Ephesians 5

Zhin Ɓo Nkwo Ɓa Da Shekwoyi

1Fye vi Shekwoyi aɓozhin n na aɓo vinya n fye ɓa zhin, shi oɓi ye-yeyi zhin wa shan owo dada nyi. 2Fye ku nu n ye-yei ga aje, fya shan Kristi nwa ye n fyei nyi, wa ga wohin n Shekwoyi akun ngye hadaya, wa ku fye alaifi ya nyi. Ce a da Shekwoyi, ntuge Kristi ye-ye nfve aba, kwo zhin ngye tulare sunda yi nu nwo aba.

3A to sun anagbayin, kwo cegye kwo shakpe n fye min, fye to ye zaho wa sa fye ye n na ɓei pyan. 4A nabari nukwoyi, ɓeda nukwoyi n na awyefan kasayi, ɓato zhin fye nyanun, fye pa aje Shekwoyi alheri ɓo, n wo zhin ga fye nyi fyei zhin godiya.

5Mi ye fya kpe ge, Kristi ebemi, n Shekwoyi ebemiyi kwo to zhin oza nyanu nwo tu cegyen, kwo shakpe woyi gama shakpe woyi zhin eshan gbayi nu. Woi ye anyi nya woi ga ɓa mwa-mwa ndu Shekwoyi. 6Fye to ku vi akwocednayin n ɓa fan ye n laifi nyin, ntuge Shekwoyi minagyi nukwoyi tulo n na aza tukwo nɓa zhin abeye. 7To gyi anugundo n na azai pya yin. 8Gama koda yake n sapai efya bugba ɓei nu-nuyi n wyegmai, n saiye kwonu-nuvi lo n Dagayi buzangna yi, efya ɓe zhin kunce lo ɓa wu lonu. 9Ntu n buzagna ye ɓo n kwo dna n fye nyi fye bwa enya nu zhin n kwo bmiva, n nya yi n kwo zhin gaiciya.

10Fye tumwi fya zhin ɓo n kwo da Dagayi. 11Fye to dnabwa n anyi gmada nukwoyi n wyegmayin, ama fye gnakni ɓa, fya kpeɓa asiri ya. 12Kwo zhin avinyikwo ɓo nu fya sa aɓei pya ye n ya, anyi gmada nukwoyi, n na a tna-ɓefyece zhin yi. 13Ama esa n fya kpe ɓa asiri nya ya, buzagna kwa wu ɓa laifi bmi, sanu n ɓagye oɓa ababwi, azaho nɓa mi, kpekni ɓa ze buzangna aɓi. 14Cenu zhin Shekwoyi woi daɓo, n wo ɓeda wa cige, “Fye kun agyewyi, o, gye-wanyi, fye kukala n efi, Kristi ɓa ga fye buzangna.”

15– 16Fye zhin peceiye shi fye zhin aɓo ntu ge anyipyei aɓodnai nu, fyeto ku ze aza ma-man, fye la ce, fye zhin apma n sai n fye n cei lo, ntu ɓemana zhin ɓo. 17Fye to zhin ɓo n tna nubo zhin, ama fye zhin atna fya kpe enya n Dagayi ye fya zhin. 18To sin eje n, ntuge aɓo nukwoyi lo n mwa n kwo ɓe n cei, ama fye nu-nu n Zafun Gyi-gyi-yi wa dna fye n zokwo.

19Fye ta aza n na ajeyi n Dagayi tukwo, fyei da zabura, fyei kwo anyi agyi-gyi-yi. Fyei kwo anyi ga Dagayi nfye abugbami. 20Fye zhin godiya ntu anya ɓo vinya ga Shekwoyi eyi Dada, dna n eyi Dagayi Yesu Kristi eye mi.

Puwa Asese N Lafiya Yi

21Fye ga Kristi mwa-mwa, fyei gba fyehin tukwo n na aje aba. 22Efye anyikwoza fye ga fyehin n fye aɓa akun, shi fye ga fyehin n Dagayi akun nyi. 23Gama nyi kwoza dna n wo ɓa akun nu, shi ikklisiya dna n Kristi akun nyi. (Wa gawo wye-wyeyi, wa shi kwo bwa, wa ze okwo gniyi.) 24Ntu cenu efye anyikwoza tile fya vi efye aɓa ɓeda, shi ikklisiya zhin kwa vi Kristi ɓeda nyi.

25Efye aɓa, fye ye nfye anyikwo yi, shi Kristi ɓei ye ikklisiya yi, wa fi ntu n kwo ɓo nyi. 26Wa zekwo gyi-gyi yi ntna cegye, n zhan-zhan yi ya n batisma yi n Shekwoyi ɓeda yi. 27Nna abai wa ga wohin tukwo kwo, ngye ikklisiya mwa-mwai ntna ɓenukwoi, kwo laifi ci gusa, n gyigyi yi n tna cegye. 28Nlonu nu aɓa ɓaye nɓa anyikwoyi, ɓei ye n ɓai n gye ɓahin. Shi oza n wo nyikwoi ɓa ku ze gmanyi, ɓai oza ye nwohin nu woi zhin wohin ɓe mana, n wa ye n wo nyikwoyi. 29– 30Oza to lo n wo taye n wohin nayi n. Ama wo ye nkwoi woi zhin kwo ɓo n kwo bmiya. Shi Kristi lura n wo nayi, wato, ikklisiya n yi zhin kwo aganu nyi.

31Shekwoyi ɓeda n la wu pei-pei nge zanugbayi nwo nyikwoyi ɓa zhin nayi gmanyi nu, sanu nkwa ci ncei ge, “Tilas zanugbai wa fa owo dada n owo ʼyai, sanu wa pa mula, n na bai wa nyima owo nyikwo, oɓa ngun aba ɓa ze gmanyi.” 32Mi kpe lo ge kwo dnaɓolo n na awyega bwa ba, ama mi si ɓesi nu ngye shi yi zhin aga nu dna n Kristi nayi nyi.

33Ngye shin ma cige, Tile oza ye n wo nyikwoyi ngye wohin tukwo nyikwoza ce tilas wa zhin atna wa ga owo oɓa mwa-mwa n mwa, woi vi wo ɓeda, woi ciwo, woi gawo mwamwa.