Psa 15 | LinMNB | STEP | Nzembo ya David Yawe, nani akovanda na ndako na yo ya kapo ? Nani akovanda na ngomba na yo ya bosantu ?

Psalms 15

Nani akoki kovanda na Nzambe ?

Nzembo ya David

1 Yawe, nani akovanda na ndako na yo ya kapo ?
Nani akovanda na ngomba na yo ya bosantu ?

2 Ezali moto oyo atambolaka na ndenge oyo ezangi pamela,
oyo asalaka makambo ya bosembo,
mpe oyo alobaka makambo ya solo
oyo ewutaka na motema na ye ;

3 oyo asalelaka lolemo na ye te
mpo na kotonga bato ;
oyo asalaka mabe na moninga na ye te,
oyo abebisaka moninga na ye te ;

4 oyo atalaka pamba moto oyo asalaka mabe,
kasi atosaka baoyo babangaka Yawe ;
oyo abatelaka ndayi na ye,
ata soki yango epesi ye pasi ;

5 oyo asengaka litomba te likolo ya mbongo oyo adefisi,
mpe andimaka likabo te
mpo na kokweyisa moto oyo asala likambo te.
Moto oyo asalaka makambo oyo, akoki koningana te.