Col 4 | MCQ | STEP | Pwea puni mama'ine pwehu jona arira 'ee mamaa 'ahi'avara. Ijihuni maijaho ja niheju. Ja 'u'o joni Ni'ina kahi akúpi 'ahina.

Colossians 4

1 Pwea puni mama'ine pwehu jona arira 'ee mamaa 'ahi'avara. Ijihuni maijaho ja niheju. Ja 'u'o joni Ni'ina kahi akúpi 'ahina.

'Unama Ichá'ina Siporua 'Ohune 'Ee Kara Ichá'ina Hihunijina

2 'Enakúne siporua'e 'oja maha paranareje hami 'ajoaravi'i teimani roji'i 'o'avara. 3 'Ene núni siporua 'u'o 'onu'avara. 'Ejakame Godira ira ikehuni vwicha núna jaraakame nú Keriso oni hemijaho areri 'wara'avara. Na 'u'o ijihuna'e tipurai hiju. 4 'Ejakame na hemijaho veje samaa'e re'eje nara 'warahuni ja'ina'e 'warauta. 5 'Ene ea ka'ene samai hiju jihipuna vwiha mamaiji vwihaji'i ja iraka ka'ene ve'avajija hami ve'avara. 'Ene vea mamaa ape'avajaho vea kajaho hami ape'avara. 6 'Ene veje joni vu'a iraka ka'ene 'wa'avajija na'ia mapoka maiji vwihaniuji misa puna'i save vwea re'eje 'waravakame jara ichá'ina'e pu eha vetihunijaho ja hena ka'avara.

Túchamaa 'Ajoramajina

7 Tichikasi ka'ene núni vwea nú oja mahi'ina 'ee uchaha pa'ana ka'ene Natohwi jihuni pweijara nuni vu'a ichá'inijija apena vu'e 'warahuna. 8 Ijihuni hahi jihuna'e na hu ranavu'e vu'u. 'Ejakame núra ichá'ina ka'ene hijujaho ja hena kúme 'ee hura vu'a ni'ajihe 'warave joni oja sonahihuna. 9 Onesimasi ka'ene núni vwea nú oja mahi'ina ka'ene uchaha pa'aji'i hu'úmo ranavu'e rou. Hu joni ea pina'omo pura roe 'unama maho'o ka'ene ikino rejujija 'warahuna. 10 'Ene Arisitakasiho na hu'úmo tipurai hinuna'omo ijara ja 'ajoramu 'ee Panapasi oni vwina Maka ka'ene ja hununa'i vu'a 'aho'a hejajara joni roa ka'avajaho 'ajome 'ahe'avara. 11 'Ene Jesu ka'ene Jasitasina 'wavujaho 'ee ea ikipo pupuso Godoni arijihuni kaukara veji'ina ka'ene sisa 'uhua'ini jihipuni vajijaho rena roara. 'Ene pu na areri ni'ajihume kivuta. 12 Ipaparasiho joni ea pina ka'ene Jesu Keriso oni pwea pinijara ja 'ajoramu. Hu na'ia mapoka jonijihuna'e siporua nimaijino 'onuna. 'Ejakame ja kirasahe Godoni ura ijija maho'o hene kime areri renahuna. 13 Ijihuni maijaho na hu hena kavujaho hu joni oja ni'ima'ura'e vwihaniuna. 'Ene ea ka'ene Reatisia hijura 'ee Haiaraparisi hijujija 'u'o oja ni'ima'ura'e vwihaniuna. 14 Ruku ka'ene núni juketa nú oja mahi'inijara 'ajoravu'e 'ee Timasi 'u'o 'ajoramu. 15 Vwehija ka'ene Reatisia hijujija 'ajorame 'ee Nemipaho 'ee sosia ka'ene huni sei ahuvujija 'ajora'avara. 16 Vea ka'ene asura ike joni vaji tahe pa'are'amajaho Reatisia sosia vaja 'u'o ta'avara. 'Ene joni vea rejakavi'i nuni asura ka'ene Reatisia rena rouji ta'amana. 17 'Ene Achipasi 'wara'avara kaukara ka'ene hura Natohwi jihuni vaji apenajaho hami na'ia mapoka ve'amana 'wa'avara. 18 Na Porura nuni iji ike 'ajoravujija veju. 'Enakúne na tipurai hijujaho vwihani'avara. 'Ene maiji vwihaniujaho ja pu'úmuna.