Sir 8

1 ⲙⲡⲣⲙⲓϣⲉ ⲙⲛ ⲟⲩⲣⲱⲙⲉ ⲛϫⲱⲱⲣⲉ ⲙⲏⲡⲟⲧⲉ ⲛⲅⲉⲓ ⲉⲧⲟⲟⲧϥ 2 ⲙⲡⲣϯⲧⲱⲛ ⲙⲛ ⲟⲩⲣⲙⲙⲁⲟ ⲙⲏⲡⲟⲧⲉ ⲛϥϣⲓⲛⲟⲩⲃ ⲉϩⲣⲁⲓ ⲟⲩⲃⲏⲕ ⲁⲡⲛⲟⲩⲃ ⲅⲁⲣ ⲧⲁⲕⲉϩⲁϩ ⲁⲩⲱ ⲁϥⲣⲓⲕⲉ ⲙⲫⲏⲧ ⲛⲛⲉⲣⲣⲱⲟⲩ 3 ⲙⲡⲣⲙⲓϣⲉ ⲙⲛ ⲟⲩⲣⲱⲙⲉ ⲛϫⲁⲥⲧⲥⲙⲏ ⲁⲩⲱ ⲙⲡⲣⲧⲁⲗⲉϣⲉ ⲉϩⲣⲁⲓ ⲉϫⲙ ⲡⲉϥⲕⲱϩⲧ 4 ⲙⲡⲣⲥⲱⲃⲉ ⲙⲛ ⲟⲩⲁⲧⲥⲃⲱ ϫⲉ ⲛⲛⲉⲩⲥⲱϣ ⲛⲛⲉⲕⲉⲓⲟⲧⲉ 5 ⲙⲡⲣⲛⲟϭⲛⲉϭ ⲛⲟⲩⲣⲱⲙⲉ ⲉⲁϥⲥⲁϩⲱϥ ⲉⲃⲟⲗ ⲙⲡⲛⲟⲃⲉ ⲁⲣⲓⲡⲙⲉⲉⲩⲉ ϫⲉ ⲧⲛϩⲛ ϩⲉⲛⲧϭⲁⲓⲟ ⲧⲏⲣⲛ 6 ⲙⲡⲣⲥⲉϣⲟⲩⲣⲱⲙⲉ ϩⲛ ⲧⲉϥⲙⲛⲧϩⲗⲗⲟ ⲉⲩⲣϩⲗⲗⲟ ⲅⲁⲣ ⲛϩⲏⲧⲛ 7 ⲙⲡⲣⲣⲁϣⲉ ⲉϫⲛ ⲟⲩⲁ ⲉⲁϥⲙⲟⲩ ⲁⲣⲓⲡⲙⲉⲉⲩⲉ ϫⲉ ⲧⲛⲛⲁⲙⲟⲩ ⲧⲏⲣⲛ 8 ⲙⲡⲣⲟⲃϣⲕ ⲉⲡϣⲁϫⲉ ⲛⲛⲥⲟⲫⲟⲥ ⲉⲕⲉⲙⲟⲟϣⲉ ⲇⲉ ϩⲛ ⲛⲉⲩⲡⲁⲣϩⲟⲓⲙⲓⲁ ϫⲉ ⲉⲕⲛⲁⲥⲁⲃⲟ ⲉⲧⲉⲥⲃⲱ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ⲧϭⲓⲛϣⲙϣⲉ ⲛⲛⲟϭ 9 ⲙⲡⲣⲕⲱ ⲛⲥⲱⲕ ⲛⲛϣⲁϫⲉ ⲛⲛϩⲗⲗⲟ ⲛⲧⲁⲩⲥⲁⲃⲟ ϩⲱⲟⲩ ⲉⲣⲟⲟⲩ ϩⲓⲧⲛ ⲛⲉⲩⲉⲓⲟⲧⲉ ϫⲉ ⲉⲕⲛⲁⲥⲃⲟ ⲉⲧⲙⲛⲧⲣⲙⲛϩⲏⲧ ⲉⲃⲟⲗ [ϩⲓⲧⲟⲟⲧⲟⲩ] ⲁⲩⲱ ϩⲙ ⲡⲉⲩⲟⲉⲓϣ ⲛⲧⲭⲣⲓⲁ ⲛ[………] 10 ⲙⲡⲣⲧⲙϩⲉⲛϫⲃⲃⲉⲥ ⲙⲡⲣⲉϥⲣⲛⲟⲃⲉ ⲙⲏⲡⲟⲧⲉ ⲛⲅⲣⲱⲕϩ ϩⲙ ⲡⲕⲱϩⲧ ⲙⲡⲉϥϣ[ⲁϩ] 11 ⲙⲡⲣⲧⲱⲛⲕ ϩⲁⲑⲏ ⲛⲟⲩⲣⲉϥⲣⲛⲟⲃⲉ ϫⲉⲕⲁⲁⲥ ⲛⲛⲉϥϩⲙⲟⲟⲥ ⲛⲑⲉ ⲛⲟⲩϭⲟⲣϭⲥ ϩⲓ ⲣⲱⲕ 12 ⲙⲡⲣϯ ⲉⲙⲏⲥⲉ ⲙⲡϫⲱⲱⲣⲉ ⲉⲣⲟⲕ ⲕⲁⲛ ⲉⲕϣⲁⲛϯ ϣⲱⲡⲉ ⲛⲑⲉ ⲙⲡⲉⲛⲧⲁϥⲥⲟⲣⲙⲟⲩ 13 ⲙⲡⲣϣⲡⲧⲱⲣⲉ ⲡⲁⲣⲁ ⲧⲉⲕϭⲟⲙ ⲁⲩⲱ ⲉⲕϣⲁⲛϣⲡⲧⲱⲣⲉ ϥⲓⲡⲣⲟⲟⲩϣ ⲛⲧⲁⲁⲩ 14 ⲙⲡⲣϫⲓϩⲁⲡ ⲙⲛ ⲟⲩⲣⲉϥϯϩⲁⲡ ⲉⲩⲛⲁⲕⲣⲓⲛⲉ ⲅⲁⲣ ⲙⲙⲟϥ ⲕⲁⲧⲁ ⲡⲉϥⲉⲟⲟⲩ 15 ⲙⲡⲣⲙⲟⲟϣⲉ ϩⲓ ϩⲓⲏ ⲙⲛ ⲧⲟⲗⲙⲏⲣⲟⲥ ϫⲉⲕⲁⲥ ⲛⲛⲉϥⲧⲱⲟⲩⲛ ⲉϫⲱⲕ ⲛⲧⲟϥ ⲅⲁⲣ ⲉϥⲙⲟⲟϣⲉ ⲕⲁⲧⲁ ⲡⲉϥⲟⲩⲱϣ ⲁⲩⲱ ⲕⲛⲁⲧⲁⲕⲟ ⲡⲉ ϩⲛ ⲧⲉⲕⲙⲛⲧⲁⲑⲏⲧ 16 ⲙⲡⲣⲙⲓϣⲉ ⲙⲛ ⲟⲩⲣⲉϥϭⲱⲛⲧ ⲁⲩⲱ ⲙⲡⲣⲙⲟⲟϣⲉ ⲛⲙⲙⲁϥ ϩⲓ ⲡϫⲁⲉⲓⲉ ⲟⲩⲗⲁⲁⲩ ⲅⲁⲣ ⲡⲉ ⲡⲉⲕⲥⲛⲟϥ ⲛⲛⲁϩⲣⲁϥ ⲁⲩⲱ ϥⲛⲁⲧⲁⲩⲟⲕ ⲉϩⲣⲁⲓ ⲉⲡⲙⲁ ⲉⲧⲉⲙⲛⲃⲟⲏⲑⲓⲁ 17 ⲙⲡⲣϣⲟϫⲛⲉ ⲙⲛ ⲟⲩⲥⲟϭ ⲙⲛϣϭⲟⲙ ⲙⲙⲟⲟⲩ ⲉⲁⲙⲁϩⲧⲉ ⲛⲛϣⲁϫⲉ 18 ⲙⲡⲣⲣϩⲱⲃ ⲉϥϩⲏⲡ ⲙⲡⲉⲙⲧⲟ ⲉⲃⲟⲗ ⲛⲟⲩ[ϣⲙⲙⲟ] ⲛⲅⲥⲟⲟⲩⲛ ⲅⲁⲣ [ⲁⲛ ϫ]ⲉ ⲉⲕⲛⲁⲣⲟⲩ 19 ⲙⲡⲣⲟⲩⲉⲛϩⲡⲉⲕϩⲏⲧ ⲉⲣⲱⲙⲉ ⲛⲓⲙ ⲁⲩⲱ ⲙⲡⲣⲧⲁⲗⲉϩⲙⲟⲧ ⲉⲣⲟⲕ