Psa 2 | HilAPD | STEP | Ngaa bala nagaplano sing malain ang mga nasyon? Ngaa bala nagaplano sila sang wala sing pulos?

Psalms 2

Ang Hari nga Ginpili sang Dios

1 Ngaa bala nagaplano sing malain ang mga nasyon?
Ngaa bala nagaplano sila sang wala sing pulos?
2 Ang mga hari kag mga pangulo sa kalibutan nagtilipon
kag nagpreparar sa pagpakig-away kontra sa Ginoo
kag sa hari nga iya ginpili.
3 Nagasiling sila, “Indi kita magpadumala
ukon magpasakop sa ila.”
4 Pero ginakadlawan lang sila sang Ginoo
nga nagapungko sa iya trono didto sa langit.
5 Sa iya kaakig, ginapaandaman niya sila kag nagakahadlok sila.
6 Nagsiling siya, “Ginbutang ko na sa Zion, ^{▼▼Zion: ukon, Jerusalem}
sa akon balaan ^{▼▼balaan: ukon, pinili} nga bukid, ang hari nga akon ginpili.”

7 Nagsiling ang hari nga ginpili sang Dios,
“Ipahayag ko ang ginsiling sa akon sang Ginoo nga,
‘Ikaw ang akon anak, kag subong ipakilala ko nga ako ang imo amay. ^{▼▼ipakilala ko nga ako ang imo amay: ukon, ako nangin imo amay}
8 Pangabaya ako nga ihatag ko sa imo ang mga nasyon
hasta sa pinakamalayo nga parte sang kalibutan
para imo panag-iyahan, kag himuon ko ina.
9 Dumalahan mo sila,
kag wala gid sing may makakontra sa imo pagdumala.
Mangin pareho lang sila sa kolon nga imo pagadugmukon.’ ”

10 Gani, kamo nga mga hari kag mga manugdumala sa kalibutan,
intiendiha ninyo ini nga mga pulong,
kag pamatii ninyo ang mga paandam kontra sa inyo.
11 Alagara ninyo ang Ginoo nga may pagtahod
kag magkalipay kamo sa iya.
12 Tahura ninyo ang hari nga iya ginpili, ^{▼▼kag magkalipay…ginpili: Indi klaro ang buot silingon sang Hebreo sini.}
kay kon indi gani, mangakig siya gilayon kag laglagon niya kamo.
Bulahan ang tagsa ka tawo
nga nagapangayo sang proteksyon sa Ginoo.