Genesis 9
Dirava ena gwauhamata Noa dekenai
1Dirava ese Noa mai ena natuna danu ia hanamoa, ia gwau, “Natuna momo do umui havaraia, vadaeni emui bese be tanobada gabu ibounai dekenai do idia noho. 2Tanobada ena boroma gaudia idauidau ibounai, bona ataiai manu ibounai, bona tano dekenai idia rau gaudia ibounai, bona gwarume be umui dekenai do idia gari. Umui emui imana dekenai ibounai do lau atoa. 3Hari inai mauri gaudia ibounai umui ania diba, ava aniani umui ania vadaeni hegeregerena. Lau ese lau henia umui dekenai, aniani totona. 4To aniani tamona umui ania diba lasi. Vamu mai rarana danu be mai taravatu, badina be rara be mauri ena badina. 5Bema tau ta ese emui mauri rarana ia habubua, lau be davana do lau henia, do ia mase. Bema boroma ta ese umui ia alaia, lau ese do lau hamasea. Bona bema tau ta ese taunimanima ta ia alaia neganai, lau ese davana do lau henia.6“Daika ese taunimanima ta ia alaia,
be taunimanima ese do idia alaia.
Badina be Dirava ese taunimanima ia karaia,
iena toana bamona.
7“Hari ia lao, natuna momo do umui havaraia, vadaeni emui bese be bada herea tanobada dekenai, bona tanobada gabu ibounai dekenai do idia noho.”
8Bona Dirava ese Noa bona iena natuna dekenai ia hereva, ia gwau, 9“Lau ese hari lauegu gwauhamata taravatuna lau henia umui dekenai, bona emui bese dekenai. 10Umui danu idia noho mauri gaudia ibounai dekenai danu inai gwauhamata lau henia, manu bona boromakau bona tanobada ena boroma ibounai dekenai lau henia, lagatoi dekena amo idia diho gaudia ibounai. 11Lau ese lauegu gwauhamata taravatuna lau hamomokania inai: Lau ese abata dekena amo mauri gaudia ibounai do lau alaia lou lasi. Abata ese tanobada do ia hadikaia ore lou lasi.”
12Dirava ma ia gwau, “Inai noho hanaihanai gwauhamata taravatuna lau henia umui dekenai bona mauri gaudia ibounai dekenai, ena toana be inai: 13Lauegu kevau be ori lalonai lau atoa inai. Ia be egu gwauhamata taravatuna tanobada dekenai ena toana. 14Ori lau havaraia tanobada ena ataiai, guba dekenai neganai, bona kevau ia hedinarai ori lalonai neganai, 15lau ese egu gwauhamata umui dekenai bona mauri gaudia ibounai dekenai do lau laloa noho, abata ese mauri gaudia do ia hadikaia ore lou lasi. 16Kevau be ori lalonai ia hedinarai neganai, lau be do lau itaia, bona noho hanaihanai gwauhamata taravatuna, lau bona tanobada ena mauri gaudia ibounai iseda huanai, do lau laloa noho.”
17Dirava ese Noa dekenai ia hereva, ia gwau, “Inai kevau be egu gwauhamata mauri gaudia ibounai dekenai ena toana momokani.”
Noa ena natuna
18Noa ena natuna memero, lagatoi dekena amo idia diho taudia, edia ladana be Sema, bona Hamo bona Iapeta. Hamo be Kanana ena tamana. 19Noa ena natuna toi be inai, idia be tanobada ibounai edia tubudia.20Noa be biru tauna. Ia ese uaina havaraia uma gabu ginigunana ia hadoa. 21Dina ta uaina haida ia inua murinai, iena kwarana ia giroagiroa, bona iena dabua ibounai ia kokia, bona kopina kavakava ia hekure iena palai ruma lalonai. 22Hamo, Kanana ena tamana ese iena tamana ia itaia, ia be kopina kavakava. Vadaeni, ia lao, iena tadikakana ruaosi dekenai ia hamaoroa. 23Vadaeni Sema bona Iapeta ese dabua badana ta idia abia, edia pagana dekenai idia huaia. Palai ruma dekenai idia raka vareai, to edia murina kahana dekena amo idia raka lao. Edia tamana idia koua dabua dekenai, to edia vairana idia giroa lasi, edia tamana ena kopina kavakava idia itaia garina.
24Noa ena inua kekero dekena amo ia noga neganai, ia kamonai dahaka kara dikana iena natuna Hamo ese ia karaia. 25Vadaeni ia gwau,
“Dika do ia mai Kanana ena latana dekenai!
Iena tadikakana dekenai hesiai gaukara momokani do ia karaia.”
26Ma ia gwau,
“Lohiabada, Sema ena Dirava, ita hanamoa,
Kanana ese hesiai gaukara do ia karaia Sema dekenai,
27Dirava ese Iapeta ena bese do ia habadaia be namo.
Iena bese be dohore Sema ena bese taudia danu do idia noho.
Kanana be dohore Iapeta ena hesiai gaukara do ia karaia.”
28Abata murinai Noa ese lagani 350 ia mauri noho. 29Iena mauri lagani ibounai be 950, vadaeni ia mase.
Copyright information for
HMO