Rom 4 | MCQ | STEP | Eparahami ka'ene núni amujijaho hahijihuni 'unamijaho iraka'e piunamane?

Romans 4

Eparahami Nimaa Ronaji Ariramaa Renana

1 Eparahami ka'ene núni amujijaho hahijihuni 'unamijaho iraka'e piunamane? 2 'Ejume Eparahamira uneunecha mapoka ka'ene venajara reje hu arimaa'e re'ipisa ijara reje hu ori sasuva'a. 'Enakaivo Godoni una'i hu areri pasasuva'a. 3 Ijihuni maijaho Godoni ira vaji ika'ina 'warumana.

Eparahamiho Godi nimaa ronajihuna'e Godi hu ariramaa 'wamana.
4 Ei pini kaukara ve'amajaho hu eha apehuna kaivo swara vene mahuna pana vo hura kaukaraka venajihuni eha mahura. 5 'Enakaivo ea irara unenu'u pina parenuna vo Godi ka'ene ea siseijija ariramaa 'iamaji nimaa ronujaho Godi huni nimaa roijaho niho'o ariramaa 'iamana. 6 Teviti 'u'o ija'ina 'warumana. Ea sisea veji'inijija Godi pu ariramaa 'iamu jihuna'e pu merajihe paranuna. Pu unenu'u pina vejakame Hu ariramaa 'iahuna pana kaivo pu Hu nimaa rojumakame 'waramana.

7 Ea irara Godira vejume huni sisea vwihana arevume niho'o pa'arenana ronujaho teamanama paranu. 8 Ea sisea ka'ene Godira puni sisea vwihane aremaume nipa'arejajija niho'o teamanama paranu 'úmana.
9 Teamanavu kajaho sisa 'uhui'ina punaru roana 'aho ea sisa pa'uhui'ini jihipuna 'u'o roane? Kaena. Nú nihenare'e 'warama avaju. Eparahamiho Godi nimaa ronajihuna'e Godi hu ariramaa 'wamana. 10 Vea vecha Godiho Eparahami ariramaa 'wamane? Hu vea ka'ene sisa 'uhuajina ho sisa mai'o pa'uhui'inijino 'waramane? Hu mai'o sisa pa'uhui'ini veijino 'waramana. 11 Eparahami Godi nimaa rojume Hura ariramaa 'wamajihuna'e túna'i pu hu sisa 'uhuahara. Ijihuna'e Eparahamiho eaka mapoka ka'ene nimaa ro'ika'i sisa pa'uhuahi'ini jihipuni oma. 'Enajihuna'e ea irara Godi nimaa ronajaho Godi hu ariramaa 'wamana. 12 Eparahami 'u'o Jua 'aho'a ka'ene sisa 'uhui'ini jihipuni oma. Ijihuni maijaho Eparahami mai'o sisa pa'uhua'eme nimaa ronaja'ina'e pu 'u'o nimaa ro'avajaho pu arira'e rehuna.

Godira Nahama 'Waramajija Nimaaroa Vajiji 'Ekahuna

13 Godira Eparahami huni amuhijijihi pu'úmo kwaa ara maho'o kakaho mi'iro nahama 'waramana. Ijihuni maijaho hu Godi nimaa rojume Hura arimaa 'wamajihuna'e avanana. Hu tamana vejakame ijí mihuna pana. 14 Nú Jua puni tamana vejakame Godi merajú'ipisa ea ka'ene Godi nimaa rojujaho ira'ata reje 'ee Hura nahama 'warumaji 'u'o ira'ata'e reja'a. 15 Ijihuni maijaho ijí tamana kajarahara venue nú 'otua vehuna. Varapa ijaho pana'ipisa nú pa'eja'a. 16 Ijihuna'e nú Godi nimaa rojajihuna'e Hu nú maijí vwihanúe múhajihuna'e Hu nú nahama 'warumajaho Huni amuhi puni vaji nimaa rehuna. Godi Juaru pamerajihana vo ea ka'ene Eparahamira nimaa ronuja'ina nimaa roji'inakaho ijá merajihuna. Eparahamiho nú eaka mapoka kehi puni oma. 17 Ijihuna'e Godoni ira vaji Eparahami rone ija'ina 'warumana. Nara a vena kamareje kwaaka mapokakino eaka mapoka ka'ene hiju jihipuni oma rehuna 'úmana. Kwaaka mapokakino eaka mapoka ka'ene Eparahamira nimaa ronaja'ina'e nimaa roji'inijija Godira 'ekahuna. Godi ka'ene ea kwamasahi'ina veju'e 'urine 'ee uneunecha ka'ene pa'aji'i veju'e reji'inijina. 18 'Ejume uneunecha ka'ene túna'i nimaa parehuna sa'inijija hu majama nimaa ronana. Ijihuna'e hu ea maho'o ikihi puni oma rehuna'e nahama nitama 'warame ijá 'wama Oni amuhijijija ija'ina'e rehuna 'wamana. 19 Eparahamiho ema juara mapoka mapoka (100) pa'arejume naparaha Seraho paranamaa renajihuna'e hariha nahehuni 'unama nitanumana. 'Enakaivo Eparahami ni ema renana vo huni nimaaroijaho mai'o paajuranana. 20 'Enakaivo Godira raka ka'ene nahama 'waramaji hu panimaa rone arena o'unana kaivo maiji nimaa ronama hiji'i huni nimaaroa kisina rene na'eju'e hu Godi ta'arohi'i hinana. 21 Eparahami ijaho nihena kamajihuna'e Godira raka ka'ene nahama 'waramajaho areri ijá vehuna.

22 Eparahami Godi nimaa rojumakame Godi hu ariramaa 'wamana.
23 Godoni ira ika'ina 'waramana A ariramaa 'wamana. Ijaho Eparahami onaru rona 'warahuna pana 24 kaivo Godi nú eaka mapoka kihi rona 'warumana. Godira Jesu vejume kwama 'urinaji nú nimaa rojajihuna'e ariramaa 'úmuna. 25 Jesuho núni sisei jihuna'e kwamana. 'Enarena Hu kú'o 'urinajaho nú venue ariramaa re'avarono 'urinana.