Psa 3 | HilAPD | STEP | Ang kanta nga ginsulat ni David sang nagpalagyo siya sa iya anak nga si Absalom. Ginoo , kadamo sang akon kaaway; kadamo sang nagakontra sa akon!

Psalms 3

Pangamuyo sa Tion sang Katalagman

Ang kanta nga ginsulat ni David sang nagpalagyo siya sa iya anak nga si Absalom.

1 Ginoo, kadamo sang akon kaaway;
kadamo sang nagakontra sa akon!
2 Nagasiling pa sila nga indi mo kuno ako pagluwason. ^{▼▼Sa Hebreo may sugpon pa nga “sela,” nga indi klaro ang buot silingon. Makita man ini sa bersikulo 4 kag 8.}
3 Pero ang matuod, pareho ka sa taming nga nagaprotektar sa akon.
Ginapadaog mo ako kontra sa akon mga kaaway,
kag ginapabakod mo ako.
4 Nagapanawag ako sa imo, Ginoo,
kag ginasabat mo ako sa imo balaan ^{▼▼balaan: ukon, pinili} nga bukid.
5 Kag tungod kay ginabantayan mo ako,
makatulog ako kag makamata pa.
6 Bisan linibo pa ka kaaway ang nagalibot sa akon,
indi ako mahadlok.

7 Sige na Ginoo nga akon Dios, luwasa ako!
Kay sadto gani ginpakahuy-an mo ^{▼▼ginpakahuy-an mo: sa literal, ginhampak mo sa sag-ang} ang tanan ko nga kaaway nga malain;
ginkuha mo ang ila ikasarang sa paghalit sa akon. ^{▼▼ginkuha…akon: sa literal, ginbingaw mo ang ila mga ngipon}
8 Ikaw, Ginoo, ang nagaluwas
kag nagapakamaayo sa imo katawhan.