Gen 43 | LID | STEP | Eme kon Kenan akohok andra-i ta nyamon bwe,

Genesis 43

Nadu Tine Josep Oro Ma Hawe Benjamin A Hamon Ala Ijip

1 Eme kon Kenan akohok andra-i ta nyamon bwe, 2 ano oro aniy kalom mene oro asih badu Ijip ano, badeh Jekop tiye i ta nadun oro, “Ado ka hamon ja kasih rayah nyamon nato ja.”

3 Eme Juda tiye i tan, “I ndramak mene tiye taso anya, i buku none aso bandrei nadu tine aso Benjamin bala bwe, aso winiyan bales bare madan bwe. 4 I buku none ou aseken ta nadu tine aso keme hawe aso badeh, aso ala asih nam nyamon ai. 5 I buku none ou batehei iy bame bwe, i dah kameh aso winiyan bala bwe. Tasah ndramak doh tiye mene anya, i buku none aso bandrei iy bala bwe, aso winiyan bales bare madan bwe.”

6 Ano Jekop anya, “I buku sah ado tiye ta ndramak doh anya, nadu tine ado ari udu aliy? Ado atehei maha ma tikisiy solo-an eme tek.”

7 Eme oro anya, “Ndramak doh ndremenya aso san solo-an. Iy ndremenya lowa aso, ano iy ndremenya anya, ‘Tama ado udu aliy? Ya nadu tine ado ari udu aliy ja de bwe?’ Eme aso badeh tiye tan: tasah aso nane bala tanan bwe, ta budon tan nane anya aso kandrei nadu tine aso nane anya kili bwe.”

8 Ano Juda tiye i ta taman Jekop, “Ou atehei nah keme hawek, ma aso ka-au. Bwe kameh to mari amak ai. 9 Jo le kameh balek udu tan, i buku none jo batiyani iy bame hamon bwe, badeh kameh jo akohok maha ta aliy len jo udu ndra loken udu bolo munyak dah. 10 To are dah abe-en luluwen labai anuhun boho tama to, samada to ndrala ano to ndrame san lusan ai.”

11 Ano tama oro badeh tiye toro, “I buku none badeh handru eh, ado kandrei lakou ta bilin dah katehei ki bolo ndrom tado kewek ki ta ndramak ta atondrok munyak mari badu Ijip: Ado kandrei sese ndrelekei ta resen, rayah bwirik, rayah spais (lakou i buku lei), rayah buwa pistasin, ma hawe almon (buwa kei i buku nyalin). 12 Ado kandrei su-ubek mene udu mada ndrom tado mene kewek, koro-an i doh mene bale ari ndramak ndramaniy ma hawe ado kandrei rayah su-ubek kewek ale ta asih nyamon. 13 Eme ado kandrei nadu tine ado, ado kala ano badeh ado kame hamon suwi. 14 Laban Kindrei kamwekes ndramak doh katikisiy ado, ya i katehei Benjamin hawe nadu tine ado Simiyon keme hamon hawe ado. I buku none naduk uru jo maniy uru, badeh jo winiyan babwidiy se lakou bwe.”

15 Eme oro andrei lakou ta i ta ndramak nane, andrei su-ubek mene udu mada ndrom mene hawe su-ubek rayah ma hawe nadu tine oro Benjamin oro au ala Ijip. Eme oro ala adeu lakou i mine Josep. 16 Eme badeh Josep anyolom Benjamin udu hawe oro le badeh iy tiye tiri lohowan tan ta bwena ta asiu tan, “Kandrei oro lau dah ka asiu tek. Ado kadai ari katin haka ma kajuhiy kudu le, i dah kameh oro aimon nyamon hawek na mada an ronoh la-uh.” 17 Eme ndramak ta lohowan dah anuhun le boho Josep eme iy andrei oro a asiu.

