Heb 12 | MCQ | STEP | Ijihuni hahi ea mapoka mapoka 'imiti epuna'i sama outúhe hina kúvi'i hiju. 'Enajihuna'e raka ka'ene Godoni ura ijí veju'e tanumuji ani irechaha. 'Ee sisea ka'ene veku veko núni vwiha vaji mumuji ani irechaha. Raka ka'ene apehuniji ape'iro mají hine ninukujahi'i na'avara.

Hebrews 12

Godi Núni Omijine 'Ee Jesura Venuja'ina'e Nú Vehuna

1 Ijihuni hahi ea mapoka mapoka 'imiti epuna'i sama outúhe hina kúvi'i hiju. 'Enajihuna'e raka ka'ene Godoni ura ijí veju'e tanumuji ani irechaha. 'Ee sisea ka'ene veku veko núni vwiha vaji mumuji ani irechaha. Raka ka'ene apehuniji ape'iro mají hine ninukujahi'i na'avara. 2 Jesu ka'ene núni nimairoa anejijine 'ee aneja rena va'e uri usehunijina. 'Enajihuna'e núni nia Hu kavi'i vahuna. Hu korosi 'ahi ahija apeji'i jumana vo ijí Hu juma kajaho semana. Hu ija'ina venajihuni maijaho Hu túna'i teamahuniji apehuni jihuna'e avanana. 'Ena'omo Hu iviamaa akúpi 'ahi Godoni toronu ija mana'inija'i asuma hinu. 3 Vwihaha! Ea sisemaa ijipo Hu sise'i 'ahaume haha hiama paranana. 'Enakúne ahija ija'ina apena va'avajaho pasenave are'avara. 4 Ja sisea vaji hina ruaraha roi'i pivusaha kwa'asunavara vo mai'o pakwavara. 5 Ja Godoni harihiji jihuna'e Hura ja ni'ajiharena vu'a ka'ene 'waramajaho runamio? Hu ika'ina 'waramana

Nuni harihe! A Hu túchahakame Natohwijara eha ma'amajaho a Hu pamakame 'ee ara Hu túchahauji Hu ijí rona 'waramajaho pasena'amana. 6 Natohwijara oja mihi'inijipo Hu túchahaujaho eha mihuna. 'Ene ea irara Huni hariha nimaa renajara túchahaujaho Huni harihi jihuna'e eha mahuna 'iamana.
7 Godira ja ija'ina 'ahi'amajaho vwiha'avara. Ja Huni harihiji jihuna'e aahi'ena. 'Ú ja vi hejajaho hariahi vu'ataa pahenajaho omaha kora pa'warame 'ee pa'anaune? 8 'Enavo ja Godi túchaha va'eje Huni harihija 'ahiu ja'ina'e eha pamiha ka'avajaho ja oma pa'ana. 'Ene ja nimaa Huni harihija pana. 9 'Enavo mwe'a kehuni omijipo pu kú'eju'e nú areri parehuniji veju'e pu ruruvujaho puni hura vejura. 'Ena'omo núni omijihipuni ira hene hura vejuja'ina'e akúpa huni Omijara eha múha ka'avajaho teamana'eje Huni hura venareje majama hi'avara. 10 Ijihuni hahi núni opijijija pu raka ka'ene kima heju'e maraju jihuna'e pu juara ma'uako hiji'i 'anúe kora 'waravura. 'Enakaivo Godira nú eha ka'ene múhujaho Hu nimaa 'ahi nú maranúhuni jihuna'e venuna. Ijihuni hahi nú Huni ariramaijaho ahuma apehuna. 11 Vu'ataa paheju'e 'aniujaho hianavu jihuna'e tea pamanavura. 'Enakaivo ea ka'ene ija'ina 'ahiujija túna'i pu ea mamaa re'eja.

