1Cor 5 | MCQ | STEP | 'Ene vu'a ka'ene 'waravu'e hijujaho ijí joni vajijaho ea hine 'uasa veju. Ijí 'uasa vejuri 'unama kajaho niho'o Jenitarua puni vaja pareji'ini renu. 'Ene ea pina omahoni napara turame oji'i hinu.

1 Corinthians 5

Sosi Vaji 'Uasa Vejuji 'Uraraha 'Waramajina

1 'Ene vu'a ka'ene 'waravu'e hijujaho ijí joni vajijaho ea hine 'uasa veju. Ijí 'uasa vejuri 'unama kajaho niho'o Jenitarua puni vaja pareji'ini renu. 'Ene ea pina omahoni napara turame oji'i hinu. 2 'Ene ja ijihuna'e kehi kehi o'i kaivo patemukavu. 'Ena'omo maijaho ja temuka apene ea ka'ene joni vaji ija'ina'e venajaho ranave samai vahune sa'inijaho avaju. 3 Ijihuna'e nununa'ijaho nuni hahijaho ijá pahinu kaivo nuni 'avenijaho ijí ja pu'úmo hinujihuna'e na ijí ea ka'ene sisea kaji venujaho eha mahuta. Areri na hahiji'i ijino hi'uja'ina'e vejuta. 4 Ja núni Natohwa Jesu Keriso oni iha 'ahi roe vea ka'ene ahu'avajaho na 'avena vajijaho ja pu'úmuna. 'Ene nuni Natohwa Jesu Keriso oni haruriji'i ijina. 5 'Ena'omo ea ija'inijaho Setani mahakame hura huni haha ruaraha parahuna vwihajuta. 'Enakaivo huni 'avenijaho Natohwa Jesura ro'amani veijaho marahuna. 6 Jara jarika'e rejujaho mai'o maa pa'ana. Ja isitia ma'u'umaijipo harava maho'o arumau'e ni'ima'ura'e renujaho ja vi kivure? 7 'Enakúne isitia sahasijaho ato'aruvakame ja harava maiu'ina'e re'avara. Ijihuni maijaho ja venaume harava isitia pa'ana'e rejara. Ijihuni maijaho Keriso ka'ene núni Pasova ijaho apene núnijihuna'e swasa vejara. 8 Roe nú ijihuna'e sora ijava. Harava ka'ene isitia sahasi jihunijaho pane 'ee isitia ka'ene sisea vwihajujaho pane 'ee siseijija pana. 'Enakaivo harava isitia pa'ana ka'ene nimaa nimaa 'ee ariramaajino vena ijava. 9 'Enajihuna'e na nuni asura vaji vene 'waravujaho ja ea ka'ene marisi 'uasa veji'inijihi pu'úmo paahuhuna'e 'waravuta. 10 'Enakaivo na mwe'akino ea ka'ene 'uasa vejujihi rone 'warahuna pana. 'Ene ea ka'ene uneunecha rukina'e rehuna itunavi'inijija pane 'ee nesa apeji'inijija pane 'ee godi ira'ata oja mihi'inijija pana. 'Enakaivo na ijihi rone 'wara'ipisa ja mwe'akaho arema vaa'a. 11 Nimaa'e na joni asura vene ea ka'ene nimaa roji'ina 'i'ika'i 'uasa veji'ina 'ee ea 'ahopuni kukua kima itunavi'ina 'ee godia ira'ata oja mihi'ina 'ee ea ira sisea 'waravi'ina 'ee ea ka'ene toa sisea isa'ora 'ee ea ka'ene nesa apeji'iniji'i paahume 'ee 'iruma paihuna'e rone vejuta. 12 Irakijihuna'e na ea ka'ene samai hijujija namahune? 'Ú ja ea ka'ene sosi vaji hijujija panamahune? 13 'Enakaivo ea ka'ene samaumai hijujija Godira 'otua vetihuna. 'Enakúne ea sisea ka'ene joni vaji hinujaho ranave samai va'ama.