Gen 48 | HMO | STEP | Inai murinai Iosepa ese hereva ia kamonai iena tamana ia gorere, vadaeni ia ese iena natuna ruaosi Manase bona Eparaima ia hakaudia lao Iakobo dekenai.

Genesis 48

Iakobo ese Eparaima bona Manase ia hanamoa

1 Inai murinai Iosepa ese hereva ia kamonai iena tamana ia gorere, vadaeni ia ese iena natuna ruaosi Manase bona Eparaima ia hakaudia lao Iakobo dekenai. 2 Vadaeni haida ese Iakobo dekenai idia hamaoroa, idia gwau, “Oiemu natuna Iosepa be oi itaia totona ia mai inai.” Vadaeni Israela ese iena lalona ia hagoadaia, iena mahuta pata dekenai ia helai.

3 Vadaeni Iakobo ese Iosepa dekenai ia hereva henia, ia gwau, “Siahu Ibounai Dirava ese Lusu dekenai Kanana tano dekenai ia sibona ia hedinaraia lau dekenai, bona ia hanamoa lau dekenai. 4 Ia gwau, ‘Momokani lau ese natuna bona tubuna momo do lau henia oi dekenai, idia be bese momo do lau halaoa. Inai tano danu do lau henia idia dekenai, idia edia tano do ia lao, ela bona hanaihanai.’

5 “Oiemu natuna ruaosi, oi dekenai do lau mai lasi neganai inai Aigupito dekenai idia vara memero be lauegu. Manase bona Eparaima be lauegu natuna, Rubena bona Simeona hegeregere. 6 To idia edia murinai oi dekenai do idia vara memero be oiemu natuna korikori. Vadaeni gabeai Israela ena tano idia haria neganai, inai oiemu natuna ese edia kahana be Manase bona Eparaima dekena amo edia ahuna do idia abia. 7 Lau ura inai bamona, badina lau be Mesopotamia dekena amo lau mai neganai, oiemu sinana Rahela be dala dekenai ia mase, Kanana tano dekenai, Eparata do ai ginidae lasi neganai, vadaeni Eparata dala ena badinai lau guria. Egu lalona ia hisihisi bada herea.” Eparata ena ladana ta be Betelehema.

8 Vadaeni Israela ese Iosepa ena natuna ia itadia, ia gwau, “Inai be daika?” 9 Iosepa ese iena tamana dekenai ia haere, ia gwau, “Idia be lauegu natuna, Dirava ese lau dekenai ia henia vadaeni, inai Aigupito tano dekenai.” Israela ia gwau, “Oi mailaidia kahirakahira. Vadaeni do lau hanamoa idia dekenai.”

10 Israela ia buruka vadaeni, unai dainai iena matana idia diburadibura, gau ia itaia namonamo lasi. Iosepa ese memero ruaosi ia abia lao kahirakahira ia dekenai. Vadaeni Iakobo ia kisi henia idia dekenai, bona idia ia rosia.

11 Vadaeni Israela ese Iosepa dekenai ia hamaoroa, ia gwau, “Guna lau laloa be oiemu vairana do lau itaia lou lasi. To Dirava ia bogahisihisi lau dekenai, unai dainai oi bona oiemu natudia lau itaia vadaeni.”

12 Vadaeni Iosepa ese memero ruaosi edia tubuna ena tuina dekena amo ia abidia. Vadaeni Iosepa be iena vairana ia atoa diho tano dekenai.

13 Vadaeni Iosepa ese ruaosi ia abidia edia imana dekenai. Eparaima be iena idiba kahana dekenai, Israela ena lauri kahana dekenai do ia noho totona, bona Manase be iena lauri kahana dekenai, Israela ena idiba kahana dekenai do ia noho totona. Israela kahirakahira dekenai ia abidia lao. 14 To Israela ese iena imana idibana ia atoa gabeai ia vara mero ladana Eparaima ena kwarana dekenai, bona iena imana laurina ia atoa Manase, guna ia vara mero ena kwarana dekenai. Israela be mai ena laloa ta dainai inai bamona ia karaia. 15 Vadaeni Israela ese ia hanamodia, ia gwau:

“Lauegu tubuna Aberahamo, bona lauegu tamana Isako idia tomadiho henia Diravana,
ia ese inai memero do ia hanamodia.
Egu mauri dina ibounai ia mai bona harihari lau ia naria Diravana,
ia ese do ia hanamodia.
16 Dika ibounai dekena amo lau ia hamauria vadaeni aneru,
ia ese inai memero dekenai hanamoa dohore ia henia.
Vadaeni lauegu ladana, bona egu tubuna Aberahamo ena ladana,
bona egu tamana Isako ena ladana,
do idia abia noho, nega ibounai.
Natuna momo do idia abia, bona bese badana do idia lao.”
17 To Iosepa ia itaia, iena tamana ena imana idibana be Eparaima ena kwarana dekenai ia atoa, vadaeni iena lalona ia hisihisi. Bona Iosepa ese iena tamana ena imana ia abia, Manase ena kwarana dekenai ia atoa gwauraia. 18 Iosepa ia gwau, “Tamagu e, unai bamona lasi. Badina Manase be guna ia vara merona, oiemu imana idibana be iena kwarana dekenai do oi atoa.”

19 To iena tamana be ia ura lasi, ia gwau, “Natugu e, lau diba dekenai lau karaia. Momokani ia be bese ta do ia havaraia. To iena tadina ese dohore ia hereaia, bese badadia momo dohore ia havaraia.”

20 Unai dainai unai dina dekenai Iakobo ese hanamoa ia henia idia dekenai, ia gwau:

“Israela taudia ese Dirava dekenai do idia noinoi,
ia ese idia do ia hanamoa,
umui ia hanamoa hegeregere.
Dohore idia gwau, ‘Dirava ese Eparaima bona Manase bamona,
umui do ia halaoa namo.’ ”
Inai bamona dala dekenai Eparaima ia atoa guna, Manase ia atoa gabeai.

21 Vadaeni Israela ese Iosepa dekenai ia hamaoroa, ia gwau, “Lauegu mase be ia kahirakahira vadaeni, to Dirava ese do ia hanamoa umui, bona do ia hakaua umui, vadaeni emui tubuna tamana edia tano dekenai do umui ginidae. 22 Harihari gauna ta danu do lau henia oi, Sekema tano unai, to oiemu tadikakana ibounai be lasi. Amoro taudia dekena amo lau abia, lauegu tuari kaia bona peva ena goada dekena amo.”