18 Eme oro ala asiu badeh, oro ndranoh, eme badeh oro lomondra, “Andrei to ame dah ta su-ubek mene udu mada ndrom ta tato le ai, len ma mwena handru to ame dah asih nyamon. Ya i dah kameh iri tawi to ma iri kameh andrei iri donki tato ma to kameh asahan bonyo-ou tan.” 19 Udu mada san ta i bolo asiu badeh oro tiye i ta ndramak ta atondrok iri lohowan, 20 “Ou anuhun aso, aso ma mwena handru badeh ndrame dah ndrasih nyamon. 21 Eme aso adek ala hamon badeh aso amadin ben ari ado san, eme aso anya kase ndrom taso badeh, aso atou su-ubek silba aso asih nyamon na aliy mene udu mada ndrom taso. Eme aso ndrandrei ndrame udu hawe aso dah. 22 Ma aso ale andrei su-ubek rayah ale ta asih naso nyamon ja. Aso bala tanan bwe are handru atehei su-ubek silba udu mada ndrom taso.”

23 Ano ndramak ta lahou dah anya, “Ado sabudon ma ado badeh satikisiy. Sebwe Kindrei tado ma Kindrei ta tama ado atehei su-ubek udu mada ndrom tado.” Eme iy anya, “Jo ndrandrei su-ubek tado ta nyamon.” Ano iy andrei Simiyon eme len hawe oro.

24 Ano ndramak ta lohowan dah kuhi oro a asiu. Ano iy asuni gwa ta sikine kati oro ili, ma iy ale anyohan donki. 25 Eme oro lihidiy lakou ta i ta Josep udu le, tasah Josep badeh ndratiye, i dah kameh oro aimon nyamon hawen na mada an ronoh la-uh. 26 Ano Josep eme asiu badeh oro andrei iri lakou nane anya ki tan dah ki bolo asiu hawen. Eme oro ala aluh andri bada munyak i tan. 27 Ano Josep ndremenya oro, “Ado ado mwasin de bwe? Ado mene tiye tek ta tama ado, ya iy udu mwasin ale? Iy bamak bwe le, ma boto-on tan kahis le?”

28 Eme oro tiye, “Laban, tama aso badeh bamak bwe le, iy badeh boto-on tan kahis le.” Ano oro aluh andri i tan.

29 Eme Josep anyolom nadu tinen Benjamin, tasah uru ma la-uh asahan ta badih ari le, eme iy tiye, “Iy doh nadu tine ado bahan ai, ala ado mene asehek tek en.” Eme Josep tiye, “Naduk Kindrei badeh atehei nyosowan i la-um.” 30 Ano badeh Josep ruwani oro, tasah ndrinen eden handru ta nadu tinen oro. Eme iy akohok andra-i handru ma iy ili bolo rum tan ma iy eden. 31 Ano Josep sikine madan, ano iy eme len, iy baden bwe ai. Ano iy tiye iri atiye nyamon eme. 32 Josep badeh udu bada sau ari labai eme nyamon tan ili, ya nadu tinen oro badeh ado rasou labai. Ya iri lau badu Ijip badeh are len labai aimon nyamon tiri labai, tasah iri Ijip badeh winiyan baimon nyamon hawe iri Hiburu bwe, tasah iri Ijip badeh sumukok iri. 33 Eme oro badeh manyah in hamon ta jaha toro. Kadok, ano Bwaneh, ano Silih, ano Sabak, ano Kubwe, ano So-on, i le buku doh ili taku ta iy bahan handru. Oro manyah ado bada sau ya batala oro badeh ili ta Josep. Eme badeh boho oro asak ta anyolom oro ari ari nane manyah ado andri i buku doh. 34 Eme iri badeh akohok nyamon badu bada sau ta Josep badeh i noro. Ya nyamon i na Benjamin badeh solo-an labai, i buku none i na lau limeh. Eme badeh oro aimon nyamon ma a-un gwa ma oro asoh koha oro labwe.