Revelation of John 5

JON RIITA VEENYI TAR JEYEN HER

1Worek, rii harapa tiikiirek yicharek, ada her harapa jey pochi riiti mama yepak seechi tari, jebwa yepa yepa keyi tar. 7 jebwaka tar pokosheyik ji kiikiireneechi seechi tar. 2Worek, ada kawka harapa hapaga ejel poren hebar. Worek, rii harapa uwachi eecha wor: “Kapo namapa kepi ta mak otiinak, rii kata pokok ji kiikiireneechi seechi tawa jeyen hogo seechikiita?” 3Worek, hekasakech ma por rii howuk takasakech, heyik takasakech, nosap kuruk takasakech, riipa saka kiki siiniga kata jeyen hogo seechiniga hek wonyak. 4Ada ma por rii kata jeyen kiki siichi hogo seechiniga heken yesha otii hipurek, eena ada harapa keya tar. 5Worek, harapa ma por eeka tari rii ana eecha wor: “Opoche keyatanakech. Na he! Laion rii Juda riiti magwik eeka yari, Devit riiti harapa neja yari, rii kapasek boboyen pi poyechi rii eeta kiki sowak riipa 7 pokok ji seechi tawa jeyen hogo seechikiita.

JON RII SIPSIP YI POREN HER

6Worek, ada Sipsip Yi por harapa tiikiir nediik siitii tarek her. Eeta 4 ver tar boboy ye, harapa ma yechaka, riina wukurechi siitii tar. Siitii tarek, Sipsip Yi rii sowakwo hatawa boboyega eecha her. Rii 7 masa mujaka eecha tar. Rii 7 miy tabatar. Dii eeta 7 Spiriten God riita wochirek, eyey nosapek eyey yar. 7Harapa rii harapa tiikiirek yichari, jey riiti mama yepak neekitarin, Sipsip Yi riieeta jeyen yeechi yayar. 8Eecha otiirek, 4 ver tar boboy ye, harapa ma yechaka, Sipsip Yi riiti misomak sakar. Yecha eyey gitaga tawa boboyen neekiir. Eyey gol heebiya taba tarek, kwowa ya tawa boboy eeka tar. Eeta boboy sii eeta ma yecha God riina woshia tawa boboyen eena mukuchir. 9Worek, ye akar hokwan chir:

  • “Miitaba eeta kiki sowa eeta harapa jeyen miita
  • yeechi jir poken heemachikiita.
  • Miina pi sowakwo harek, miiti pik mii God
  • riina man awasen tokochir.
  • Eena mii kiki sowa.
  • Ta ye i tawa ma kawen,
  • eyey akama akama majik batawa ma kawen,
  • eyey ma kawen,
  • eyey nosapek tawa ma kawen,
  • iina miita awasen tokochir.
 10 Miita eecha otiirek, ye poda mabak siirek, ye sokwachi opelen otiitar mak siir. Siirek, yecha God riiti yon otiitar. Worek, yecha diita nosapen neeki yesokwa ma siikiita.”

EYEY SIPSIP YIN RIITI HIN YESOKWATO

11Ada kwoka heri, nokwapa nokwapa ejel her. Tausen tausen her. Yecha harapa tiikiiren siitii wukurer. Yecha, 4 ver tar boboy ye, harapa ma yechaka, harapa ayak uwar:

  • “Eeta Sipsip Yi riin pi sowakwori, riiti hi eeta harapa
  • mayaka tawa.
  • Eena rii eeta kiki sowak, eyey hapaga otii tawa
  • boboyen, hadabas saga kepin, hokwa sokwa kepi hiki
  • tawa boboyen, hapaga tawa boboyen,
  • riiti hin yesokwa yichi tawa boboyen,
  • riipa yakiita.
  • Hadabas howuk tawa boboy kepin,
  • riina woshia tawa boboyen riipa yakiita.”

13Worek, ada meejir, eyey hevenek tawa boboy, nosap tawa boboy, nosap kuruk tawa boboy, eyey pak tawa boboy, eyey boboy eeka tawey, ye hokwa chichar. Ye eecha chichar:

  • “Harapa tiikiirek yichawa ma riita,
  • Sipsip Yi ma riitaka hadabas boboyen sa ya.
  • Hin yesokwa tawa boboyen, riina woshia tawa boboyen,
  • hadabas howuk tawa boboy kepin,
  • hapaga tawa boboyen, rii sa ya!

14Eeta 4 ver tawa boboy ye awasen eecha wor: “Eeta omutiik.” Worek harapa ma ye sakachi piiriiti hi yesokwa tar.
Copyright information for KMO