Job 19

Wambu Peparaeme Namba Kando Yanda Pimwaiyuo Pii Letaminyi, Jopome Leya

1 Jopome isingi lao dopa leya.
Akipamo embame namba yaki nyii nao pii dokome kare kare soo randa joo epelese?
3 Yuu peparae embame namba mona randanyi pyambuo
elya pali napala namba mona kendanyi pyambuli lao lao puu pelene.
4 Dee namba range koo piyunde ramo dokome
apa pyuo emba randa jilyase?
5 Embame namba kandanyi palyili palyili lapala
nambana randa nyipunu dokona namba koo pingi lao suu pilini.
6 Randa doko Anatumi namba jilyamo lao kanda nalese?
Baame namba makande pyuo kandapyasa pilyamo.
7 Baame namba randa joo karamo dokona nambame baa kando mumu lapunupape
mendeme see nalyaminyi.
Dee nambana lao yulu rolae pyakana lao ee lapunupape mendeme see nalyaminyi.
8 Anatumi nambana kata rokapyamopa panya saka nalyo.
Baame nambana kata doko nee pipyasa iminjilyamo.
9 Nee pipala Anatumi nambana bange peparae namba keta see nana lao nyipya.
Nyepala nambana kingi doko kokwa sinyi nembapya.
10 Randa dupwa namba keta mendasa iki see nao epapala pyao bembae lapyasa
mona kara napyamo karo.
11 Randa ipyamo dupwa Anatumi namba imbwuapala lanyuo pao mena rae lenge dopale ingyuo pyao kokwa sinyi nembelyamo.
Nambana yanda pimwai angimi randa joo pirami dokona palyuo jilyamo.
12 Banya yanda singi ami dupwa pena lapyamopa epo nambamoo pipya yanda pyuo
nakamame namba palenge yuu dokona epo kuinya palepe lao kone makapala iso karaminyi.

13 Anatumi nambana yangonge dupwame kyawa yaki nyuo kaena lao pilyamo.
Wambo namba kandenge dupwame wakale ingyuo ii kandele letaminyi.
14 Dopa piminyi dokopa nambana wambu ree palupi puu minyingipi dupwa namba yaki nyilyaminyi.
15 Dee wambu nambana anda yalya kando petenge dupwame namba kame soo kaelyaminyi.
Nambana kendemande wanake dupwame namba wakale kandele letaminyi.
16 Nambana kendemande akali mende kyakale lao poraiyuo nyisinya lao lapunupape
dokona isingi mende laa nalyamo.
17 Namba ŋee ŋaepe lapunu doko enda dokome aiyerono lapala repeta epa nalyamo.
Dee nambana yangonge angi dupwame dopako pilyaminyi.
18 Namba roya karalono dokopa wane dupwame namba kando male male lao giyalya giyana pilyaminyi.
19 Dee nambana puu minyingi angi dupwame namba kandaro sepala awa nalyaminyi.
Wambu nambame mona retenge angi dupwame kapu kyepala kata jilyaminyi.
20 Dopa piminyisa namba moya nao kuli yongopa rambu letamo.
Namba kumuo otapala imbu pyuo karo.

21 Anatumi namba randa jilyamo dokona
nakama nambana puu minyingi dupwame sakame kumuo karalapape.
22 Doko akipamo nakamame Anatumi pipyamo dopaka pyuo namba peta ralimbulyaminyi?
Nakamame namba randa andake joo otapa nalyamisi?

23 Wambu lapome pii nambana larono doko dopa letene lao soo suu pyao
pepa pyao buku dokona retamili yaka lao suu pilyu.
24 Nambana pii doko ane pyanjili dokome kana dokona kiki pyuo pyaraminyi sulu seramopa
wambu dupwame yaka lao kando simili yaka leto.
25 Dopa pyuo lapunupape akali kamame wakasa mende yake panda dokona karamo dokome
lumwa pyuo epapala namba pyuo nyera lao soo otelyo.
26 Nambana yanenge opetae doko anga yakaneme nao kopetame kokwa sinyi nembaramopape
Anatu doko kandalopono.
27 Dee namba rangena lenge angi dokome baa kandaronopa
baa nambana puu minyingi angingyuo karalopyamo.

Nakambame namba koo pingiko lao dee namba keta koo renge palengeko laminyi dokona lao
28 namba mona rando karapu.
29 Dopa pipunupape nakama yasu narami dokona kando karalapape.
Anatumi koo dupwana imbwuapala nakama wua kakupi nenge dokona nyuo pisara ingilyamo.
Dokopa sepala akali koo dupwana lao rolenge doko karamo lao serami. ^{▼▼20:1—30:31Jopo baa banya puu minyingi dupwa pipya pii leyaminyi doko pyasi palamo. Rombo 28 doko kenane dopale mende. Kenane dokome mona palyuo soo nyingi renge doko lakandelyamo. Rombo 29-31 Jopo baa banya yulu dokona lao pii lumwa pyuo leya.}