Psa 65 | KYC | STEP | Anatu, yuu Sayone dokona namwame emba lakandapengeli ingilyamo. Namwame dopa pirama lao lalu lao lenge pii doko minyapenge ingilyamo.

Psalms 65

Ange Lao Lakandenge

1 Anatu, yuu Sayone dokona namwame emba lakandapengeli ingilyamo.
Namwame dopa pirama lao lalu lao lenge pii doko minyapenge ingilyamo.
2 Embame namwana ateŋa pii doko sepala yano pyakange dokonadopa pirama.
Wambu dupwa peparae emba keta epo nakamana koo dupwa polo langyala eparami ingilyamo.
3 Namwana koo dupwame nyuo isa palyingi.
Palyilyamopape embame namwana koo dupwa nyuo kame sakange.
4 Embena rombo palyisi wambu dupwa lanyuo emba pipya role pyao karaminyi dusipa rae maiyuo kararami.
Embena tembole anda yapasi dokona karo
embena keyange rengepe dee bangepe jingi dupwa kapa pyuo nyeramanopa mende yangya nara.

5 Embame namwana ateŋa lenge dupwa yano pyakao namwa keta yulu keyange pyuo
kyawa lete nyuo karenge.
Wambu yuumuu dupwana palaminyi dupwamepe
dee ipwa kota yalo yuu nanesa range dupwamepe emba mupwa kapa pira lao suu pyao karaminyi.
6 Embena porai dokome yuu kyau dupwa waso pisiinyi dokome
embena kamame porai renge dokolasaka pilyamo.
7 Ipwa kota doko kasakole minyuo gono gono lao mango epenge dokopa
embame singinyili pyuo sinya lenge dokopa mee pyai nao rali pingi.
Doko suu pyao wambu kilyipu kilyipu karenge dokopa embame nyuo kui lenge.
8 Wambu yuu muu dupwana peparaeme embena yulu andake pingi dupwa kandapala
yamarangyuo mona pyakalyuo pilyamo karenge.

9 Embame yuu dupwa mondo lao rapu pilyuŋu lao lasaka pyuo apu peelene.
Dopa pipinyi dokona yuu amenge kapape dokona nenge andenge.
Embame ipwa pona dupwa ipwa epo rangu pena lao pingi.
Embame yuu dupwana nenge andena lao peenge.
Embame pingi doko dapa pyuo pingi.
10 Embame yuu ape ape pyasi dupwana apunda malu peelenepa
yuu doko rombe lao singi.
Embame apunda kuki raa raa pyao peenge dokome
yuu dupwa pyuku lapala ee waingi dupwa andena lao pyuo karenge.
11 Embame wambu dupwa elyape keta pisapinyi dokome ee nengepe malu manjo nyilyaminyi.
Emba anja panda anja mendasa pupinyi dupwana nenge malu silyamo.
12 Yuu isako malu andenge dupwana mena sipisipi malu karaminyi.
Yuu kyau dupwana ee nengepe yuu sero karapyasa yuu kyau dupwa ama rae wakasa maiyuo karaminyi.
13 Yuu pau dupwana mena sipisipi dupwame minyarambu nyuo karaminyi.
Yuu lama dupwana witi dupwame minyarambu nyuo ando karaminyi.
Dopa pipyamo dokome bange peparaeme mona pyakalyuo pyao kenane pyao karaminyi.