Psalms 143

Tambolisa ngai na banzela na yo !

Nzembo ya David

1 Yawe,
Yoka libondeli na ngai ;
tia litoyi na koganga na ngai mpo na mawa ;
na boyengebene na yo mpe na bosembo na yo
yaka kosalisa ngai.

2 Komema mosali na yo na kosambisama te ;
pamba te moto moko te ya bomoi
azali sembo liboso na yo.

3 Monguna azali kolanda ngai,
azali konyata ngai na se ;
azali kovandisa ngai na molili
lokola bato oyo basiʼbakufa kala.

4 Bongo molimo na ngai elembi-lembi na kati na ngai,
motema na ngai ezali kobanga
na kati na ngai.

5 Nazali kokanisa lisusu mikolo ya kala ;
nazali kokanisa na misala na yo nyonso
mpe kotala misala maboko na yo esalaki.

6 Natandaki maboko na ngai epai na yo ;
molimo na ngai ezali na posa na yo,
lokola mabele ya kokawuka.

7 Zongisela ngai eyano noki-noki, Yawe ;
molimo na ngai ezali kolemba ;
kobombela ngai elongi na yo te,
soki te nakokokana na bato oyo bazali kokita na libulu.

8 Tika tongo ememela ngai maloba ya bolingo na yo ya makasi,
pamba te natiaka motema na ngai epai na yo ;
lakisa ngai nzela oyo nasengeli kolanda,
pamba te epai na yo, natomboli molimo na ngai.

9 Kangola ngai na monguna na ngai, Yawe ;
pamba te namibombaka kati na yo.

10 Teya ngai mpo nasalaka mokano na yo,
pamba te yo ozali Nzambe na ngai ;
tika ete Molimo na yo ya malamu ekamba ngai
na mabele oyo ezanga mabulu.

11 Mpo na kombo na yo, Yawe,
batela bomoi na ngai ;
na bosembo na yo, bimisa ngai na minyoko !

12 Kati na bolingo na yo ya makasi
kanga minoko ya banguna na ngai,
panza bayini na ngai nyonso
pamba te nazali mosali na yo.