Gen 3 | JAE | STEP | Ma moacnê kauc ŋagaô kêlêlêc bôc saleŋŋa ŋagêdô samob, taŋ Apômtau Anôtô kêkêŋ naŋ nêŋ su. Ma eŋ kêsôm gêdêŋ awê gebe “Anôtô oc kêsôm gebe ‘Aniŋ kôm ŋakaŋanô teŋ atom’ me.”

Genesis 3

Ŋamalac sêkac tauŋ su aŋga Anôtônê

1 Ma moacnê kauc ŋagaô kêlêlêc bôc saleŋŋa ŋagêdô samob, taŋ Apômtau Anôtô kêkêŋ naŋ nêŋ su. Ma eŋ kêsôm gêdêŋ awê gebe “Anôtô oc kêsôm gebe ‘Aniŋ kôm ŋakaŋanô teŋ atom’ me.” 2 Go awê kêsôm gêdêŋ moac gebe “Aêac aniŋ kôm ŋakaŋanô, 3 tageŋ ka, taŋ kêkô kôm ŋaluŋ naŋ ŋanô, tec Anôtô kêsôm gebe ‘Aniŋ atom. Amoasac atom amboac tonaŋ gebe amac êndu atom.” ’ 4 Tec moac kêsôm gêdêŋ awê gebe “Op, agêc oc amac êndu atomgoc. 5 Mago Anôtô kêjala gebe amagêc embe aniŋ, go matemanô êpoa lasê ma atôm eŋ tau ma ajala ŋajam to sec.” 6 Ma awê gêlic kaŋanô ma taê gêjam gebe ŋalêwê ŋajam e gêjac mataanô ŋajam amboac tonaŋgeŋ. Tec têtac gêboaŋ gebe êwa nê kauc sa ma kêkôc kaŋanô tau mêŋgeŋ, go kêkêŋ ŋagêdô gêdêŋ nê akweŋ amboac tonaŋ, ma geŋ. 7 Tec agêc mateŋanô kêpoa lasê ma sêjala tauŋ gebe ôliŋ ŋaôma, tec sêgiŋ kalauŋ mêŋsêkic kêtu nêŋ ladôm.

8 Oc kêtu luc acgom, go Apômtau Anôtô kêsêlêŋ gêmoa kômlêlôm. Agêc sêŋô eŋ ma ŋamalac agêc nê awê sêsiŋ tauŋ sêsô ka, taŋ sêkô kôm naŋ, ŋalabu gebe Apômtau Anôtô êlic êsêagêc atom. 9 Go Apômtau Anôtô gêmôêc ŋamalac ma kêsôm gêdêŋ eŋ gebe “Gômoa ondoc.” 10 Eŋ kêsôm gebe “Aê gaŋô aôm gômoa kôm ŋakicsêa e katêc tauc gebe aê ôlic ŋaôma tec kasiŋ tauc.” 11 Go Anôtô kêsôm gebe “Asa kêsôm gêdêŋ aôm gebe ôlim ŋaôma. Aôm goeŋ kaŋanô, taŋ gajac jao gêdêŋ aôm gebe ôniŋ atom naŋ, me masi.” 12 Ŋamalac kêsôm gebe “Awê, taŋ kôkêŋ gebe êwiŋ aê naŋ, kêkêŋ kaŋanô tau gêdêŋ aê, tec gaeŋ.” 13 Go Apômtau Anôtô kêsôm gêdêŋ awê gebe “Aôm gôgôm asageŋ tonaŋ.” Awê gêjô eŋ awa gebe “Moac kêtim aê, tec gaeŋ.”

14 Ma Apômtau Anôtô kêsôm gêdêŋ moac gebe

“Aôm gôgôm tonaŋ,
tec japuc boa aôm êlêlêc bôc malacŋa
to bôc saleŋŋa samob su.
Aôm ôkêŋ ŋa têmtac walôgeŋ
ma ôniŋ kekop e ômac êndu.
15 Ma aê gabe jakêŋ amagêc awê
to nêm wakuc akêŋ kisa êndêŋ taôm.
Eŋ êka aôm môkêmapac popoc
ma aôm ôŋac eŋ êsêp agêbi.”
16 Eŋ kêsôm gêdêŋ awê gebe

“Aê jakêŋ ŋandaŋ taêsam êndêŋ aôm êndêŋ noc ôkêkam ŋapalêŋa.
Ôkôc ŋapalê toŋandaŋgeŋ.
Aôm matam katu nêm akweŋ,
mago eŋ êtu nêm ŋatau.”
17 Ma eŋ kêsôm gêdêŋ Adam * gebe

“Aôm kôkêŋ taŋam nêm awênê biŋ
ma goeŋ ka ŋanô,
taŋ gajac jao gêdêŋ aôm
gebe ôniŋ atom naŋ.
Kêtu tonaŋŋa aê japuc boa nom êtu aômŋa.
Ônam kôm ôim taôm sugeŋ êtôm bêc samob,
taŋ ômoa naŋ, go nom êlôm aôm.
18 Gêŋ têkwa-têkwa to waôŋ êtu nêm kôm ŋanô
ma ôniŋ ŋagêŋgaga.
19 Ônam kôm towaeŋgeŋ,
go ôtap mo sa
e ôtu nom êtiam
gebe aômnêm ŋam gêc nom.
Aôm nom,
tec ômu ôndêŋ nom ôna êtiam.
20 Ma ŋamalac gê nê awênê ŋaê gebe Ewa * gebe eŋ kêtu lau mateŋ jali samob teneŋi. 21 Ma Apômtau Anôtô kêmasaŋ bôc ŋaôlic kêtu ŋakwê ma kêkêŋ gêdêŋ ŋamalac agêc nê awê sêsô.

22 Ma Apômtau Anôtô kêsôm gebe “Alic acgom, ŋamalac kêtôm aêac ma kêjala ŋajam to sec. Galoc tec tajop eŋ gebe êmêtôc lêma naêpip kaŋanô aŋga ka daŋgôŋ mateŋ jaliŋa ma êniŋ e êmoa teŋgeŋ nec atom.” 23 Kêtu tonaŋŋa Apômtau Anôtô kêtiŋ eŋ su aŋga kôm Eden gebe êkaliŋ nom, taŋ kêtu ênê ŋam naŋ. 24 Ma eŋ kêmasuc ŋamalac ma kêkêŋ kerub ** tosiŋ ŋaôsic-ôsic sêkô kôm Eden ŋagamêŋ oc kêpiŋa gebe sejop ka daŋgôŋ mateŋ jaliŋa ŋaintêna. ^{▼▼ Adam ŋam gebe Ŋamalac.}