Rom 14 | GbrGAW | STEP | A Fye gwo oza n wo ye wa ɓe da fye kwo owo gaiciya ga kwoi gba kala. To zunwo kni ntuge owo aɓonubozhin wulo gbo n ho nyai, tu aɓo tukwo n kwo bmiya n doi n kwo to bmiyan.

Romans 14

Fye To Ma Aje Bom

1 A Fye gwo oza n wo ye wa ɓe da fye kwo owo gaiciya ga kwoi gba kala. To zunwo kni ntuge owo aɓonubozhin wulo gbo n ho nyai, tu aɓo tukwo n kwo bmiya n doi n kwo to bmiyan. 2 Misali, to na aɓo n woi n na abugyi tukwo n na zun sha ga eshan. Ho ga gaiciya, nya ho to wunya lo nkwon, ama azaje gaiciyaga gba kala lo, ɓa gye kwo zhin nukwoyi nu, ɓata gyi abun sai dai ɓa gyi afintolo, cei ya cece ge ɓa gyi abuyi pya. 3 Aza n ɓa gye kwo to wunya lo ɓa gyi abuyi pyan, ɓato ci aza wyegba n ɓata gyin. Nho ta gyin to gye ɓa laifi n ɓa gyi nyin. Ntuge Shekwoyi la ɓa gwo ɓa ze owo aɓi. 4 Ɓa zhin Shekwoyi a bara nu, ofye nyanu ton oɓa nuwan lo n wo abanu toge nfye aban, Fye fa wa gna ɓa kwo kwo bmiya lo, kwo kwo to bmiya lon, Shekwoyi ɓami wa zhin ɓa ɓa zhin shi kwo kunce.

5 Azaho zhin nubo ge a Yesu viyi ɓa shi a Yahudiyi anyipyeyi asun-sun nya nu bwa, anyipyeyi n ɓa ɓa ga Shekwoyi mwa-mwa n cei, ama aza ho ci ge kwo zhin gbelohi nu nya zenu za zhin aɓei pya, ntuge anyipyeyi vinya zhin Shekwoyi anya nu. Nna beye pya ozaho-zahoi nu ɓa zhin oɓo n kwo kunce. 6 Nho n na anyipyeyi kni hoi ga Shekwoyi mwamwa, ho ye ha lawo tu ho zhin ɓe manayi nu. Nlo nunce oza n wo gyi abu n na zun sha ga eshan. Wo sa Shekwoyi ami ntu nkwo ɓo, wo zhin ɓe manayi nu, oza ce n wo ta to abuyi bwan, wo zhin atna nu wa zhin oɓo n kwo da Dagayi, Woi zhin godiya. 7 Yi to zhin eyihin tukwo adagayi nu n, n yi ɓami ya kni ge yi bwa wye-wyei ko ya fin. 8 Kwo yi n wye-wyei, kwo yi fi yi zhin Dagayi anya nu. Zokwo doho-dohoyi zhin wo anya nu. 9 Kristi ɓei fi wa laka njesun ntu n na aɓeye ɓo nu. N na bai wo ɓa zhin yi Dagayi kwo yi nwye-wyei, kwo yi ku fi.

10 Hoto n iko yi lo ha zun ho zado kni kwo ha ciwo wyegban. Pa ge, ozaho-zahoi n yi mi wo ɓei gni agni gni n Shekwoyi wada a sese ɓa n wada wyi yi. 11 Ntuge, a cei kafi “Shi mi nyi”, nyikutukwo dohodohoi ɓei ce a kwo-kwo n mi abye, nyitala doho-dohoi ɓei ye abui n Shekwoyi aba. 12 Behin-hin, zahozahoi ɓei ga wohin tukwo nyadoku n Shekwoyi aba.

13 Ntu cenu, fye to zhin aje laifi zanshin. Fye zhin atna fya sase, n fye ta zhin ofye do wa ce bwoyin, n na ɓo n wo ɓa gye ho hoi zhin n wo zhin nubwo ge ɓato bmiya lon. 14 Nmi aba, mi kpelo lalle dna n Dagayi Yesu iko, nyaho to wunya lon, n na abu gyi yi n na zun sha ga eshan. Ama, nza gna ge kwo zhin ɓenukwoyi nu, to, wo to zhin m, ntuge n wo aba kwoto bmiya lon. 15 Ngye oho zaho damu lon nyayi n ho gyi, hota zhin yeye ɓe zhin nun, n ha gyi abye n gyi yin. To fa oho nyagyi kwa zhin oza n Kristi wa fi n wo ɓo wa bwin. 16 To zhin oɓo n kwo ɓa ɓe ho n wyegba-ciyi, kwo hoi kpelo ge kwo bmiya lon.

17 Gama aɓo kpakaiayi n yi a Yesu viyi aba, kwo nu to zhin nyagyi n nyasin yi, ama ɓemana, bugba fu, n na agmada yi n Zafun Gyi-gyi-yi aba. 18 Nfya fa Kristi wa zhin Dagayi dna n na ɓeye vinya, aɓa da Shekwoyi. N na azaje yi. 19 Yi zhin atna ya zhin aɓo nɓa ɓa ɓe nbugbafuyi, ya mi aje zhi.

20 Fye to wun Shekwoyi tnu-tnu ya ntu na abu ɓon. Fye pa nge nyaho towun ya lon, n na bugyi yin, ama kwo wunya lo sa nu n kwa zhin ozado wa ce bwonyi. 21 Oɓo n kwo bmiya okwo nu ha fa abugyi, ko jesin, kwo nya zhin n kwo ɓa zhin ohozado wa ce bonyi, wa zhin laifi. 22 Ho ɓami ha kpe ge nyaho to wunya lo n nya yi n ho zhin, kwo n Shekwoyi aba, ama kuce shin hohin, to wu ho gaiciya ga nza aba n kwo ɓa zhin wo wa ce bonyin. N na ɓeye pya, bugba bui-bui da nu oza n wota zhin laifi nɓe yi n wo kpe ge kwo bmiya n. 23 Ama nza kpe ge ɓo nwo ye wa zhin nyi kwoto bmiya lon, wo to zhin kwon wo zhin laifinu woi ya zhin, ntuge wo zhin nubo ge kwo zhin ɓenukwoi nu. Ntu cenu n wo aba kwo to bmiya lon. Nyaho-nyahoi nza zhin woi gye ge kwo to bmiya lon kwo zhin laifi nu.