Psa 110 | CopSahBible2 | STEP | ⲁⲗⲗⲏⲗⲟⲩⲓⲁ ϯⲛⲁⲟⲩⲱⲛϩ ⲛⲁⲕ ⲉⲃⲟⲗ ⲡϫⲟⲉⲓⲥ ϩⲙ ⲡⲁϩⲏⲧ ⲧⲏⲣϥ ϩⲙ ⲡϣⲟϫⲛⲉ ⲛⲛⲉⲧⲥⲟⲩⲧⲱⲛ ⲙⲛ ⲟⲩⲥⲩⲛⲁⲅⲱⲅⲏ

Psalms 110

1 ⲁⲗⲗⲏⲗⲟⲩⲓⲁ ϯⲛⲁⲟⲩⲱⲛϩ ⲛⲁⲕ ⲉⲃⲟⲗ ⲡϫⲟⲉⲓⲥ ϩⲙ ⲡⲁϩⲏⲧ ⲧⲏⲣϥ ϩⲙ ⲡϣⲟϫⲛⲉ ⲛⲛⲉⲧⲥⲟⲩⲧⲱⲛ ⲙⲛ ⲟⲩⲥⲩⲛⲁⲅⲱⲅⲏ 2 ϩⲉⲛⲛⲟϭ ⲛⲉ ⲛⲉϩⲃⲏⲩⲉ ⲙⲡϫⲟⲉⲓⲥ ⲉⲩⲙⲟϣⲧ ϩⲛ ⲛⲉϥⲟⲩⲱϣ ⲧⲏⲣⲟⲩ 3 ⲟⲩⲟⲩⲱⲛϩ ⲉⲃⲟⲗ ⲙⲛ ⲟⲩⲥⲁ ⲡⲉ ⲡⲉϥϩⲱⲃ ⲁⲩⲱ ⲧⲉϥⲇⲓⲕⲁⲓⲟⲥⲩⲛⲏ ϣⲟⲟⲡ ϣⲁ ⲉⲛⲉϩ ⲛⲉⲛⲉϩ 4 ⲁϥⲧⲣⲉⲩⲣⲡⲙⲉⲉⲩⲉ ⲛⲛⲉϥϣⲡⲏⲣⲉ ⲟⲩⲛⲁⲏⲧ ⲡⲉ ⲡϫⲟⲉⲓⲥ ⲛϣⲁⲛϩⲧⲏϥ 5 ⲁϥϯ ⲛⲟⲩϩⲣⲉ ⲛⲛⲉⲧⲣϩⲟⲧⲉ ϩⲏⲧϥ ϥⲛⲁⲣⲡⲙⲉⲉⲩⲉ ⲛⲧⲉϥⲇⲓⲁⲑⲏⲕⲏ ϣⲁ ⲉⲛⲉϩ 6 ⲁϥϫⲱ ⲛⲧϭⲟⲙ ⲛⲛⲉϥϩⲃⲏⲩⲉ ⲉⲡⲉϥⲗⲁⲟⲥ ⲉϯ ⲛⲁⲩ ⲛⲧⲉⲕⲗⲏⲣⲟⲛⲟⲙⲓⲁ ⲛⲛϩⲉⲑⲛⲟⲥ 7 ⲧⲙⲉ ⲙⲛ ⲡϩⲁⲡ ⲛⲉ ⲛⲉϩⲃⲏⲩⲉ ⲛⲛⲉϥϭⲓϫ ⲛⲉϥⲉⲛⲧⲟⲗⲏ ⲧⲏⲣⲟⲩ ⲛϩⲟⲧ 8 ⲉⲩⲧⲁϫⲣⲏⲩ ϣⲁ ⲉⲛⲉϩ ⲛⲉⲛⲉϩ ⲉⲩⲧⲁⲙⲓⲏⲩ ϩⲛ ⲟⲩⲙⲉ ⲙⲛⲟⲩⲥⲟⲟⲩⲧⲛ 9 ⲁϥϫⲟⲟⲩ ⲛⲟⲩⲥⲱⲧⲉ ⲙⲡⲉϥⲗⲁⲟⲥ ⲁϥϩⲱⲛ ⲛⲧⲉϥⲇⲓⲁⲑⲏⲕⲏ ϣⲁ ⲉⲛⲉϩ ⲡⲉϥⲣⲁⲛ ⲟⲩⲁⲁⲃ ⲁⲩⲱ ⲟⲩϩⲟⲧⲉ ⲡⲉ 10 ⲧⲁⲣⲭⲏ ⲛⲧⲥⲟⲫⲓⲁ ⲧⲉ ⲑⲟⲧⲉ ⲙⲡⲛⲟⲩⲧⲉ ⲛⲁⲛⲟⲩ ⲧⲙⲛⲧⲣⲙⲛϩⲏⲧ ⲇⲉ ⲛⲟⲩⲟⲛ ⲛⲓⲙ ⲉⲧⲉⲓⲣⲉ ⲙⲙⲟⲥ ⲡⲉϥⲥⲙⲟⲩ ϣⲟⲟⲡ ϣⲁ ⲉⲛⲉϩ ⲛⲉⲛⲉϩ