Numbers 8
1Ⲁⲩⲱ ⲁⲡϫⲟⲉⲓⲥ ϣⲁϫⲉ ⲛⲁϩⲣⲛ ⲙⲱⲩⲥⲏⲥ ⲉϥϫⲱ ⲙⲙⲟⲥ 2ϫⲉ ϣⲁϫⲉ ⲙⲛ ⲁⲁⲣⲱⲛ ⲛⲅϫⲟⲟⲥ ⲛⲁϥ ϫⲉ ⲉⲕⲉⲕⲱ ⲉϩⲣⲁⲓ ⲛⲛϩⲃⲥ ⲛⲥⲁ ⲟⲩⲛⲁⲙ ⲙⲡⲉⲙⲧⲟ ⲉⲃⲟⲗ ⲛⲧⲗⲩⲭⲛⲓⲁ 3ⲁϥϫⲉⲣⲉⲛϩⲏⲃⲥ ⲕⲁⲧⲁ ⲑⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ 4ⲁⲩⲱ ⲡⲁⲓ ⲡⲉ ⲡⲙⲟⲩⲛⲅ ⲛⲧⲗⲩⲭⲛⲓⲁ ⲟⲩⲛⲟⲩⲃ ⲧⲉ ⲉⲥⲧⲏⲕ ⲡⲉⲥⲕⲁⲩⲛⲟⲥ ⲙⲛ ⲧⲉⲥϩⲣⲏⲣⲉ ⲉⲥϫⲟⲟⲣ ⲧⲏⲣⲥ ⲕⲁⲧⲁ ⲡⲉⲓⲛⲉ ⲡⲁⲓ ⲛⲧⲁⲡϫⲟⲉⲓⲥ ⲧⲥⲁⲃⲉⲙⲱⲩⲥⲏⲥ ⲉⲣⲟϥ ⲧⲁⲓ ⲧⲉ ⲑⲉ ⲛⲧⲁϥⲧⲁⲙⲓⲟ ⲛⲧⲗⲩⲭⲛⲓⲁ 5ⲁⲩⲱ ⲁⲡϫⲟⲉⲓⲥ ϣⲁϫⲉ ⲛⲁϩⲣⲛ ⲙⲱⲩⲥⲏⲥ ⲉϥϫⲱ ⲙⲙⲟⲥ 6ϫⲉ ϫⲓ ⲛⲛⲗⲉⲩⲉⲓⲧⲏⲥ ⲛⲅⲧⲃⲃⲟ ⲙⲙⲟⲟⲩ ⲛⲧⲙⲏⲧⲉ ⲛⲛϣⲏⲣⲉ ⲙⲡⲓ︤ⲏ︦ⲗ︥ 7ⲁⲩⲱ ⲉⲕⲉⲉⲓⲣⲉ ⲛⲁⲩ ⲛⲧⲉⲓϩⲉ ⲙⲡⲉⲩⲧⲃⲃⲟ ⲉⲕⲉϭⲉϣϭⲱϣⲟⲩ ϩⲙ ⲡⲙⲟⲟⲩ ⲙⲡⲧⲃⲃⲟ ⲛⲧⲉⲡⲧⲟⲕ ⲃⲱⲕ ⲉⲃⲟⲗ ⲉϫⲙ ⲡⲉϥⲥⲱⲙⲁ ⲧⲏⲣϥ ⲁⲩⲱ ⲉⲩⲉⲣⲱϩⲉ ⲛⲛⲉⲩϩⲟⲓⲧⲉ ⲛⲥⲉϣⲱⲡⲉ ⲉⲩⲧⲃⲃⲏⲩ 8ⲁⲩⲱ ⲉⲩⲉϫⲓ ⲛⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲁⲩⲱ ⲧⲉⲑⲩⲥⲓⲁ ⲙⲡⲁⲓ ⲟⲩⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲁⲩⲱ ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲛⲅϫⲓⲧϥ ϩⲁ ⲛⲟⲃⲉ 9ⲁⲩⲱ ⲛⲗⲉⲩⲉⲓⲧⲏⲥ ⲉⲕⲉⲉⲛⲧⲟⲩ ⲙⲡⲉⲙⲧⲟ ⲉⲃⲟⲗ ⲛⲧⲉⲥⲕⲩⲛⲏ ⲙⲡⲙⲛⲧⲣⲉ ⲁⲩⲱ ⲉⲕⲉⲥⲱⲟⲩϩ ⲉϩⲟⲩⲛ ⲛⲧⲥⲩⲛⲁⲅⲱⲅⲏ ⲧⲏⲣⲥ ⲛⲛϣⲏⲣⲉ ⲙⲡⲓ︤ⲏ︦ⲗ︥ 10ⲁⲩⲱ ⲛⲗⲉⲩⲉⲓⲧⲏⲥ ⲉⲕⲉⲉⲛⲧⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲧⲉⲛϣⲏⲣⲉ ⲙⲡⲓ︤ⲏ︦ⲗ︥ ⲧⲁⲗⲉⲛⲉⲩϭⲓϫ ⲉϫⲛ ⲛⲗⲉⲩⲉⲓⲧⲏⲥ 11ⲁⲩⲱ ⲁⲁⲣⲱⲛ ⲉϥⲉⲡⲱⲣϫ ⲉⲃⲟⲗ ⲛⲛⲗⲉⲩⲉⲓⲧⲏⲥ ⲛⲟⲩⲧⲟ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲃⲟⲗ ϩⲓⲧⲛ ⲛϣⲏⲣⲉ ⲙⲡⲓ︤ⲏ︦ⲗ︥ ⲛⲥⲉϣⲱⲡⲉ ϩⲱⲥⲧⲉ ⲉⲧⲣⲉⲩⲉⲣϩⲱⲃ ⲉⲛⲉϩⲃⲏⲩⲉ ⲙⲡϫⲟⲉⲓⲥ 12ⲛⲗⲉⲩⲉⲓⲧⲏⲥ ⲇⲉ ⲉⲩⲉⲧⲁⲗⲉⲛⲉⲩϭⲓϫ ⲉϫⲛ ⲧⲁⲡⲉ ⲛⲙⲙⲁⲥⲉ ⲛϥⲧⲁⲗⲉⲡⲟⲩⲁ ϩⲁ ⲛⲟⲃⲉ ⲡⲕⲉⲟⲩⲁ ⲉⲩϭⲗⲓⲗ ⲙⲡϫⲟⲉⲓⲥ ⲉⲥⲟⲡⲥ ϩⲁⲣⲟⲟⲩ ⲉⲧⲃⲃⲟ ⲙⲙⲟⲟⲩ 13ⲁⲩⲱ ⲉⲕⲉⲧⲁϩⲟ ⲉⲣⲁⲧⲟⲩ ⲛⲛⲗⲉⲩⲉⲓⲧⲏⲥ ⲙⲡⲉⲙⲧⲟ ⲉⲃⲟⲗ ⲛⲁⲁⲣⲱⲛ ⲡⲟⲩⲏⲏⲃ ⲁⲩⲱ ⲙⲡϩⲟⲧ ⲉⲃⲟⲗ ⲛⲛⲉϥϣⲏⲣⲉ ⲛⲅⲧⲁⲁⲩ ϩⲛ ⲟⲩϯ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ 14ⲁⲩⲱ ⲉⲕⲉⲡⲱⲣϫ ⲉⲃⲟⲗ ⲛⲛⲗⲉⲩⲉⲓⲧⲏⲥ ⲛⲧⲙⲏⲧⲉ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲛⲥⲉϣⲱⲡⲉ ⲛⲁⲓ 15ⲁⲩⲱ ⲙⲛⲛⲥⲁ ⲛⲁⲓ ⲉⲩⲉⲃⲱⲕ ⲉϩⲟⲩⲛ ⲛϭⲓ ⲛⲗⲉⲩⲉⲓⲧⲏⲥ ⲉⲧⲣⲉⲩⲉⲣϩⲱⲃ ⲉⲧⲉⲥⲕⲩⲛⲏ ⲙⲡⲙⲛⲧⲣⲉ ⲁⲩⲱ ⲉⲕⲉⲧⲃⲃⲟ ⲙⲙⲟⲟⲩ ⲛⲅⲧⲁⲁⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ 16ϩⲛ ⲟⲩⲧⲟ ⲉⲩⲧⲟ ⲉⲃⲟⲗ ϩⲛ ⲧⲙⲏⲧⲉ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲉⲡⲙⲁ ⲛϣⲣⲡⲙⲓⲥⲉ ⲛⲓⲙ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ 17ϫⲓⲛ ⲉⲡϣⲣⲡⲙⲓⲥⲉ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ ϫⲓⲛ ⲉⲟⲩⲣⲱⲙⲉ ϣⲁϩⲣⲁⲓ ⲉⲩⲧⲃⲛⲏ ϫⲓⲛ ⲉⲡⲉϩⲟⲟⲩ ⲛⲧⲁⲓⲡⲁⲧⲁⲥⲥⲉ ⲛϣⲣⲡⲙⲓⲥⲉ ⲛⲓⲙ ⲉⲃⲟⲗ ⲛϩⲏⲧⲟⲩ ϩⲣⲁⲓ ϩⲙ ⲡⲕⲁϩ ⲛⲕⲏⲙⲉ ⲉⲁⲓⲧⲃⲃⲟ ⲙⲙⲟⲟⲩ ⲛⲁⲓ 18ⲁⲩⲱ ⲁⲩⲧⲃⲃⲟ ⲛϣⲣⲡⲙⲓⲥⲉ ⲛⲓⲙ 19ⲁⲓϯ ⲛⲛⲗⲉⲩⲉⲓⲧⲏⲥ ϩⲛ ⲟⲩⲧⲟ ⲉⲩⲧⲟ ⲛⲁⲁⲣⲱⲛ ⲙⲛ ⲛⲉϥϣⲏⲣⲉ ⲉⲃⲟⲗ ϩⲛ ⲧⲙⲏⲧⲉ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲉⲧⲣⲉⲩⲉⲣϩⲱⲃ ⲉⲛⲉϩⲃⲏⲩⲉ ϩⲣⲁⲓ ϩⲛ ⲧⲉⲥⲕⲩⲛⲏ ⲙⲡⲙⲛⲧⲣⲉ ⲁⲩⲱ ⲉⲥⲟⲡⲥ ϩⲁ ⲛϣⲏⲣⲉ ⲙⲡⲓ︤ⲏ︦ⲗ︥ ⲛⲥⲉⲕⲱ ⲛⲁⲩ ⲉⲃⲟⲗ ⲁⲩⲱ ⲛⲛⲉϥϣⲱⲡⲉ ⲉⲃⲟⲗ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ ⲉϥϩⲱⲛ ⲙⲙⲟϥ ⲉϩⲟⲩⲛ ⲉⲛⲉⲧⲟⲩⲁⲁⲃ 20ⲁⲩⲱ ⲁϥⲉⲓⲣⲉ ⲛϭⲓ ⲙⲱⲩⲥⲏⲥ ⲙⲛ ⲁⲁⲣⲱⲛ ⲛⲧⲥⲩⲛⲁⲅⲱⲅⲏ ⲧⲏⲣⲥ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲛⲛⲗⲉⲩⲉⲓⲧⲏⲥ ⲕⲁⲧⲁ ⲑⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ ⲉⲧⲃⲉ ⲛⲗⲉⲩⲉⲓⲧⲏⲥ ⲧⲁⲓ ⲧⲉ ⲑⲉ ⲛⲧⲁⲩⲁⲁⲥ ⲛⲁⲩ 21ⲁⲩⲱ ⲛⲗⲉⲩⲉⲓⲧⲏⲥ ⲁⲩⲧⲃⲃⲟⲟⲩ ⲁⲩⲣⲱϩⲉ ⲛⲛⲉⲩϩⲟⲓⲧⲉ ⲁⲩⲱ ⲁⲁⲣⲱⲛ ϩⲛ ⲟⲩϯ ⲁϥⲧⲁⲁⲩ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁϥⲧⲁⲗⲟ ϩⲁⲣⲟⲟⲩ ⲉⲧⲣⲉⲩⲧⲃⲃⲟ ⲙⲙⲟⲟⲩ 22ⲁⲩⲱ ⲙⲛⲛⲥⲁ ⲛⲁⲓ ⲛⲗⲉⲩⲉⲓⲧⲏⲥ ⲁⲩⲃⲱⲕ ⲉϩⲟⲩⲛ ⲉⲗⲓⲧⲟⲩⲣⲅⲉⲓ ϩⲛ ⲧⲉⲩⲗⲓⲧⲟⲩⲣⲅⲓⲁ ϩⲛ ⲧⲉⲥⲕⲩⲛⲏ ⲙⲡⲙⲛⲧⲣⲉ ⲙⲡⲉⲙⲧⲟ ⲉⲃⲟⲗ ⲛⲁⲁⲣⲱⲛ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉϥϣⲏⲣⲉ ⲕⲁⲧⲁ ⲑⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ ⲉⲧⲃⲉ ⲛⲗⲉⲩⲉⲓⲧⲏⲥ ⲧⲁⲓ ⲧⲉ ⲑⲉ ⲛⲧⲁϥⲁⲁⲥ ⲛⲁⲩ 23ⲁⲩⲱ ⲁⲡϫⲟⲉⲓⲥ ϣⲁϫⲉ ⲛⲁϩⲣⲛ ⲙⲱⲩⲥⲏⲥ ⲉϥϫⲱ ⲙⲙⲟⲥ 24ϫⲉ ⲡⲁⲓ ⲡⲉ ⲡⲧⲱϣ ⲛⲛⲗⲉⲩⲉⲓⲧⲏⲥ ϫⲓⲛ ⲉϫⲟⲩⲧⲏ ⲛⲣⲟⲙⲡⲉ ⲉⲧⲡⲉ ⲉⲩⲉⲃⲱⲕ ⲉϩⲟⲩⲛ ⲉⲗⲓⲧⲟⲩⲣⲅⲉⲓ ϩⲣⲁⲓ ϩⲛ ⲧⲉⲥⲕⲩⲛⲏ ⲙⲡⲙⲛⲧⲣⲉ 25ⲁⲩⲱ ϫⲓⲛ ⲉⲧⲁⲓⲟⲩ ⲛⲣⲟⲙⲡⲉ ⲉϥⲉⲥⲁϩⲱⲱϥ ⲉⲃⲟⲗ ⲉⲧⲗⲓⲧⲟⲩⲣⲅⲓⲁ ⲛϥⲧⲙⲉⲣϩⲱⲃ ⲛϭⲓ ⲡⲁⲓ 26ⲁⲩⲱ ⲉϥⲉⲗⲓⲧⲟⲩⲣⲅⲉⲓ ⲛϭⲓ ⲡⲉϥⲥⲟⲛ ⲉϥⲉϩⲁⲣⲉϩ ⲉⲛⲟⲩⲏⲣϣⲉ ϩⲣⲁⲓ ϩⲛ ⲧⲉⲥⲕⲩⲛⲏ ⲙⲡⲙⲛⲧⲣⲉ ϩⲱⲃ ⲇⲉ ⲛⲛⲉϥⲉⲓⲣⲉ ⲉⲕⲉⲉⲓⲣⲉ ⲛⲛⲗⲉⲩⲉⲓⲧⲏⲥ ⲛⲧⲉⲓϩⲉ ϩⲣⲁⲓ ϩⲛ ⲛⲟⲩⲏⲣϣⲉ
Copyright information for
CopSahBible2