Psalms 10

Yawe, mpo na nini otelemi mosika ?

1 Yawe, mpo na nini otelemi mosika boye ?
Mpo na nini obombani na tango ya pasi ?

2 Moto na mabe, kati na lofundu na ye,
azali kolanda moto azangi makasi ;
bakangami na miango oyo ye abongisi

3 Pamba te moto na mabe amikumisaka na baposa ya motema na ye ;
apambolaka moto ya maboko makasi mpe atiolaka Yawe.

4 Moto na mabe, kati na lolendo na ye, alukaka Nzambe te ;
na makanisi na ye nyonso : “Nzambe azali na esika te”

5 Banzela na ye etambolaka malamu tango nyonso ;
azali moto na lofundu mpe mibeko na yo ezali mosika na ye ;
asekaka banguna na ye nyonso.

6 Alobaka kati na ye moko : “Eloko moko te ekoki koningisa ngai ;
nakozala na esengo tango nyonso, mpe nakozala na pasi te !”

7 Monoko na ye etondi na bilakeli mabe, lokuta mpe moyibi ;
se ya lolemo na ye etondi pasi mpe makambo na mabe.

8 Atelemaka pembeni ya bamboka,
mpe abomaka moto oyo ayebi likambo te na bisika ya kobombama ;
miso na ye etalaka na kobombama batu oyo akani kosala mabe.

9 Atelemaka na kozelaka lokola ntambwe oyo ezali kati ya libulu ;
atelemaka na kozelaka mpo na kokanga bato oyo bazangi makasi ;
akangaka bato oyo bazangi makasi, mpe abendaka bango na monyama na ye.

10 Aniataka bango, bafinanaka ;
bakweyaka na se ya makasi na ye.

11 Alobaka kati na ye moko :
“Nzambe abosana, abombi elongi na ye ; akomona ata moke te !”

12 Yawe telema ! Nzambe sembola loboko na yo ;
kobosana te bato oyo bazangi makasi.

13 Mpo na nini moto na mabe azali kotiola Nzambe ?
Mpo na nini alobaka kati na ye moko :
“Akotuna ngai te ?”

14 Kasi Yo Nzambe, ozali komona bapasi mpe minyoko ;
ozali kotala yango mpo ozwa yango na loboko na yo.
Moto ya pasi amitikaka epai na yo ;
mpe ozali mosungi ya mwana etike.

15 Buka loboko ya moto na mabe mpe moto oyo asalaka mabe ;
benga ye mpe tuna ye mpo na mabe na ye,
kino okomona yango lisusu te.

16 Yawe azali Mokonzi mpo na libela na libela ;
bikolo bikolimwa kati na mokili na ye.
17Yawe, oyokaka baposa ya baoyo bazali koyoka pasi ;
olendisaka bango mpe oyokaka koganga na bango.

18 Okobatelaka mwana etike mpe moto oyo azali konyokwama,
mpo ete moto oyo Nzambe akela wuta na mabele, abangisa lisusu te.