Psa 116 | DED | STEP | Ni KEBUARU kpesi kpesi faiba yeng ubaudumenna negenecac ye songogoc hoanggebade.

Psalms 116

Kebu ye memeficnina

1 NiKEBUARU kpesi kpesi faiba yeng ubaudumenna negenecac ye songogoc hoanggebade. 2 Ye kedzaha nearu faiecac amma ni kecbadesoc kpakpacna yearu kpacba kengkefude.

3 Homecac witicngo dedecnuu homec amaac kengec amma ubaebicngo mendannuu ni ubaebic nga kengecgoc kecma 4 KEBUAC kpac kuneng kpacma yofi deai, “OKEBU, ge kekecna ebicfunac mesina.”

5 KEBU ye wosoefac nga faka dindingacacKEBU . Anutuninango ubamangang anemmeude. 6 Ngicngac negen negengtoangina kpac kecgecKEBUNGO yeni onggongyunuude. Ni memeficac obohobare yeng ebicfunac mesinuec.

7 O ubaongana,KEBUNGO ubangerec homac anggenu naric kecnecac amma ge ruaegoc monggoc kecbesena. 8 Ge ubaongana homecfunac mesima kickumana mekerenggena tifainggema manubacac hanina onggonggenec. 9 KEBU, ni geac kicfu kekecnginagoc yeneac bangecfu kengkecbadeac ifi annec.

10 Ni yofi deai, “Ni kpendzeng kuneng kpema kecduae.” Ni negen negensinggoc kefaiac ebicnasou ifingoc negensinggumangoc kefai. 11 Nga ubaebicnagoc kecma deai, “Ngic sasawa yeni ikocnginagoc.” 12 KEBUNGO ni gombunga anemma wiac sasawa nenu ni naric kecma imocac turunga noc wiac ammiba ngereeudeac obohoude. 13 Ni memengerecac kpakenec mema miacmaKEBUAC kpac kuneng kpacbade. 14 Ni yoacKEBUAC kicfu deseriai, imoc ngicngacfora sasawa yeneac kicfu namma fora meficgebade.

15 KEBUAC ngicngac kpetiac homedae, imocngo yeac kicfu wiac buma kuneng ande. 16 OKEBU, ni geac kingang ngicga amma uangacgaac medac. Gennoc witicfunac mesinunec. 17 Ni ubangerecac sese faigemmaKEBUAC kpac kuneng kpacbade. 18 Ni yoacKEBUAC kicfu deseriai, imoc ngicngacfora sasawa yeneac kicfu namma fora meficgebade. 19 Imoc Yerusareng, geac botuhauKEBUAC ama tacde, imocac amabangecfu ambade.

KEBU eriendzong memini, hallelu Yac.