Rom 3 | MCQ | STEP | 'Enajihuna'e ivi'a iraka maijihuna'e nú Jua rejare? 'Ene iraka maijihuna'e nú sisa 'uhuure?

Romans 3

1 'Enajihuna'e ivi'a iraka maijihuna'e nú Jua rejare? 'Ene iraka maijihuna'e nú sisa 'uhuure? 2 Jua rejujaho niho'o mamaa. Maraku'ijaho Godira Jua'a Huni ira 'ee Huni tamana iji'i vajihana. 3 Jua kajija ea 'aho'a panimaa roju. 'Ú ijí pura panimaa roju kajara veje Godira iraka ka'ene pu nuna'i ve'iro nahama 'waramajaho pave'ena? 4 Ijaho veje niho'o nimaa pa'arenama. Ijihuni maijaho Godiho nimaa nimaa kaivo ea maho'o ira'asina. Godoni ira vaji ika'ina 'waramana.

Ijihuna'e Oni irijara naja'amajaho A niho'o nimaa nimaa 'ee ea 'ahopo A vena ka'avajaho A niho'o nimaa nimaa'e kahuna 'úmana.
5 'Enakaivo núni siseijara reje Godiho ariramaa re'amajaho nú ivi'a ichá 'wa'eja? Godira nú eha múhujihuna'e Hu sisea raka? Na emaijihuna'e nuni vwiha 'waravu. 6 Niho'o Godiho ija'ina pana. Hu mwe'akaho ichá'ina'e 'otua veti'ena? 7 Na ira'ata ve'ipisa ijara veje Godoni nimaa nimaijaho samaahiravakame Hu ichá'ina'e na 'otua vetie eha miha'e? 8 Ea 'ahopo nú hana'i irechamúe núra 'waravara 'wavi'i ijá 'wavura Roe sisea vejakame mamaapo roa 'wavura. 'Enajihuna'e puni eha sisea ijaho niho'o arimaa apehuna.

Ea Maho'o Sisea 'Ee Ariramaa Pa'ajina

9 'Enajihuna'e nú ichá'ina 'wa'eja? 'Ú nú mamaa kaivo pu sisee? Niho'o pana. Nú nimaraku najahujaho ea mapoka Jua 'ee Kuriki pu'úmo sisea. 10 Godoni ira vaji ika'ina 'warumana

Ea kwinu'wi niho'o ariramaa pa'amaa. 11 Ei pini Godi hena kamuna pana 'ee Godoni 'unama ariraka nimaa nimaiji sahuna pana. 12 Ea maho'o 'unama ani va'ara 'ee ea maho'o maa pa'ana'e rejara. 'Ene niho'o ea kwinu mamaa vehuna pana. Niho'o pamamaa. 13 Puni irijaho areri ea sakahapo 'uvuja'ina hejura. 'Ene puni mitara 'ahijaho ira'ati itu'o'una navu. Uneunecha mapoka ka'ene puni ira vaji 'wavujaho areri tapara ka'ene 'úsia rukini ja'ina. 14 Puni ira vajijaho ea siripame 'ee seni itu'ona navura. 15 Puni mumorijaho mamako va'e ea 'anae kwahuna ura renaura. 16 Pura 'unama ka'ene ojujaho uneunecha tirakune 'ee ea mapoka sise'i 'ahiura. 17 'Ene pu matauhuni 'unamijaho pahena pavwihajura. 18 'Ene puni una'ijaho Godi pu pajuhavura 'úmana.
19 'Ena'omo nú niheju Godira Huni tamana iraka ka'ene 'waramajaho Jua ka'ene varapa hari hijujihi 'waramana. Ijihuna'e ea maho'o ira pa'a rene 'ee kwaa ara maho'o Godoni 'otua asúkijaho paasihuna. 20 'Enajihuna'e Godoni tamana kajara 'waramaji hina vejujihuna'e niho'o ei pini Godoni una'i ariramaa rehuna pana. Godoni tamana kajihuni maijaho sisei jihuni maiji najuhana.

'Unama Ichá'iniji Nú Godoni Una'i Ariramaa Rejajina

21 'Ene tamani jihuni 'unamijaho pana kaivo Godi iviamaa 'unama arimaa Huna najuhu. Ike 'unamakaho Godoni tamaniji'o poropetijihipo nimaa vejara. 22 Ea irahipo Jesu Keriso nimaa ro'avajaho pu Godoni una'i ariramaa rehuna. Godiho ronu kwino parehuna. 23 'Enajihuna'e nú ea mapoka sisea 'ee Godoni manuriji areria pana. 24 Ea ka'ene Jesu nimaa roji'inijija Godi pu ariramaa 'iamu. Nú Huni unenu'u pina pavenahara vo Hu nú maiji vwihanúana 'ee Hu nú Jesu Keriso oni vajijino kú'o 'imenue 'ekana. 25 Nú nimaa rojujaho Godira Jesuho ranavume roe núni tinia apene kwame Huni 'aa ka'ene arihajara vejume Godiho oja sonanana. Ija'ina'e venajaho Hu arimaiji najuhana. 'Enajihuna'e nitama ea ka'ene sisea vejajaho Godiho maraku'a matauma puni sisei jihuni eha pamihana. 26 'Enajihuna'e Godi iviamaa Huni arimaiji najuhe ea ariramaa 'iamujihuni maijaho pu Jesu nimaa rojujihuna'e 'waramuna. 27 Nú irakijihuna'e sasu'eja? Ijaho niarevara. Varapa iraka sa'ine 'ee kaukara mamai irakiji vejare? Niho'o pana. 'Enaka'i nú nimaa rojujihuni maiji hene vejara. 28 'Enajihuna'e emaijaho hura nimaa ronujara reju'e ea arira'e renuna tamana ka'ene vejujara reje arira rehuna pana. 29 'Ú Godiho Jua punaruna raka? 'Ú Hu Jenitaru puni Godia 'u'o pana raka? 'I'a Jenitaru puna 'u'una. 30 Nimaa Godiho ea ka'ene sisa 'uhui'inijija puni nimaaroa 'ahijino veje pu arira'e rehune 'ee ea ka'ene sisa pa'uhuahajija puni nimaa roijara reje pu kwinu rehuna. 31 'Ú nú nimaa rojujihuna'e Godoni varapa tamanijaho pataaro'eja? Niho'o ija'ina pave'avara. 'Enakaivo nú varapa kajaho veje núni una'i kisima'ura'e rene nahuna.