Psalms 138
Nalingi koyemba bosembo na yo
Nzembo ya David
1 Nakosanzola yo, Yawe, na motema na ngai mobimba ;
liboso na banzambe, nakoyemba masanzoli na yo.
2 Nakogumbama na kati ya Ndako na yo ya bosantu,
mpe nakosanzola kombo na yo
mpo na bolingo na yo mpe mpo na boyengebene na yo ;
pamba te onetoli kombo na yo mpe
liloba na yo likolo ya biloko nyonso !
3 Tango nabengaki, ozongiselaki ngai eyano ;
okomisaki ngai molende mpe elombe.
4 Tika bakonzi nyonso ya mokili basanzola yo, Yawe,
tango bayoki maloba ya monoko na yo.
5 Tika bayemba banzela ya Yawe,
pamba te nkembo na Yawe ezali monene.
6 Atako Yawe azali na Likolo,
amonaka bato oyo bamikitisa,
kasi ayebi na mosika bato ya lolendo.
7 Atako natamboli na kati-kati ya bapasi,
yo obatelaka bomoi na ngai ;
osembolaka loboko na yo mpo na kobundisa
kanda ya bayini na ngai,
na loboko na yo ya mobali ebikisaka ngai.
8 Yawe akokokisa makambo
oyo azali kolinga mpo na ngai ;
bolingo na yo, Yawe, ekowumela libela na libela ;
kosundola misala ya maboko na yo te !
Copyright information for
LinMNB