⲇⲩⲛⲁⲧⲟⲥ 18ⲁⲩⲱ ⲁⲃⲓⲥⲁ ⲡⲥⲟⲛ ⲛⲓⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁ ⲛⲧⲟϥ ϩⲱⲱϥ ⲛⲉϥⲟ ⲛⲁⲣⲭⲱⲛ ϩⲙ ⲡϣⲟⲙⲛⲧ ⲁⲩⲱ ⲛⲧⲟϥ ⲡⲉⲛⲧⲁϥⲧⲟⲩⲛⲉⲥⲧⲉϥⲗⲟⲅⲭⲏ ⲉϫⲙ ⲡϣⲟⲙⲛⲧ ⲛϣⲉ ⲛⲣⲱⲙⲉ ⲁϥⲣⲁϩⲧⲟⲩ ⲁⲩⲱ ⲛⲉⲣⲉⲡⲉϥⲣⲁⲛ ϣⲟⲟⲡ ϩⲙ ⲡϣⲟⲙⲛⲧ 19ⲉϥⲱⲉⲓ ⲉⲃⲟⲗ ϩⲙ ⲡϣⲟⲙⲛⲧ ⲉⲧⲙⲙⲁⲩ ⲁⲩⲱ ⲁϥϣⲱⲡⲉ ⲛⲁⲩ ⲛⲁⲣⲭⲱⲛ ⲙⲡⲉϥⲉⲓ ⲉⲣⲁⲧⲟⲩ ⲙⲡⲉⲓϣⲟⲙⲛⲧ 20ⲁⲩⲱ ⲃⲁⲛⲁⲓⲁⲥ ⲡϣⲏⲣⲉ ⲛⲓⲱⲇⲁⲉ ⲉⲩⲣⲱⲙⲉ ⲡⲉ ⲛϫⲱⲱⲣⲉ ⲛⲧⲟϥ ⲉϥⲟϣ ⲛϩⲱⲃ ⲉϥⲱⲉⲓ ⲉⲃⲟⲗ ϩⲙ ⲡϣⲟⲙⲛⲧ ⲉⲃⲟⲗ ϩⲛ ⲕⲁⲃⲉⲥⲉⲏⲗ ⲁⲩⲱ ⲛⲧⲟϥ ⲡⲉⲛⲧⲁϥⲡⲁⲧⲁⲥⲥⲉ ⲙⲡϣⲏⲣⲉ ⲥⲛⲁⲩ ⲛⲁⲣⲓⲏⲗ ⲡⲉ ⲉⲃⲟⲗ ϩⲙ ⲙⲱⲁⲃ ⲁⲩⲱ ⲛⲧⲟϥ ⲡⲉⲛⲧⲁϥⲃⲱⲕ ⲉϩⲣⲁⲓ ⲁϥⲡⲁⲧⲁⲥⲥⲉ ⲙⲡⲙⲟⲩⲓ ϩⲛ ⲧⲙⲏⲧⲉ ⲙⲡϣⲏⲓ ⲙⲡⲉϩⲟⲟⲩ ⲙⲡⲉⲭⲓⲙⲱⲛ 21ⲁⲩⲱ ⲛⲧⲟϥ ⲡⲉⲛⲧⲁϥⲡⲁⲧⲁⲥⲥⲉ ⲙⲡⲣⲙⲛⲕⲏⲙⲉ ⲟⲩⲣⲱⲙⲉ ⲉϥⲟ ⲛϣⲡⲏⲣⲉ ⲉⲛⲁⲩ ⲉⲣⲟϥ ⲉⲣⲉⲟⲩⲙⲉⲣⲉϩ ⲇⲉ ϩⲛ ⲧϭⲓϫ ⲙⲡⲣⲙⲛⲕⲏⲙⲉ ⲉϥⲟ ⲛⲑⲉ ⲛⲟⲩϣⲉ ⲛϩⲱⲧ ⲛⲇⲓⲁⲃⲁⲑⲣⲁ ⲁⲩⲱ ⲃⲁⲓⲛⲉⲁⲥ ⲁϥⲉⲓ ⲉⲃⲟⲗ ⲉⲣⲟϥ ϩⲙ ⲡⲙⲉⲣⲉϩ ⲉⲧⲉⲛⲧⲟⲟⲧϥ ⲁⲩⲱ ⲁϥϩⲁⲣⲡⲁⲍⲉ ⲙⲡⲙⲉⲣⲉϩ ⲉⲃⲟⲗ ϩⲛ ⲧϭⲓϫ ⲙⲡⲣⲙⲛⲕⲏⲙⲉ ⲁϥⲙⲟⲩⲟⲩⲧ ⲙⲙⲟϥ ϩⲙ ⲡⲉϥⲙⲉⲣⲉϩ 22ⲛⲁⲓ ⲛⲉ ⲛⲧⲁϥⲁⲁⲩ ⲛϭⲓ ⲃⲁⲛⲁⲓⲁⲥ ⲡϣⲏⲣⲉ ⲛⲓⲱⲇⲁⲉ ⲛⲧⲟϥ ϩⲱⲱϥ ⲉⲣⲉⲡⲉϥⲣⲁⲛ ϣⲟⲟⲡ ϩⲙ ⲡϣⲟⲙⲛⲧ ⲛⲛⲟϭ ⲛⲇⲩⲛⲁⲧⲟⲥ 23ⲉⲃⲱⲉⲓ ⲉⲃⲟⲗ ϩⲙ ⲡϣⲟⲙⲛⲧ ⲁⲩⲱ ⲙⲡⲉϥⲉⲓ ⲉⲣⲁⲧⲟⲩ ⲙⲡϣⲟⲙⲛⲧ ⲁⲩⲱ ⲇ︤ⲁ︦ⲇ︥ ⲁϥⲕⲁⲁϥ ⲉϥⲧⲏϭ ⲉⲣⲟϥ ⲁⲩⲱ ⲛⲁⲓ ⲛⲉ ⲛⲣⲁⲛ ⲛⲛⲇⲩⲛⲁⲧⲟⲥ ⲙⲡⲣⲣⲟ ⲇ︤ⲁ︦ⲇ︥ 24ⲁⲍⲁⲏⲗ ⲡⲥⲟⲛ ⲛⲓⲱⲁⲃ ⲡⲁⲓ ⲛⲉϥⲏⲡ ϩⲙ ⲡⲉϥⲧⲟⲟⲩ ⲉⲗⲉⲁⲛⲁⲛ ⲡϣⲏⲣⲉ ⲛⲇⲟⲩⲇⲓ ⲡⲥⲟⲛ ⲙⲡⲉϥⲉⲓⲱⲧ ϩⲛ ⲃⲁⲓⲑⲗⲉⲉⲙ 25ⲥⲁⲙⲁⲓ ⲡⲁⲣⲟⲩⲇⲁⲓⲟⲥ ⲉⲗⲓⲕⲁ ⲡⲁⲣⲟⲩⲇⲁⲓⲟⲥ 26ⲉⲗⲗⲏⲥ ⲡⲫⲉⲗⲱⲑⲓ ⲉⲓⲣⲁⲥ ⲡϣⲏⲣⲉ ⲛⲉⲕⲕⲁⲥ ⲡⲉⲑⲉⲕⲱⲛⲓⲧⲏⲥ 27ⲁⲃⲓⲉⲍⲉⲣ ⲡⲁⲛⲁⲑⲱⲑⲓⲧⲏⲥ ⲉⲃⲟⲗ ϩⲛ ⲛⲉϣⲏⲣⲉ ⲙⲡⲁⲥⲱⲑⲓⲧⲏⲥ 28ⲥⲉⲗⲙⲱⲛ ⲡⲁⲓⲱⲧⲏⲥ ⲙⲟⲟⲣⲉ ⲡⲛⲉⲧⲱⲫⲁⲛⲓⲧⲏⲥ 29ⲉⲑⲉⲡϣⲏⲣⲉ ⲛϩⲣⲓⲃⲁ ⲉⲃⲟⲗ ϩⲛ ⲅⲁⲃⲁⲉⲑ ⲡϣⲏⲣⲉ ⲛⲃⲉⲛⲓⲁⲙⲓⲙ 30ⲡⲉⲫⲣⲁⲑⲉⲟⲥ 31ⲁⲥⲙⲱⲑ ⲡⲥⲁⲣⲁⲁⲃⲓⲧⲏⲥ 32ⲉⲙⲁⲥⲟⲩ ⲡⲥⲁⲗⲁⲃⲟⲩⲛⲓⲧⲏⲥ ⲛϣⲏⲣⲉ ⲛⲁⲥⲱⲛ ⲓⲱⲛⲁⲑⲁⲛ 33ⲥⲁⲙⲛⲁⲛ ⲡⲁⲣⲱⲇⲓⲧⲏⲥ ϩⲁⲙⲛⲁⲛ ⲡϣⲏⲣⲉ ⲛⲥⲁⲣⲉ ⲡⲁⲣⲁⲑⲩⲣⲓⲧⲏⲥ 34ⲉⲣⲓⲫⲁⲣⲉⲑ ⲡϣⲏⲣⲉ ⲛⲁⲥⲃⲓⲧⲏⲥ ⲡϣⲏⲣⲉ ⲙⲙⲁⲁⲭⲁⲁⲭⲓ ⲉⲗⲓⲁⲃ ⲡϣⲏⲣⲉ ⲛⲁⲭⲓⲇⲟⲫⲉⲗ ⲡⲕⲉⲗⲱⲛⲓⲧⲏⲥ 35ⲁⲍⲁⲣⲉ ⲡⲕⲁⲣⲙⲏⲗⲓⲟⲥ ⲡϣⲏⲣⲉ ⲛⲟⲩⲣⲉ ⲉⲧⲉ ⲉⲣⲭⲣⲓ ⲡⲉ 36ⲅⲁⲗⲁⲁⲇ ⲡϣⲏⲣⲉ ⲛⲁⲑⲁⲛ ⲉⲩϣⲏⲣⲉ ⲡⲉ ⲛⲇⲩⲛⲁⲧⲟⲥ ⲡϣⲏⲣⲉ ⲛⲅⲁⲗⲁⲁⲇⲇⲓ 37ⲉⲗⲓⲉ ⲡϩⲁⲙⲁⲛⲓⲧⲏⲥ ⲅⲉⲗⲱⲣⲓ ⲡⲕⲉⲣⲱⲑⲉⲱⲥ ⲉϥϥⲓ ⲛⲛⲉⲥⲕⲏⲩⲉ ⲛⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁⲥ 38ⲡⲓⲉⲑⲓⲣⲉⲟⲥ ⲅⲁⲣⲏⲃ ⲡⲓⲉⲑⲓⲛⲉⲟⲥ 39ⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ ⲛⲁⲓ ⲇⲉ ⲧⲏⲣⲟⲩ ⲉⲩⲛⲁⲉⲣ ⲙⲁⲁⲃ ⲥⲁϣϥ 40ⲉⲁⲇⲁ ⲡⲉ ⲉⲃⲟⲗ ϩⲛ ⲭⲓⲙⲁⲣⲣⲟⲛ ⲅⲁⲃⲓⲏⲗ ⲡϣⲏⲣⲉ ⲙⲡⲁⲣⲁⲃⲟⲑⲉⲟⲥ 41