'Unama Ichá'ina Vehunijine 'Ee Jujuvu'a

12 'Enakúne ija jona ka'ene harura pa'arenaujaho harura vene 'unaha. 'Ene joni atoka ka'ene irimanamujaho harura vena 'urine namina va'a. 13 'Ene jara mumora ka'ene namina vahuni 'unamijaho amairie arira renama. 'Ejakame ja 'ararihia vu'ujija pu irimae harura pa'arenaujija namina pivusaha arihura vo pu kú'o harura rukina reja. 14 'Enakúne ea 'aho pu'úmo oja sonaravi'i hi'avara. 'Ene ani ani pavene 'ee 'unama ariramaiji vehunijara ituna'avara. Ea irahipo ariramaa pa'ana re'avajaho Natohwijaho pakahuna. 15 Ja ea 'aho pu'úmo ni'ajara'irakúne Godoni mavwihani'inijaho pu paasina'avara. Ea sename temukame ajinavakame 'uraarahuni ira ea 'warahunijaho 'ajoara'avara. Ija'inijara reju'e ea mapoka siseraniura. 16 'Enakúne joni vaji ea 'aho'a 'uasa pavene 'ee Godi pamatahareje Isora venaja'ina pave'avara. Hu 'iruma huni hahi poka huni harurijaho 'u'ua huna'i 'imenana. 17 'Ena'omo túna'i hu omahoni merajihi'iniji ura rena paranana vo paapenana. Hu huni sisea pavwihana arema jihuna'e asinamarena nirama mi'imi'imana. 18 Ja mai'o Isureri opo Sainai huri'a ka'ene vena ni'ima'ura rene 'ee temukame 'ee hwasisiapo 'utihi'i 'e'u'eme Godira Huni varapa mihaja'ina ja mai'o pavwevara. 19 'Ene pu ijí he'eme tauja ajira 'umene 'ee vu'a 'wara'eme iruno'ijara ataa 'ejahaa parajumakame Godi tanu'urahe vu'a pa'wara'amarono 'waravara. 20 'E'ejume Godira ika'ina 'waramajaho huri'ake hanuhi vwe'amajaho muni 'anie kwamana 'i'eju'e tea junavu'e tihi tihi juhahi'i hejara. 21 Mosisi raka ka'ene ijí renaji kamarena hu 'u'o tea juvumakame na 'u'o tea junime 'ee tatotima paraniu 'iamana. 22 'Enakaivo ja Saiani Huri'i Godi ka'ene majama hiji'ini jihuni ara kwai roara. Ara kwaa kajaho akúpa huni Jerusaremijina'omo Godoni 'ona oji'ina mapoka mapoka areri patahuna ijí hiju. 23 Godoni harihija amura ka'ene puni iha kahi akúpa 'ahi veju'e navi'inijipo ahuvuri tinijino ja niroara. Godi ka'ene 'otua vetihuni anesuri jihuni roara. 'Ene ja Godoni ea ka'ene kwamasaha jihipuni 'avena ka'ene ariramaijipo hijuri tiniji roajivara. 24 Ja vu'a maiu'inijara 'warama ja'ina'e Jesu ka'ene Godiho 'ee emaa ijihipuni rira mu'oi hinujihuni roara. 'Ene ja 'aa ka'ene ijikumajara Eporu oni 'aa asima ira mamaa 'warama jihuni roara. 25 Godi ka'ene ja 'waramu jihuni ira hena ve'avara. Isureri ora pu Mosisi oni ira hene pavejajaho eha sisea apejara. Mosisi Hu mwe'a ke'ura vo nú akúpa huni Godiji túchaha'avajaho ja vwihajujaho nú eha paapehuna. 26 Vea ka'ene Godira Sainai huri'i 'wara'eme Huni iruhoijara mwe'a varimana. 'Ena'omo Hu kú'o nahama ika'ina 'waramana. Na'i pini Nara mwe'aru pausi'eju vo akúpa 'u'o 'unama usihuna 'úmana. 27 Ikehuni maijaho uneunecha ka'ene mwe'i navujaho 'unama usive pa'arehuna. 'Enakaivo majama nahuni uneunecha ka'ene pavari'avajipo na'eja. 28 Nú ara ka'ene areri pavarihuniji apejara. 'Enajihuna'e nú Godi temani 'wame 'ee Hu teamahuni ja'ina'e venareje Hu oja mahe Huni hura vehuna. 29 'Enajihuna'e núni Godijaho niho'o venijihuni uru'uruijina.