2Sa 6 | CopSahBible2 | STEP | ⲇ︤ⲁ︦ⲇ︥ ⲟⲛ ⲁϥⲥⲱⲟⲩϩ ⲉϩⲟⲩⲛ ⲛϩⲉⲣϣⲓⲣⲉ ⲛⲓⲙ ⲉⲧϩⲛⲡ ⲓ︤ⲏ︦ⲗ︥ ⲉⲩⲛⲁⲣⲥⲁϣϥ ⲛⲧⲃⲁ ⲙⲙⲏⲏϣⲉ

2 Samuel 6

1 ⲇ︤ⲁ︦ⲇ︥ ⲟⲛ ⲁϥⲥⲱⲟⲩϩ ⲉϩⲟⲩⲛ ⲛϩⲉⲣϣⲓⲣⲉ ⲛⲓⲙ ⲉⲧϩⲛⲡⲓ︤ⲏ︦ⲗ︥ ⲉⲩⲛⲁⲣⲥⲁϣϥ ⲛⲧⲃⲁ ⲙⲙⲏⲏϣⲉ 2 ⲁⲩⲱ ⲁϥⲧⲱⲟⲩⲛ ⲛϭⲓ ⲇ︤ⲁ︦ⲇ︥ ⲁϥⲃⲱⲕ ⲙⲛ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲉⲃⲟⲗ ϩⲛ ⲛⲁⲣⲭⲱⲛ ⲧⲏⲣⲟⲩ ⲛⲧⲉϩⲓⲏ ⲛⲃⲱⲕ ⲉϩⲣⲁⲓ ⲉⲉⲓⲛⲉ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲛⲧⲁⲩⲧⲁⲩⲉⲣⲓⲛϥ ⲙⲡϫⲟⲉⲓⲥ ⲛⲛⲉϭⲟⲙ ⲉϫⲱⲥ ⲉϥϩⲙⲟⲟⲥ ϩⲓϫⲛ ⲛⲉⲭⲁⲓⲣⲟⲩⲃⲓⲛ ϩⲓϫⲱⲥ 3 ⲁⲩⲱ ⲁϥⲧⲁⲗⲟ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉϫⲛ ⲟⲩⲁϭⲟⲗⲧⲉ ⲛⲃⲣⲣⲉ ⲁⲩⲡⲟⲟⲛⲉⲥ ⲉⲃⲟⲗ ϩⲙ ⲡⲏⲓ ⲛⲁⲙⲓⲛⲁⲇⲁⲃ ⲡⲉⲧϩⲛⲡⲃⲟⲩⲛⲟⲥ ⲁⲩⲱ ⲱⲥⲁ ⲙⲛ ⲛⲉϥⲥⲛⲏⲩ ⲛϣⲏⲣⲉ ⲛⲁⲙⲓⲛⲁⲇⲁⲃ ⲁⲩϫⲱⲣⲙ ⲛⲧⲁϭⲟⲗⲧⲉ 4 ⲙⲛ ⲧⲕⲟⲓⲃⲱⲧⲟⲥ ⲛⲉϥⲥⲛⲏⲩ ⲇⲉ ⲛⲉⲩⲙⲟⲟϣⲉ ϩⲓϩⲏ ⲛⲧⲕⲟⲓⲃⲱⲧⲟⲥ 5 ⲁⲩⲱ ⲇ︤ⲁ︦ⲇ︥ ⲙⲛ ⲛⲉϣⲏⲣⲉ ⲙⲡⲓ︤ⲏ︦ⲗ︥ ⲛⲉⲩⲥⲱⲃⲉ ϩⲓⲑⲏ ⲙⲡϫⲟⲉⲓⲥ ϩⲛ ϩⲉⲛⲟⲣⲅⲁⲛⲟⲛ ⲉⲩⲧⲏϣ ϩⲛ ⲟⲩϭⲟⲙ ⲁⲩⲱ ϩⲉⲛⲱⲇⲏ ⲁⲩⲱ ϩⲛϭⲓⲛⲩⲣⲁ ⲙⲛ ϩⲛⲃⲟⲓⲛⲉ ⲁⲩⲱ ϩⲛ ϩⲉⲛⲕⲟⲩⲕⲙ ⲙⲛ ϩⲉⲛⲕⲩⲙⲃⲁⲗⲟⲛ ⲙⲛ ϩⲉⲛⲥⲏϥⲉ ⲛϫⲱ 6 ⲁⲩⲱ ⲁϥⲉⲓ ϣⲁ ⲛⲉϫⲛⲟⲟⲩ ⲛⲁⲇⲁⲩⲉⲓⲇ ⲱⲥⲁ ⲇⲉ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗⲉⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲉⲁⲙⲁϩⲧⲉ ⲙⲙⲟⲥ ϫⲉ ⲁⲡⲙⲁⲥⲉ ⲡⲁϣⲥϥ ⲉⲃⲟⲗ ⲉⲕⲁⲧⲉⲭⲉ ⲙⲙⲟⲥ 7 ⲡϫⲟⲉⲓⲥ ⲇⲉ ⲁϥϭⲱⲛⲧ ⲉⲟⲍⲁ ⲁⲩⲱ ⲁⲡⲛⲟⲩⲧⲉ ⲡⲁⲧⲁⲥⲥⲉ ⲙⲙⲟϥ ϩⲙ ⲡⲙⲁ ⲉⲧⲙⲙⲁⲩ ⲁϥⲙⲟⲩ ϩⲁⲧⲛ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ϩⲓⲑⲏ ⲙⲡⲛⲟⲩⲧⲉ 8 ⲇⲁⲩⲉⲓⲇ ⲇⲉ ⲁϥⲟⲩⲱⲗⲥ ⲛϩⲏⲧ ⲉⲧⲃⲉ ⲡϣⲁⲁⲣ ⲛⲧⲁⲡⲛⲟⲩⲧⲉ ⲁⲁϥ ⲛⲟⲍⲁ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ⲁϥⲙⲟⲩⲧⲉ ⲉⲡⲙⲁ ⲉⲧⲙⲙⲁⲩ ϫⲉ ⲡϣⲱⲱⲧ ⲉⲃⲟⲗ ⲛⲟⲍⲁ 9 ⲇ︤ⲁ︦ⲇ︥ ⲇⲉ ⲁϥⲣϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲉϥϫⲱ ⲙⲙⲟⲥ ϫⲉ ⲟⲩ ⲧⲉ ⲑⲉ ⲉⲧⲉⲣⲉⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲛⲁⲉⲓ ⲉϩⲟⲩⲛ ⲛⲁⲓ 10 ⲁⲩⲱ ⲙⲡⲉϥⲣϩⲛⲁϥ ⲛϭⲓ ⲇⲁⲩⲉⲓⲇ ⲉⲧⲣⲉⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲣⲁⲕⲧⲥ ⲉϩⲟⲩⲛ ⲛⲁϥ ⲉⲧⲡⲟⲗⲓⲥ ⲛⲇ︤ⲁ︦ⲇ︥ ⲇⲁⲩⲉⲓⲇ ⲇⲉ ⲁϥⲕⲧⲟⲥ ⲉϩⲣⲁⲓ ⲉⲡⲏⲓ ⲛⲁⲃⲉⲇⲇⲁⲣⲁ ⲡⲅⲉⲑⲑⲁⲓⲟⲥ 11 ⲁⲩⲱ ⲧϭⲓⲃⲱⲧⲟⲥ ⲙⲡϫⲟⲉⲓⲥ ⲁⲥϭⲱ ⲙⲡⲙⲁ ⲉⲧⲙⲙⲁⲩ ϩⲙ ⲡⲏⲓ ⲛⲁⲃⲉⲇⲇⲁⲣⲁ ⲡⲅⲉⲑⲑⲁⲓⲟⲥ ⲛϣⲟⲙⲛⲧ ⲛⲉⲃⲟⲧ ⲁⲩⲱ ⲡϫⲟⲉⲓⲥ ⲁϥⲥⲙⲟⲩ ⲉⲡⲏⲓ ⲧⲏⲣϥ ⲛⲁⲃⲉⲇⲇⲁⲣⲁ ⲙⲛ ⲉⲛⲕⲁ ⲛⲓⲙ ⲉⲧϣⲟⲟⲡ ⲛⲁϥ ϩⲙ ⲡⲧⲣⲉⲥⲃⲱⲕ ⲉϩⲟⲩⲛ ⲛⲁϥ ⲛϭⲓ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ 12 ⲁⲩⲱ ⲁⲩϫⲓⲡⲟⲩⲱ ⲛⲇⲁⲩⲉⲓⲇ ⲉⲩϫⲱ ⲙⲙⲟⲥ ϫⲉ ⲁⲡϫⲟⲉⲓⲥ ⲥⲙⲟⲩ ⲉⲡⲏⲓ ⲛⲁⲃⲉⲇⲇⲁⲣⲁ ⲙⲛ ⲉⲛⲕⲁ ⲛⲓⲙ ⲉⲧϣⲟⲟⲡ ⲛⲁϥ ⲉⲧⲃⲉ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁϥⲃⲱⲕ ⲇⲉ ⲛϭⲓ ⲇ︤ⲁ︦ⲇ︥ ⲁϥⲉⲓⲛⲉ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉⲃⲟⲗ ϩⲙ ⲡⲏⲓ ⲛⲁⲃⲉⲇⲇⲁⲣⲁ ⲉϩⲟⲩⲛ ⲉⲧⲡⲟⲗⲓⲥ ⲛⲇ︤ⲁ︦ⲇ︥ ϩⲛ ⲟⲩⲉⲓⲣⲏⲛⲏ ⲙⲛ ⲟⲩⲛⲟϭ ⲛⲉⲩⲫⲣⲟⲥⲩⲛⲏ 13 ⲁⲩⲱ ⲛⲉⲩϫⲱ ⲙⲛ ⲛⲉⲭⲱⲣⲟⲥ ⲛϭⲓ ⲛⲉⲧϥⲓ ϩⲁ ⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉⲩⲛⲁⲣⲥⲁϣϥ ⲛⲭⲟⲣⲟⲥ ⲁⲩⲱ ⲛⲉⲣⲉⲟⲩϣⲡⲏⲣⲉ ϣⲟⲟⲡ ⲙⲡⲉⲩⲭⲟⲣⲟⲥ ⲉⲩϣⲱⲱⲧ ⲛϩⲉⲛⲙⲁⲥⲉ ⲙⲛ ϩⲉⲛϩⲓⲉⲓⲃ 14 ⲇ︤ⲁ︦ⲇ︥ ⲇⲉ ⲛⲉϥⲣⲧⲱⲣⲉ ϩⲛ ϩⲉⲛⲟⲣⲅⲁⲛⲟⲛ ⲉⲩⲧⲏϣ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲇ︤ⲁ︦ⲇ︥ ⲛⲉⲣⲉⲟⲩϩⲃⲥⲱ ϩⲓⲱⲱϥ ⲉⲥⲥⲟⲧⲡ 15 ⲇ︤ⲁ︦ⲇ︥ ⲇⲉ ⲙⲛ ⲡⲓ︤ⲏ︦ⲗ︥ ⲧⲏⲣϥ ⲁⲩϫⲓ ⲉϩⲣⲁⲓ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ϩⲛ ⲟⲩⲗⲟⲩⲗⲁⲓ ⲁⲩⲱ ϩⲛ ⲟⲩϩⲣⲟⲟⲩ ⲛⲥⲁⲗⲡⲓⲅⲝ 16 ⲁⲥϣⲱⲡⲉ ⲇⲉ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉⲥⲛⲏⲩ ⲉϩⲟⲩⲛ ⲉⲧⲡⲟⲗⲓⲥ ⲛⲇⲁⲩⲉⲓⲇ ⲙⲉⲗⲭⲟⲗ ⲇⲉ ⲧϣⲉⲉⲣⲉ ⲛⲥⲁⲟⲩⲗ ⲁⲥϭⲱϣⲧ ⲉⲃⲟⲗ ϩⲙ ⲡⲉⲥϣⲟⲩϣⲧ ⲁⲥⲛⲁⲩ ⲉⲡⲣⲣⲟ ⲇⲁⲩⲉⲓⲇ ⲉϥⲱⲣⲭⲉⲓ ⲁⲩⲱ ⲉϥⲣⲧⲱⲣⲉ ϩⲓⲑⲏ ⲙⲡϫⲟⲉⲓⲥ ⲁⲥⲕⲱⲙϣ ⲛⲥⲱϥ ϩⲙ ⲡⲉⲥϩⲏⲧ 17 ⲧⲕⲟⲓⲃⲱⲧⲟⲥ ⲇⲉ ⲙⲡϫⲟⲉⲓⲥ ⲁⲩⲛⲧⲥ ⲁⲇ︤ⲁ︦ⲇ︥ ⲧⲁϩⲟⲥ ⲉⲣⲁⲧⲕ ϩⲙ ⲡⲉⲥⲙⲁ ϩⲛ ⲧⲙⲏⲧⲉ ⲛⲧⲉⲥⲕⲩⲛⲏ ⲧⲁⲓ ⲛⲧⲁⲇ︤ⲁ︦ⲇ︥ ⲡⲏⲥⲥⲉ ⲙⲙⲟⲥ ⲛⲁⲥ ⲁⲩⲱ ⲇⲁⲩⲉⲓⲇ ⲁϥⲧⲁⲗⲟ ⲉϩⲣⲁⲓ ⲛϩⲉⲛϩⲟⲗⲟⲕⲁⲩⲧⲱⲙⲁ ϩⲓⲑⲏ ⲙⲡϫⲟⲉⲓⲥ ⲙⲛ ϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ 18 ⲁϥⲥⲙⲟⲩ ⲉⲡⲗⲁⲟⲥ ϩⲙ ⲡⲣⲁⲛ ⲙⲡϫⲟⲉⲓⲥ ⲛⲛϭⲟⲙ 19 ⲁⲩⲱ ⲡⲗⲁⲟⲥ ⲧⲏⲣϥ ⲉⲙⲙⲁ ⲧⲏⲣⲟⲩ ⲙⲡⲓ︤ⲏ︦ⲗ︥ ϫⲓⲛ ⲇⲁⲛ ϣⲁ ⲃⲉⲣⲥⲁⲃⲉⲉ ϫⲓⲛ ⲟⲩϩⲟⲟⲩⲧ ϣⲁ ⲟⲩⲥϩⲓⲙⲉ ⲡⲟⲩⲁ ⲡⲟⲩⲁ ⲁⲇ︤ⲁ︦ⲇ︥ ⲥⲱⲣ ⲛⲁϥ ⲛⲟⲩⲕⲟⲗⲗⲩⲣⲓⲟⲛ ⲛⲟⲉⲓⲕ ⲙⲛ ⲟⲩⲉⲕⲣⲟϫ ⲙⲛ ⲟⲩⲟⲣⲃⲉ ⲛⲗⲁⲕⲛⲧ ⲡⲗⲁⲟⲥ ⲧⲏⲣϥ ⲡⲟⲩⲁ ⲡⲟⲩⲁ ⲙⲙⲟⲟⲩ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ 20 ⲁϥⲕⲧⲟϥ ⲇⲉ ⲛϭⲓ ⲇ︤ⲁ︦ⲇ︥ ⲁϥⲥⲙⲟⲩ ⲉⲡⲉϥⲏⲓ ⲁⲩⲱ ⲁⲥⲉⲓ ⲉⲃⲟⲗ ⲛϭⲓ ⲙⲉⲗⲭⲟⲗ ⲧϣⲉⲉⲣⲉ ⲛⲥⲁⲟⲩⲗ ⲉⲁⲡⲁⲛⲧⲁ ⲉⲇ︤ⲁ︦ⲇ︥ ⲁⲩⲱ ⲉⲥⲙⲟⲩ ⲉⲣⲟϥ ⲉⲥϫⲱ ⲙⲙⲟⲥ ϫⲉ ⲛⲧⲁϥϫⲓⲉⲟⲟⲩ ϩⲛ ⲟⲩ ⲙⲡⲟⲟⲩ ⲛϭⲓ ⲡⲣⲣⲟ ⲙⲡⲓ︤ⲏ︦ⲗ︥ ⲉⲁϥⲟⲩⲱⲛϩ ⲉⲃⲟⲗ ⲙⲡⲟⲟⲩ ⲛϩⲟⲟⲩ ⲛⲁϩⲣⲁⲩ ⲛⲛⲉϩⲙϩⲁⲗ ⲛⲥϩⲓⲙⲉ ⲛⲧⲉ ⲛⲉϥϩⲙϩⲁⲗ ⲕⲁⲧⲁ ⲑⲉ ⲉϣⲁϥϭⲱⲗⲡ ⲉⲃⲟⲗ ϩⲛ ⲟⲩϭⲱⲗⲡ ⲉⲃⲟⲗ ⲛϭⲓ ⲟⲩⲁ ⲛⲛⲉⲧⲟⲣⲭⲉⲓ 21 ⲁⲩⲱ ⲡⲉϫⲉⲇ︤ⲁ︦ⲇ︥ ⲙⲙⲉⲗⲭⲟⲗ ϫⲉ ϯⲛⲁⲟⲣⲭⲓ ⲁⲛⲟⲕ ϩⲓⲑⲏ ⲙⲡϫⲟⲉⲓⲥ ϥⲥⲙⲁⲙⲁⲁⲧ ⲛϭⲓ ⲡϫⲟⲉⲓⲥ ⲡⲁⲓ ⲛⲧⲁϥⲥⲟⲡⲧ ⲁⲛⲟⲕ ⲉϩⲟⲩⲉ ⲉⲡⲟⲩⲉⲓⲱⲧ ⲁⲩⲱ ⲉϩⲓⲟⲩⲉ ⲉⲡⲟⲩⲏⲓ ⲧⲏⲣϥ ⲉⲧⲣⲉϥⲕⲁⲑⲓⲥⲧⲁ ⲙⲙⲟⲓ ⲛⲁⲣⲭⲱⲛ ⲉϫⲙ ⲡⲉϥⲗⲁⲟⲥ ⲡⲓ︤ⲏ︦ⲗ︥ ⲁⲩⲱ ϯⲛⲁⲥⲱⲃⲉ ⲛⲧⲁⲟⲣⲭⲉⲓ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ 22 ⲁⲩⲱ ϯⲛⲁⲟⲩⲱⲛϩ ⲉⲃⲟⲗ ⲟⲛ ⲛⲧⲉⲓϩⲉ ⲛⲧⲁϣⲱⲡⲉ ⲛⲑⲉ ⲛⲟⲩϭⲱⲃ ⲛⲁϩⲣⲉ ⲁⲩⲱ ⲛⲕⲉϩⲙϩⲁⲗ ⲛⲥϩⲓⲙⲉ ⲛⲁⲓ ⲛⲧⲁⲣϫⲟⲟⲥ ⲉⲧⲃⲏⲏⲧⲟⲩ ϫⲉ ⲁⲓϫⲓⲉⲟⲟⲩ ⲛⲁϩⲣⲟⲟⲩ 23 ⲁⲩⲱ ⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲙⲡⲉϣⲏⲣⲉ ϣⲱⲡⲉ ⲛⲁⲥ ϣⲁ ⲡⲉϩⲟⲟⲩ ⲙⲡⲉⲥⲙⲟⲩ