Gal 1 | MED | STEP | Na Pol, nombuⱡa rung wu mor ei, wamp ti ndi, tᵾpa mundi nᵾmᵾndrᵾm, muna wamp nga ronduⱡ ila kep mon ku. Got Tipam ei ndi, Jisas Kraist wamp kuⱡi uⱡ ila, etpa kont titim. Wu ei ndi, na etpa nombuⱡa rung wu ei mundrum.

Galatians 1

1 Na Pol, nombuⱡa rung wu mor ei, wamp ti ndi, tᵾpa mundi nᵾmᵾndrᵾm, muna wamp nga ronduⱡ ila kep mon ku. Got Tipam ei ndi, Jisas Kraist wamp kuⱡi uⱡ ila, etpa kont titim. Wu ei ndi, na etpa nombuⱡa rung wu ei mundrum. 2 Na kᵾn, na nga angmᵾn mbᵾ kᵾn, rᵾp rop moⱡpᵾn, enim Got nga rapa tenda ila wamp mbᵾ, met Galesiya kona ila mormin mbᵾ kᵾn, mon ropᵾn ngunmᵾn.

3 Got Wuta kᵾn, Nuim Jisas Kraist raⱡ nga wamp poⱡ ti uⱡ mbᵾ, wote numan wang ndui uⱡ mbᵾ, enim kᵾn omba piyangga!

4 Akup ui kit mbila, Kraist ndi, tᵾn etpa tᵾmba pilpa kᵾn, Got Wuta nga numan pᵾtᵾm uⱡ ei teng ndupa, elim nga kᵾng kᵾⱡ wak ropa, tᵾn nga uⱡ kit mbᵾ nga mundpa kurum. 5 Ei nga, Got nga mbi ou tᵾpa, eng nomba tetᵾm uⱡ ei mel, uⱡ nga kᵾnt nga tepa mint pangga. Ei kupa.

Rᵾnang Ik Ei Tenda Mint Tetᵾm

6 Na enim nga orunga pilip, min ngun mundunt ei ka! Ti Kraist Jisas nga wamp poⱡ tᵾtᵾm uⱡ ila, Got ndi, enim wi ropa titim. Uⱡ ei, rᵾk rᵾk wak rok, enim ndi, rᵾnang ik elpa kat ku pep ronmin. 7 “Rᵾnang ik elpa kat,” ti natᵾtᵾm mon. Wote na ndi, ei mel nᵾnt ei nambuⱡ emel, wamp mat ndi, ruk molk Kraist nga Rᵾnang Ik Kai ei, tᵾk ropᵾl rok, ik elpa ti mel nilingina, enim nga numan orunga rok mbuⱡ mbaⱡ endinmin. 8 Wote tᵾn kep, muⱡ kona anggelo ti kep, muna wamp nam ti rᵾnang ik ei, tᵾn unt nᵾmp ngurmᵾn ni mel ni nandpa, ik elpa ti mel mbo endᵾm ndam, koⱡpa ndip kona ila mba ye! 9 Tᵾn unt nitmin ni mel, na ik ei aldpa nᵾnt. Wote, wamp nam ti ndi, Rᵾnang Ik ei, tᵾn ndi, enim unt mbo inditmin ei mel kelpa, ik elpa ti mel nim wamp ei, koⱡpa ndip ila pangga!

10 Na akup ya ik nᵾnt kᵾⱡ, wamp mbᵾ ndi, na kandᵾk neing nᵾmp nᵾnt muna, Got etᵾp kai mundimp pilip nᵾnt nda? Wamp mbᵾ ndi, na kandᵾk neing nᵾmp nᵾnt ndam, na Kraist nga kongun kindmant wu kupa ti, muⱡi nambᵾⱡᵾmba, mon.

Got Ndi Pol Wi ropa Tᵾpa Nombuⱡa Rung Wu Mundrum

11 Angmᵾn, enim pileing nᵾmp nᵾnt ei, na Rᵾnang Ik puⱡ nᵾmp ngur kᵾⱡ, wamp ti ndi, mim iti nᵾtᵾtᵾm. 12 Wamp ti ndi kep, na nimba ngumba, wote mbo endpa uⱡ ti, iti nᵾtᵾtᵾm mon ku. Jisas Kraist ndi, na nanim kun ik kᵾⱡ tᵾpa ora ndupa nguⱡnga tit.

13 Enim pᵾtmin ni, na unt Jura wamp mbᵾ atinga rormin uⱡ mbila pep rop kᵾn, Got nga rapa tenda ila wamp mbᵾ, rop etᵾp kit mondᵾp, ama ombil pendᵾp rop wei ai indimp pilip it. 14 Jura wamp mbᵾ, mbi paka rondᵾk, namba uⱡ etᵾng mbila, na nga wu peng tenda Jura wu mbᵾ, tᵾp akil ndup na kuimp ila mur. Na nga anda kouwᵾmᵾn kᵾⱡ nga mbo uⱡ etᵾng mbᵾ, ronduⱡ mundᵾp pep rur.

15 Wote, Got nga wamp poⱡ ti uⱡ ila, na unt mi nᵾmi kᵾn, na mbi ropa tᵾpa, elim nga kongun indeimp nimba pitim. Wote ui ila nga, elim nga kangᵾm ei, na tᵾpa ora ndupa elinga, na ndi, elim nga Rᵾnang Ik Kai ei, mbo wamp mbᵾ, nᵾmp ngeimp nimba pitim. Wamp ti ndi, na man ngeing nᵾmp pi nᵾpᵾr mon ku, muna Jerusalem kona ila nombuⱡa rung wu kuimbal morung kᵾⱡ, mbo kandᵾp uⱡ ti, iti natᵾt mon ku. Na Ereipiya kona ila tᵾngᵾnda mbo, wote Damaskas kona ila yant ur. 18 Pana raldika omba puⱡnga, na Jerusalem kona ila Pita kᵾn ik mat pilimp nᵾmp pur. Wote, na Pita kᵾn moⱡmba rumbᵾⱡ 14 omba purum. 19 Na ndi, nombuⱡa rung wu mat kᵾni nᵾkᵾndᵾr, Nuim ei nga ᵾngᵾn wu Jeims mendpᵾⱡ kᵾndᵾr.

20 Ik ya enim kᵾn mon rop ngunt kᵾⱡ, Got nga kuimp keta ila, ik kupa kᵾⱡ nᵾmp ngunt, kol rop ni nanᵾnt mon!

21 Wote akil tepa, na Siriya kᵾn, Silisiya kona raⱡ ila pur. 22 Na pur ui ei kᵾn, Juriya kona ila Kraist nga rapa tenda ila wamp, mormin kᵾⱡ ndi, na kandᵾk mbi ndui nandrᵾng. 23 Wamp mat ndi, na nga puⱡ orunga timan rok nᵾtᵾng ik ila, na mendpᵾⱡ pᵾtᵾng. “Wu ti unt tᵾn ropa etpa kit mondpa, wote mondpa pili uⱡ ei, etpa kit mondrum wu ni ndi, akup mondpa pili uⱡ ei, elim ndi, mbo endnim,” nᵾtᵾng. 24 Got ndi, na kᵾn namba uⱡ itim ei nga ik timan ei pilik, Got nga mbi ei paka rondrᵾng.