Gen 46 | HMO | STEP | Israela ese iena kohu ibounai ia haboua, vadaeni ia lao Bere Sieba dekenai. Unuseni iena tamana Isako ena Dirava dekenai boubou gaudia ia henia.

Genesis 46

Iakobo mai ena bese danu idia lao Aigupito

1 Israela ese iena kohu ibounai ia haboua, vadaeni ia lao Bere Sieba dekenai. Unuseni iena tamana Isako ena Dirava dekenai boubou gaudia ia henia.

2 Hanuaboi lalonai Dirava ese mata hanai dekena amo Israela dekenai ia hereva, ia gwau, “Iakobo e, Iakobo e.” Vadaeni Iakobo ia haere, ia gwau, “Lau inai.”

3 Ma ia gwau, “Lau be Dirava, oiemu tamana ena Dirava, oi gari lasi Aigupito dekenai oi lao, badina be unuseni oiemu natuna edia natudia be bese badana do lau halaoa. 4 Lau be oi danu do ita lao Aigupito, bona oiemu natuna ibounai do lau mailaia lou iniseni. Bona do oi mase neganai, Iosepa be oi danu do ia noho.”

5 Vadaeni Iakobo ese Bere Sieba ia rakatania. Israela ena natudia ese edia tamana Iakobo, edia natuna maragidia, bona edia adavana idia udaia treila dekenai. Treila be taunimanima idia guia gaudia, Farao ese ia henidia gaudia. 6 Idia edia boromakau ibounai, bona Kanana dekenai idia davaria kohu ibounai idia abia lao. Vadaeni Aigupito dekenai idia ginidae. Iakobo ese iena bese ibounai ia abia lao, 7 iena natuna tatau, iena tubuna tatau, iena natuna hahine, bona iena tubuna hahine.

8 Israela ena bese Aigupito idia lao taudia edia ladana be inai: Idia be Iakobo mai ena natuna ibounai. 9 Rubena be Iakobo ena vara guna natuna. Rubena ena natuna tatau be Hanoka, Palu, Hesarona bona Karami.

10 Simeona ena natuna tatau be Iemuela, Iamina, Ohada, Iakini, Sohara bona Saulo. Saulo be Kanana hahine ena natuna.

11 Levi ena natuna tatau be Geresone, Kohata bona Merari.

12 Iuda ena natuna tatau be Ere, Onana, Sela, Perese bona Sera. To Ere bona Onana be Kanana tanona dekenai idia mase. Perese ena natuna tatau be Hesarona bona Hamulu.

13 Isakara ena natuna tatau be Tola, Puva, Iobo bona Simarona.

14 Sebuluno ena natuna tatau be Sereda, Elona bona Ialela. 15 Rubena, Simeona, Levi, Iuda, Isakara, bona Sebuluno be Lea ena natuna tau, Iakobo ese Lea dekena amo ia abidia Mesopotamia dekenai. Lea ese danu natuna hahine, ladana Daina ia havaraia. Vadaeni Lea ena natuna bona iena tubuna ibounai be 33.

16 Gado ena natuna tatau be Sipiona, Hagi, Suni, Esabona, Eri, Arodi bona Areli.

17 Asere ena natuna tatau be Imuna, Isiva, Isivi bona Beria, edia taihuna Sera danu. Beria ena natuna tatau be Hebere bona Malekiela. 18 Inai be hesiai hahine Silipa ena natuna, Labana ese iena natuna Lea dekenai ia henia hahine be unai. Iakobo ese iena natuna bona iena tubuna 16 Silipa dekena amo ia abidia.

19 Iakobo ena adavana Rahela ena natuna tatau be inai, Iosepa bona Beniamina. 20 Iosepa ena natuna rua, Manase bona Eparaima be Aigupito tano dekenai ia abidia, Onu ena dubu helaga tauna Potifera ena natuna Asenate ena bogana dekena amo.

21 Beniamina ena natuna tatau be inai: Bela, Bekere, Asabela, Gera, Namana, Ehi, Rosa, Mupima, Hupima, bona Arada. 22 Inai ibounai be Rahela ena natuna bona ena tubuna, Iakobo ese ia dekena amo ia abidia. Idia ibounai be 14.

23 Dano ena natuna tatau be Husima. 24 Napatali ena natuna tatau be Iasela, Guni, Iesere bona Silema. 25 Inai natuna bona tubuna tatau be hesiai hahine Bileha ena, Labana ese iena natuna Rahela dekenai ia henia hahine be unai. Idia ibounai be 7. Idia danu be Iakobo ena.

26 Iakobo danu idia lao Aigupito dekenai, taunimanima ibounai ia ese ia havaraia taudia be 66, to iena natuna edia adavana be idia duahia lasi. 27 Bona Iosepa ese Aigupito dekenai iena natuna be rua ia abidia, unai dainai Iakobo ena iduhu taudia ibounai Aigupito dekenai be 70.

Iakobo mai ena bese Aigupito dekenai

28 Iakobo ese Iuda ia siaia guna Iosepa dekenai, Iosepa ese Gosena vareai dalana do ia hadibaia totona. Vadaeni Gosena dekenai idia ginidae. 29 Iosepa ese iena kariota ia abia hegaegae, Gosena dekenai ia lao, iena tamana Israela danu do idia hedavari totona. Ia dekenai ia ginidae, vadaeni iena aiona dekenai ia rosia, ia tai nega daudau.

30 Israela ese Iosepa dekenai ia hamaoroa, ia gwau, “Harihari lau mase be, ia namo. Badina be oi mauri noho lau davaria vadaeni.”

31 Vadaeni Iosepa ese iena tadikakana bona iena tamana ena orea taudia ibounai dekenai ia hamaoroa, ia gwau, “Do lau lao Farao dekenai, bona do lau hamaoroa, lau gwau, ‘Lauegu tadikakana bona lauegu tamana ena orea taudia ibounai Kanana tano dekena amo idia mai vadaeni, lau dekenai. 32 Idia be mamoe bona boromakau naria taudia. Edia mamoe ibounai, bona edia boromakau ibounai, bona edia kohu ibounai idia mailaia vadaeni.’ 33 Vadaeni Farao ese dohore ia boiria umui dekenai, bona do ia nanadaia, ia gwau, ‘Umui emui gaukara be dahaka?’ 34 Unai neganai do umui haere, umui gwau, ‘Oiemu hesiai taudia ai be mero negana boromakau bona mamoe ai naria ia mai bona harihari, aiemai tamadia bamona.’ Vadaeni Gosena tano do umui noho diba. Badina be Aigupito taudia idia ura henia lasi mamoe naria taudia dekenai.”