1Cor 9 | MCQ | STEP | 'Ú na pamataume ojura raka? 'Ú na apasorua pana raka? 'Ú na nuni Natohwa Jesu Kerisoho pakavuta raka? 'Ú ja nara kaukara kisina ka'ene Jesuni vaji vejujihuni eha pana raka?

1 Corinthians 9

Apasoru Huni Harura 'Ee Huni Kaukara Ijihuni Vu'a

1 'Ú na pamataume ojura raka? 'Ú na apasorua pana raka? 'Ú na nuni Natohwa Jesu Kerisoho pakavuta raka? 'Ú ja nara kaukara kisina ka'ene Jesuni vaji vejujihuni eha pana raka? 2 Ea 'ahopo na'iijaho na apasorua pana kaivo jonuna'ijaho na apasorua. Ijihuni maijaho jara Godoni ea rene hijujara najahujaho na Natohwi jihuni apasorua. 3 Ja ea ka'ene na piuhiha ki'i 'ahiu'e vejujihi puni eha ijaho ikena. 4 'Ú núni harura 'iruma 'ee toa ijihi ihuni 'aha panavu raka? 5 Apasorua 'aho'a 'ee Natohwi jihuni 'u'uhija 'ee Sipasi epo napahwa ka'ene nimaa roji'inijija 'ee napara ka'ene nimaa roji'inijihi pu'úmo kaukara vene ojuja'ina 'ú nú 'u'o ija'ina pave'eja raka? 6 'Ú nú Panapasi'i kaukara ka'ene nú 'unúnamúe ni'ajú'eju'e va'uji arehuna núni harura panamu raka? 7 Irara sorutia'e renujihuni anejijaho ori'ini venune? 'Ú ea irara ajina 'onare'e ijihuni maijaho painune? 'Ú ea irara sipia 'ee kotia 'ajohare'e ijihipuni mirokia painune? 8 Na ema puni 'unamiji namahare'e rone 'waravu raka? 'Ene varapa tamanijaho ijí 'u'o pa'waramana raka? 9 Ijihuni maijaho Mosisi oni tamana vaji ika'ina'e vene 'waravara. Purumakaui ajime tautae oja ka'avajaho ja paki'eje huni ura kuatana arinama'ava. 'Eju'e Godiho purumakaua kajaho pavwihanuna raka? 10 'Ene Hu núnijihuna'e ahume 'waramu raka? Kaena! Núnijihuni hahi Godoni ira vaji ika'ina'e vene 'waramana. Ijihuni hahi ea ka'ene soa apene soa sa'amajaho hu vwihanujaho ijihipuni maa 'ekahuna ronuna. 'Eju'e ea ka'ene uja jaheji'inijaho uja jaheji'i 'aho'a ihuna vwihaji'i jahenuna 'úmana. 11 Nú 'Avenahuni uneunecha joni vaji 'ojara. 'Enajihuna'e 'ú nú joni vaji haha huni 'unamijino uneunecha jonuna'i 'ekahunijaho jonuna'a ahija'e reju raka? 12 Ja ea 'aho'a ni'aji'avajaho núni harura panamuna'omo nú 'u'o paasisama huri ni'ajúhuna raka? 'Enakaivo nú harura ikaho paapene ija'ina vejara vo nú uneunecha maho'o puni vajijaho kirasahe va'ara. Ijihuni maijaho nú vu'a maa maiu'ina tanume akarekaro uraname nahuna ura parenúana. 13 Ea ka'ene Temiporu vaji kaukara vejujija 'iruma ka'ene ijí Temiporua kaji 'eke roujino ijujaho ja mai'o pahejo? 'Ene ea ka'ene swasa vejujija 'iruma ka'ene swasa ve'avarono 'eka roujino ijujaho 'ú ja mai'o pahejure? 14 'Ene 'u'o Natohwijara ea ka'ene vu'a maa maiu'ina najahujihi 'waramajaho pura vu'a maiu'ina ka'ene najahuri toi puni 'iruma piunime ina vahuna. 15 'Enakaivo na mai'o uneunechakija na mai'o pa'eke ojuta. 'Ene nara asura ka'ene vejukaho vejakame ja nunijihuna'e ve'avarono na paveju. 'Enakaivo mamaijaho na kwa'ipisa ijara areri rejakame nara kaukara ka'ene eha pa'a najahu jihuni pinana pa'ana'e reja'a. 16 Ijihuna'e na vu'a maa maiu'ina naja'ujaho na ijihuna'e pakehi kehi ohuna. Ijihuni maijaho na ijihuni hari hihuna. Na vu'a maa maiu'ina kaji parone 'wara'ujaho nununa'a sisea. 17 'Ene kaukarakaho nara ma nuni ura ijino matauma vejuta'e re'ipisa na eha apehuna'e reja'a kaivo Godira na iji pijiharena ike kaukarakaho na 'ajohi'i ve'urono mihajihuna'e ivi'a unenu'u pina nara kara'aja vehuna pana. 18 Nuni eha ijaho irake? Vea ka'ene na vu'a maa maiu'ina ike rone najahujaho na ja unenu'u pina pajariravuta. Areri nuni harura ka'ene ike vu'a maa maiu'ina toakino na vehune sa'inijaho na pavejuta. 19 'Ena'omo na iviamaa emaapuni una'ijaho mataume oju. Ijihuni maijaho na ea maho'o puni pwea rejuta'omo na ea maho'o venae Keriso una'i ro ranahuna. 20 'Ene Jua puna ijaho na areri pua'e vena'e Keriso una'i ro'ava ronarejo Jua puna'i hijuta. 'Ene ea ka'ene tamana hari hijajaho na areri tamana huni hari hijuta kaivo na nimaa nimaa tamana hara pahijuta. 'Ene ea ka'ene tamana huni hari hijaji venae Keriso una'i ro'ava ronarejo avajuta. 21 Ea ka'ene varapa hara pahijujihija na pua'ina'e rejuta kaivo Keriso oni tamani jihuni hari hijuta. 'Ene venae ea ka'ene Godoni varapa hara pahijujipo Keriso oni ro para'avarono avajuta. 22 Ea ka'ene ajuasi'inijihi puna'ijaho na ajuasina'e rejuta. 'Enareje pua venae Keriso una'i ro'ava ronarejo avajuta. Na ea maho'o puna'ijaho na uneunecha maho'o re ranavuta. 'Ene are'eje na maho'o pua'e ni'ajihuma ronareno avajuta. 23 'Enajihuna'e na vu'a maiu'ini jihuni hahi uneunecha maho'o veju. 'Enajihuna'e na ea pina ka'ene ijihuni eha apehunijina. 24 Ja pavwihajo? Ea ka'ene chacharame ninukujahujaho ea maho'o ninukujahura kaivo ea kwinu eha apenuna. 'Enakúne eha apehuni 'unamijino chacharame ninukujaha. 25 'Enajihuna'e ea ka'ene tacharavujija pu uneunecha maho'o hami akuavura. Ija'ina ka'ene pu vejujaho pu eha ka'ene pa'arehuniji ape'irono avajura. 'Enakaivo nú eha ka'ene papa'arehuniji apehuna. 26 'Enakaivo na pamajikari vwihaji'i ninukujahu ja'ina'e vejura. Na pamajikari arasarame nuni ija maiji ichutoi mwame 'aniu ja'ina pavejura. 27 'Enakaivo na nuni hahijaho hami akume veju'e nuni pwea renuna. Na juvujaho vejuro'i na ea naja'ika'i nara eha ka'ene apehuniji asusame paapehunijaho areri pana.