2Sa 7 | CopSahBible2 | STEP | ⲁⲥϣⲱⲡⲉ ⲇⲉ ⲛⲧⲉⲣⲉⲡⲣⲣⲟ ϩⲙⲟⲟⲥ ϩⲙ ⲡⲉϥⲏⲓ ⲁⲡϫⲟⲉⲓⲥ ϯⲙⲧⲟⲛ ⲛⲁϥ ⲉⲡⲧⲏⲣϥ ⲉⲃⲟⲗ ϩⲛ ⲛⲉϥϫⲁϫⲉ ⲧⲏⲣⲟⲩ ⲉⲧϩⲙⲡⲉϥⲕⲱⲧⲉ

2 Samuel 7

1 ⲁⲥϣⲱⲡⲉ ⲇⲉ ⲛⲧⲉⲣⲉⲡⲣⲣⲟ ϩⲙⲟⲟⲥ ϩⲙ ⲡⲉϥⲏⲓ ⲁⲡϫⲟⲉⲓⲥ ϯⲙⲧⲟⲛ ⲛⲁϥ ⲉⲡⲧⲏⲣϥ ⲉⲃⲟⲗ ϩⲛ ⲛⲉϥϫⲁϫⲉ ⲧⲏⲣⲟⲩ ⲉⲧϩⲙⲡⲉϥⲕⲱⲧⲉ 2 ⲁⲩⲱ ⲡⲉϫⲁϥ ⲛϭⲓ ⲡⲣⲣⲟ ⲉϩⲟⲩⲛ ϩⲛ ⲛⲁⲑⲁⲛ ⲡⲉⲡⲣⲟⲫⲏⲧⲏⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲟⲩⲏϩ ϩⲛ ⲟⲩⲏⲓ ⲛⲕⲉⲇⲣⲓⲛⲟⲛ ⲧⲕⲟⲓⲃⲱⲧⲟⲥ ⲇⲉ ⲙⲡⲛⲟⲩⲧⲉ ⲟⲩⲏϩ ϩⲛ ⲧⲙⲏⲏⲧⲉ ⲛⲧⲉⲥⲕⲏⲛⲏ 3 ⲡⲉϫⲉⲛⲁⲑⲁⲛ ⲉϩⲟⲩⲛ ϩⲙ ⲡⲣⲣⲟ ϫⲉ ϩⲱⲃ ⲛⲓⲙ ⲉⲧϩⲙⲡⲉⲕϩⲏⲧ ⲃⲱⲕ ⲁⲣⲓⲥⲟⲩ ϫⲉ ⲡϫⲟⲉⲓⲥ ⲛⲙⲙⲁⲕ 4 ⲁⲥϣⲱⲡⲉ ⲇⲉ ϩⲛ ⲧⲉⲩϣⲏ ⲉⲧⲙⲙⲁⲩ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁ ⲛⲁⲑⲁⲛ ⲉϥϫⲱ ⲙⲙⲟⲥ ⲛⲁϥ 5 ϫⲉ ⲃⲱⲕ ⲛⲅϫⲟⲟⲥ ⲙⲡⲁϩⲙϩⲁⲗ ⲇ︤ⲁ︦ⲇ︥ ϫⲉ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲛⲧⲟⲕ ⲁⲛ ⲉⲧⲛⲁⲕⲱⲧ ⲛⲁⲓ ⲙⲡⲁⲏⲓ ⲉⲧⲣⲁⲟⲩⲱϩ ⲛϩⲏⲧϥ 6 ϫⲉ ⲙⲡⲓⲟⲩⲱϩ ϩⲛ ⲏⲓ ⲛϫⲓⲛ ⲉⲡⲉϩⲟⲟⲩ ⲛⲧⲁⲓⲉⲓⲛⲉ ⲛⲛⲉϣⲏⲣⲉ ⲙⲡⲓ︤ⲏ︦ⲗ︥ ⲉⲃⲟⲗ ϩⲛ ⲕⲏⲙⲉ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ⲁⲩⲱ ⲛⲉⲓⲙⲟⲟϣⲉ ϩⲛ ϩⲉⲛⲙⲁ ⲉⲩϩⲟⲃⲥ ⲁⲩⲱ ϩⲛ ⲛⲉⲥⲕⲏⲛⲏ 7 ⲁⲩⲱ ϩⲛ ⲛⲉϩⲃⲏⲩⲉ ϩⲛ ⲛⲉⲙⲁ ⲧⲏⲣⲟⲩ ⲛⲧⲁⲓⲉⲓ ⲛϩⲏⲧⲟⲩ ⲙⲛ ⲡⲓ︤ⲏ︦ⲗ︥ ⲧⲏⲣϥ ⲉϣⲱⲡⲉ ϩⲛ ⲟⲩϣⲁϫⲉ ⲁⲓϣⲁϫⲉ ⲙⲛ ⲟⲩⲫⲩⲗⲏ ⲛⲟⲩⲱⲧ ⲛⲧⲉ ⲛⲉⲫⲩⲗⲏ ⲙⲡⲓ︤ⲏ︦ⲗ︥ ⲡⲙⲁ ⲏ ⲙⲡⲉⲛⲧⲁⲓϩⲱⲛ ⲉⲧⲟⲟⲧϥ ⲉⲙⲟⲟⲛⲉ ⲙⲡⲁⲗⲁⲟⲥ ⲉⲓϫⲱ ⲙⲙⲟⲥ ϫⲉ ⲉⲧⲃⲉ ⲟⲩ ⲙⲡⲉⲧⲛⲕⲱⲧ ⲛⲁⲓ ⲛⲟⲩⲏⲓ ⲛⲕⲉⲇⲣⲓⲛⲟⲛ 8 ⲧⲉⲛⲟⲩ ϭⲉ ⲛⲁⲓ ⲛⲉⲧⲉⲧⲛⲛⲁϫⲟⲟⲩ ⲙⲡⲁϩⲙϩⲁⲗ ⲇ︤ⲁ︦ⲇ︥ ϫⲉ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϫⲱ ⲙⲙⲟⲟⲩ ϫⲉ ⲁⲓϫⲓⲧⲕ ⲉⲃⲟⲗ ϩⲛ ⲧϣⲁⲓⲣⲉ ⲛⲛⲉⲥⲟⲟⲩ ⲉⲧⲣⲉⲕϣⲱⲡⲉ ⲛⲁⲣⲭⲱⲛ ⲉϫⲙ ⲡⲁⲗⲁⲟⲥ ⲡⲓ︤ⲏ︦ⲗ︥ 9 ⲁⲩⲱ ⲛⲉⲓⲛⲉⲙⲁⲕ ϩⲛ ⲛⲉⲙⲁ ⲧⲏⲣⲟⲩ ⲉϣⲁⲕⲃⲱⲕ ⲉⲣⲟⲟⲩ ⲁⲩⲱ ⲁⲓⲃⲱⲧⲉ ⲉⲃⲟⲗ ⲛⲛⲉⲕϫⲁϫⲉ ⲧⲏⲣⲟⲩ ϩⲁ ⲧⲉⲕϩⲏ ⲁⲩⲱ ⲁⲓⲕⲁⲁⲕ ⲉⲕⲟ ⲛⲛⲟϭ ⲛⲥⲟⲉⲓⲧ ⲕⲁⲧⲁ ⲡⲣⲁⲛ ⲛⲛⲉⲛⲟϭ ⲉⲧϩⲓϫⲙⲡⲕⲁϩ 10 ⲁⲩⲱ ϯⲛⲁⲥⲙⲓⲛⲉ ⲛⲟⲩⲙⲁ ⲙⲡⲁⲗⲁⲟⲥ ⲡⲓ︤ⲏ︦ⲗ︥ ⲛⲧⲁⲧⲱϭⲉ ⲙⲙⲟϥ ⲛϥⲟⲩⲱϩ ⲙⲁⲩⲁⲁϥ ⲛϥⲧⲙϥⲓⲣⲟⲟⲩϣ ϭⲉ ⲛϫⲓⲛ ⲉⲡⲉⲓⲛⲁⲩ ⲛⲧⲉⲧⲙϣⲏⲣⲉ ⲛⲁⲇⲓⲕⲓⲁ ⲟⲩⲱϩ ⲉⲧⲟⲟⲧϥ ⲛϫⲓⲛ ⲉⲡⲉⲓⲛⲁⲩ ⲉⲑⲙⲕⲟϥ ⲕⲁⲧⲁ ⲑⲉ ⲛⲉϩⲟⲩⲉⲓⲧⲉ 11 ϫⲓⲛ ⲡⲉϩⲟⲟⲩ ⲛⲧⲁⲓⲕⲁⲕⲣⲓⲧⲏⲥ ⲉϫⲙ ⲡⲁⲗⲁⲟⲥ ⲡⲓ︤ⲏ︦ⲗ︥ ⲁⲩⲱ ϯⲛⲁϯⲙⲧⲟⲛ ⲛⲁⲕ ⲉⲃⲟⲗ ϩⲓⲧⲛ ⲛⲉⲕϫⲁϫⲉ ⲧⲏⲣⲟⲩ ϩⲁ ⲧⲉⲕϩⲏ ⲁⲩⲱ ⲡϫⲟⲉⲓⲥ ⲛⲁⲧⲁⲙⲟⲕ ϫⲉ ⲉⲛⲉⲕⲛⲁⲕⲱⲧ ⲛⲁϥ ⲛⲟⲩⲏⲓ 12 ⲁⲩⲱ ⲉⲣϣⲁⲛⲛⲉⲕϩⲟⲟⲩ ϫⲱⲕ ⲉⲃⲟⲗ ⲥⲉⲛⲁⲟⲩⲁϩⲕ ⲛⲁϩⲣⲉⲛ ⲛⲉⲕⲉⲓⲟⲧⲉ ⲁⲩⲱ ϯⲛⲁⲧⲟⲩⲛⲉⲥⲡⲉⲕⲥⲡⲉⲣⲙⲁ ⲙⲛⲛⲥⲱⲕ ⲡⲁⲓ ⲉⲧⲛⲁⲉⲓ ⲉⲃⲟⲗ ⲛϩⲏⲧⲕ ⲛⲧⲁⲥⲟⲃⲧⲉ ⲛⲧⲉⲕⲙⲛⲧⲣⲣⲟ ⲛⲁϥ 13 ⲛⲧⲟϥ ⲡⲉⲧⲛⲁⲕⲱⲧ ⲛⲟⲩⲏⲓ ϩⲙ ⲡⲁⲣⲁⲛ ⲁⲩⲱ ϯⲛⲁⲧⲁϫⲣⲉⲡⲉϥⲑⲣⲟⲛⲟⲥ ⲛϣⲁ ⲉⲛⲉϩ 14 ⲁⲛⲟⲕ ϯⲛⲁϣⲱⲡⲉ ⲛⲁϥ ⲉⲩⲉⲓⲱⲧ ⲛⲧⲟϥ ϩⲱⲱϥ ϥⲛⲁϣⲱⲡⲉ ⲛⲁⲓ ⲉⲩϣⲏⲣⲉ ⲡⲁⲓ ⲇⲉ ⲉϥϣⲁⲛϫⲓⲛϭⲟⲛⲥ ϯⲛⲁϫⲡⲓⲟϥ ⲙⲡϭⲉⲣⲱⲃ ⲛϩⲉⲛⲣⲱⲙⲉ ⲁⲩⲱ ϩⲛ ⲧⲥⲏϥⲉ ⲛϩⲉⲛϣⲏⲣⲉ ⲛⲣⲱⲙⲉ 15 ⲡⲁⲛⲁ ⲇⲉ ⲛϯⲛⲁϥⲓⲧϥ ⲁⲛ ⲉⲃⲟⲗ ϩⲓϫⲱϥ ⲕⲁⲧⲁ ⲑⲉ ⲛⲧⲁⲓϥⲓⲧϥ ⲉⲃⲟⲗ ϩⲛ ⲥⲁⲟⲩⲗ ⲡⲁⲓ ⲛⲧⲁⲓⲡⲟⲟⲛⲉϥ ⲉⲃⲟⲗ ϩⲓϩⲏ ⲙⲙⲟⲓ 16 ⲁⲩⲱ ⲡⲏⲓ ⲙⲡⲉⲕⲥⲡⲉⲣⲙⲁ ϥⲛⲁϣⲱⲡⲉ ⲉϥⲥⲙⲟⲛⲧ ⲁⲩⲱ ⲧⲉϥⲙⲛⲧⲣⲣⲟ ⲥⲛⲁϣⲱⲡⲉ ⲛϣⲁ ⲉⲛⲉϩ ⲙⲡⲁⲙⲧⲟ ⲉⲃⲟⲗ ⲡⲉϥⲑⲣⲟⲛⲟⲥ ϥⲛⲁϣⲱⲡⲉ ⲉϥⲧⲁϫⲣⲏⲩ ⲛϣⲁ ⲉⲛⲉϩ 17 ⲕⲁⲧⲁ ⲛⲉⲓϣⲁϫⲉ ⲧⲏⲣⲟⲩ ⲁⲩⲱ ⲕⲁⲧⲁ ⲧⲉⲓϩⲟⲣⲁⲥⲓⲥ ⲧⲏⲣⲥ ⲧⲁⲓ ⲧⲉ ⲑⲉ ⲛⲧⲁϥϣⲁϫⲉ ⲛϭⲓ ⲛⲁⲑⲁⲛ ⲙⲛ ⲇⲁⲩⲉⲓⲇ 18 ⲡⲣⲣⲟ ⲇⲉ ⲇ︤ⲁ︦ⲇ︥ ⲁϥⲃⲱⲕ ⲉϩⲟⲩⲛ ⲁϥϩⲙⲟⲟⲥ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲡⲉϫⲁϥ ϫⲉ ⲁⲛⲅ ⲛⲓⲙ ⲁⲛⲟⲕ ⲡϫⲟⲉⲓⲥ ⲡⲁϫⲟⲉⲓⲥ ⲁⲩⲱ ⲟⲩ ⲡⲉ ⲡⲁⲏⲓ ϫⲉ ⲁⲕⲙⲉⲣⲓⲧ ϣⲁ ⲉϩⲣⲁⲓ ⲉⲛⲉⲓϣⲓ 19 ⲁⲩⲱ ⲙⲡⲓⲑⲃⲃⲓⲟ ϩⲛ ⲗⲁⲁⲩ ⲙⲡⲉⲕⲙⲧⲟ ⲉⲃⲟⲗ ⲡⲁϫⲟⲉⲓⲥ ⲁⲩⲱ ⲁⲕϣⲁϫⲉ ⲉⲧⲃⲉ ⲡⲏⲓ ⲙⲡⲉⲕϩⲙϩⲁⲗ ⲉϩⲛⲛⲟϭ ⲛⲟⲩⲟⲉⲓϣ ⲡⲁⲓ ⲇⲉ ⲡⲉ ⲡⲛⲟⲙⲟⲥ ⲙⲡⲣⲱⲙⲉ ⲡϫⲟⲉⲓⲥ ⲡⲁϫⲟⲉⲓⲥ 20 ⲁⲩⲱ ⲟⲩ ⲟⲛ ⲡⲉ ⲡϣⲁϫⲉ ⲉⲧⲉⲣⲉⲇ︤ⲁ︦ⲇ︥ ⲛⲁⲟⲩⲁϩⲙⲉϥ ⲛⲧⲟⲟⲧϥ ⲛⲁϩⲣⲟⲕ ⲧⲉⲛⲟⲩ ϭⲉ ⲛⲧⲟⲕ ⲕⲥⲟⲟⲩⲛ ⲙⲡⲉⲕϩⲙϩⲁⲗ ⲡϫⲟⲉⲓⲥ 21 ⲉⲧⲃⲉ ⲡⲉⲕϩⲙϩⲁⲗ ⲁⲕⲉⲓⲣⲉ ⲁⲩⲱ ⲉⲧⲃⲉ ⲡⲧⲱϣ ⲙⲡⲉⲕϩⲏⲧ ⲁⲕⲉⲓⲣⲉ ⲛⲧⲉⲓⲙⲛⲧⲛⲟϭ ⲧⲏⲣⲥ ⲉⲧⲣⲉⲕⲟⲩⲟⲛϩⲕ ⲉⲃⲟⲗ ⲙⲡⲉⲕϩⲙϩⲁⲗ 22 ⲉⲧⲣⲉⲕϫⲓⲉⲟⲟⲩ ⲡϫⲟⲉⲓⲥ ⲡⲁϫⲟⲉⲓⲥ ⲛⲧⲟⲕ ⲡⲉ ⲡⲛⲟⲩⲧⲉ ⲁⲩⲱ ⲛⲉⲕϣⲁϫⲉ ⲛⲁϣⲱⲡⲉ ⲙⲙⲉ ⲁⲩⲱ ⲙⲛ ϭⲉ ⲛⲟⲩⲧⲉ ⲛⲃⲗⲗⲁⲕ ⲕⲁⲧⲁ ⲛⲉⲛⲧⲁⲛⲥⲟⲧⲙⲟⲩ ⲧⲏⲣⲟⲩ ϩⲛ ⲛⲉⲛⲙⲁⲁϫⲉ 23 ⲁⲩⲱ ⲛⲓⲙ ⲡⲉ ⲡⲕⲉϩⲉⲑⲛⲟⲥ ⲛⲑⲉ ⲙⲡⲉⲕⲗⲁⲟⲥ ⲡⲓ︤ⲏ︦ⲗ︥ ϩⲙ ⲡⲕⲁϩ ⲧⲏⲣϥ ⲛⲑⲉ ⲛⲧⲁⲡⲛⲟⲩⲧⲉ ⲥⲱⲕ ϩⲁϫⲱϥ ⲉⲧⲣⲉϥⲥⲱⲧⲉ ⲛⲁϥ ⲛⲟⲩⲗⲁⲟⲥ ⲉⲧⲣⲉⲕⲕⲱ ⲛⲁⲕ ⲛⲟⲩⲣⲁⲛ ⲁⲩⲱ ⲉⲧⲣⲉⲕⲉⲓⲣⲉ ⲛⲁⲕ ⲛⲟⲩⲙⲛⲧⲛⲟϭ ⲙⲛ ⲟⲩⲉⲟⲟⲩ ⲉⲧⲣⲉⲕⲛⲟⲩϫⲉ ⲉⲃⲟⲗ ϩⲓⲑⲏ ⲙⲡⲉⲕⲗⲁⲟⲥ ⲡⲁⲓ ⲛⲧⲁⲕⲥⲟⲧⲡϥ ⲛⲁⲕ ⲉⲃⲟⲗ ϩⲛ ⲕⲏⲙⲉ ⲛϩⲉⲛϩⲉⲑⲛⲟⲥ ⲙⲛ ϩⲉⲛⲙⲁ ⲛϣⲱⲡⲉ 24 ⲁⲩⲱ ⲁⲕⲥⲟⲃⲧⲉ ⲛⲁⲕ ⲙⲡⲉⲕⲗⲁⲟⲥ ⲡⲓ︤ⲏ︦ⲗ︥ ⲉⲩⲗⲁⲟⲥ ⲛϣⲁ ⲉⲛⲉϩ ⲁⲩⲱ ⲛⲧⲟⲕ ⲡϫⲟⲉⲓⲥ ⲁⲕϣⲱⲡⲉ ⲛⲁⲩ ⲛⲛⲟⲩⲧⲉ 25 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲁⲛⲟⲩⲧⲉ ⲡϣⲁϫⲉ ⲛⲧⲁⲕϫⲟⲟϥ ⲉⲧⲃⲉ ⲡⲉⲕϩⲙϩⲁⲗ ⲁⲩⲱ ⲉⲧⲃⲉ ⲡⲉϥⲏⲓ ⲧⲁϫⲣⲟϥ ⲛϣⲁ ⲉⲛⲉϩ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲉⲛⲛⲟⲩⲧⲉ ⲉⲧⲣⲉ ⲡⲏⲓ ⲙⲡⲉⲕϩⲙϩⲁⲗ ⲇ︤ⲁ︦ⲇ︥ ϣⲱⲡⲉ ⲉϥⲧⲁϫⲣⲏⲩ ⲉϫⲙ ⲡⲓ︤ⲏ︦ⲗ︥ ⲙⲡⲉⲕⲙⲧⲟ ⲉⲃⲟⲗ ϫⲉ ⲛⲧⲟⲕ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲛⲧⲟⲕ ⲡⲉ ⲡⲛⲟⲩⲧⲉ ⲙⲡⲓⲏⲗ ⲧⲉⲛⲟⲩ ϭⲉ ⲕⲁⲧⲁ ⲑⲉ ⲛⲧⲁⲕϣⲁϫⲉ ⲙⲡⲉⲕⲣⲁⲛ 26 ⲉϥⲉϫⲓⲥⲉ ⲛϣⲁ ⲉⲛⲉϩ 27 ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲡⲓ︤ⲏ︦ⲗ︥ ⲁⲩⲱ ⲡⲏⲓ ⲙⲡⲉⲕϩⲙϩⲁⲗ ⲇ︤ⲁ︦ⲇ︥ ⲉϥⲉϣⲱⲡⲉ ⲉϥⲁϩⲉⲣⲁⲧϥ ⲙⲡⲉⲕⲙⲧⲟ ⲉⲃⲟⲗ ϫⲉ ⲛⲧⲟⲕ ⲡⲉ ⲡϫⲟⲉⲓⲥ ⲛⲛϭⲟⲙ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲁⲕϭⲱⲗⲡ ⲉⲃⲟⲗ ⲉⲡⲙⲁⲁϫⲉ ⲙⲡⲉⲕϩⲙϩⲁⲗ ⲉⲕϫⲱ ⲙⲙⲟⲥ ϫⲉ ϯⲛⲁⲕⲱⲧ ⲛⲁⲕ ⲛⲟⲩⲏⲓ ⲉⲧⲃⲉ ⲡⲉⲕϩⲙϩⲁⲗ ⲁϥϩⲉ ⲉⲡⲉϥϩⲏⲧ ⲉϥϣⲗⲏⲗ ⲉϩⲣⲁⲓ ⲉⲣⲟⲕ ϩⲙ ⲡⲉⲓϣⲗⲏⲗ 28 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲁⲛⲟⲩⲧⲉ ⲛⲧⲟⲕ ⲡⲉ ⲡⲛⲟⲩⲧⲉ ⲁⲩⲱ ⲛⲉⲕϣⲁϫⲉ ⲛⲁϣⲱⲡⲉ ⲙⲙⲉ ⲁⲩⲱ ⲁⲕϣⲁϫⲉ ⲉⲧⲃⲉ ⲡⲉⲕϩⲙϩⲁⲗ ⲉⲉⲓⲛⲉ ⲛⲧⲉⲓⲙⲛⲧⲁⲅⲁⲑⲟⲥ ⲧⲏⲣⲥ ⲉϫⲱϥ 29 ⲧⲉⲛⲟⲩ ϭⲉ ϩⲓⲧⲟⲟⲧⲕ ⲉⲥⲙⲟⲩ ⲉⲡⲏⲓ ⲙⲡⲉⲕϩⲙϩⲁⲗ ⲉⲧⲣⲉϥϣⲱⲡⲉ ⲛϣⲁ ⲉⲛⲉϩ ⲙⲡⲉⲕⲙⲧⲟ ⲉⲃⲟⲗ ϫⲉ ⲛⲧⲟⲕ ⲡϫⲟⲉⲓⲥ ⲡⲁϫⲟⲉⲓⲥ ⲁⲕϣⲁϫⲉ ⲁⲩⲱ ⲉⲃⲟⲗ ϩⲙ ⲡⲉⲕⲥⲙⲟⲩ ⲡⲏⲓ ⲙⲡⲉⲕϩⲙϩⲁⲗ ⲛⲁϫⲓⲥⲙⲟⲩ ⲛϣⲁ ⲉⲛⲉϩ