Jude

JUT KUIMP TEPA IK KɄⱠ

Ya Buk Ei Nga Puⱡ Ei:

Mon ei ropa, mondpa pili wamp mbᵾ, ronduⱡ mundᵾk molk, ik mbo wu kol ropa mbᵾ nga rᵾp etᵾk muⱡᵾi!

Ya Buk Ei, Nam Ndi Rurum:

Wu Jisas kᵾn Jeims raⱡ nga ᵾngᵾn Jut ndi, mon ei rurum.

Mon Ropa Nam Ngurum:

Mon ei ropa, Jura wamp na mondpa pili wamp rᵾⱡaip ekit orunga mbᵾ kᵾn ngurum.

Ui Nant Ila Rurum:

Ei Kraist metᵾng ei kᵾn, mbuldung orunga pana 65 (AD) ila rurum.

Ik Ronduⱡ: Jut 1:3

Na nga angmᵾn mbᵾ, Got ndi, tᵾn etpa titim uⱡ ei nga, enim mon ti rop, nguimp nᵾmp pit. Wote ei kelip, enim Got ndi, mondpa pili uⱡ ngurum ei, ronduⱡ puk, rᵾp etᵾk, uⱡ kit mbᵾ, rok mana nduk iteing nᵾmp, mon ei, rop ngunt.

IK PENG KɄⱠRump1:1-1:2 - Jut ndi, mon ei mel rurum1:3-1:16 - Ik mbo wu kep nui mbᵾ1:17-1:25 - Uⱡ iting mbᵾ mel man ik

Jut Ndi, Mon Ei Mel Rurum

1 Enim Got Tipam ndi, numan ngumba wi ropa tilinga, Jisas Kraist ndi, rᵾp etᵾm wamp kᵾⱡ, na Jeims ᵾngᵾn Jut, Jisas Kraist nga kongun kindmant wu ei ndi, mon ei rop, enim ngunt. 2 Got nga wamp kont kul uⱡ na, numan wang ndui uⱡ na, wote elim nga wamp numan ngui uⱡ na mbᵾ, enim kᵾn piyangga!

Ik Mbo Wu Kep Nui Mbᵾ

3 Na nga mᵾn mul wamp mbᵾ, Got ndi, tᵾn etpa titim uⱡ ei nga, enim mon ti, rop nguimp nᵾmp pit. Wote ei kelip, enim Got ndi, mondpa pili uⱡ ngurum ei, ronduⱡ puk rᵾp etᵾk, uⱡ kit mbᵾ, rok mana nduk iteing nᵾmp, mon ei, rop ngunt. 4 Wamp mat, unt Buk Wingti ei ndi, kit muⱡing nitim nimbᵾ, akup tᵾn kᵾn ruk ting ila ok molk, Got nga wamp poⱡ tᵾtᵾm rᵾnang ik ei, tᵾk pei mundᵾk, wote Jisas Kraist tᵾn nga wu Nuim ei, tᵾk mbuⱡ ngunmin. 5 Enim pᵾtmᵾn ik ni, aldpa enim kundᵾp namp. Ei Oⱡa Nuim ei ndi, Isrel wamp mbᵾ, Isip kona ila etpa tᵾpa mepa ekit urum. Wote akil tepa, elim mondᵾk pili napᵾtᵾng wamp mbᵾ ropa kundrum. 6 Ik ti unt anggelo mat, ronduⱡ tek morung mbᵾ, en enim nga kongun ila meka rok, kongun etᵾk kai mundi namᵾndrᵾng ila, en enim nga Got ndi, ngurum kona ei wak rorung. Anggelo mbᵾ Got ndi, ui ou ei kᵾn kᵾmp tᵾmba. Ei nga akup, Got ndi, tᵾpa kan ngurum ei mel, rumbᵾⱡ ila pek mormin. 7 Unt Sorom kᵾn Gomora raⱡ kᵾn, wote kona peng mat, nondpa titim mbila petᵾng wamp mbᵾ ndi, anggelo mbᵾ etᵾng ei mel, wapra rui uⱡ na, minᵾpi na, minal mat etᵾng ila, ndip mana ndupa, wamp minal ropa kᵾrᵾm. Uⱡ itim kᵾⱡ, uⱡ nga kona ila, ndip ei ndi nomba ei mel, to tᵾndpa itim. 8 Uⱡ tenda ei mel ku etᵾk, wamp mbᵾ ur kump mat etmin nᵾk, en enim nga kᵾng orunga, etᵾk ge nduk, wote Got nga ronduⱡ ei, tᵾk pei mondᵾk, muⱡ ila anggelo mbᵾ, ik mura nguk etmin. 9 Wote, anggelo Maikel kuimbal morum ei ndi, uⱡ mbᵾ mel iti nᵾtᵾtᵾm. Unt anggelo Maikel kᵾn Seitan raⱡ, Moses nga on ei, tek piral etᵾnggil. Ei kᵾn, Maikel ndi, Seitan tᵾpa pei mundpa ik mura ngui ngᵾnggᵾrᵾm. Wote elim ndi, nimba mel, “Got elim ndi, nim kᵾn ik ti nangga!” nitim. 10 Wote, wamp kit mbᵾ, en enim pilik kun iti natᵾtmᵾn uⱡ mbᵾ nga, ik mbuldung orunga nᵾtmᵾn. I etmin uⱡ ei ndi, en enim nga numan mbo ei, mel rakra mel, kapⱡa pelinga, en enim etpa kit mondrum. 11 Enim pilik kun itᵾi! Wamp kit kᵾⱡ ndi, unt wu Kein uⱡ kit itim uⱡ ei mel etᵾk, wu Beilam ku moni timp nimba, etpa kit mundrum ei mel etᵾk, wote, unt wu Kora ik tᵾpa roi ndupa, elim kit murum ei mel, wamp mbᵾ i ku etᵾk, en enim kit muⱡing. 12 Wamp kit kᵾⱡ ndi, enim min mondᵾk, rᵾng tᵾk tenda etᵾk, koik nok mormin ila, pipil kᵾⱡi nalk, rᵾng mbᵾ ok, roldᵾnga nok etmin. Wu kit mbᵾ, kona kᵾpkᵾ ndi kopa mepa puⱡnga, kona rui narᵾrᵾm ni mel, wote nde ti mong rui narᵾⱡnga, runggulk mundurmᵾn ni mel. 13 Wamp mbᵾ nga numan ei num kuta ndi, ropa omba ekit pi napᵾrᵾm ei mel kapⱡa. Wote wamp mbᵾ mipil na ti, muⱡ ila rᵾⱡang nomba mba, wote kumbrᵾm ni mel kapⱡa. 14 Unt kor nga, Andam nga wamp kalk tᵾk mek yant yant oⱡina, 7 itim ni kᵾn, anda kouwᵾ Inok ei ndi moⱡpa, ik pai nomba, nimba mel, “Ya kᵾnᵾiya! Oⱡa Nuim ei ndi, anggelo wingti minal mepa omba. Wamp mbᵾ nga puⱡ mbᵾ, akpa nimba, Got tᵾk mbuⱡ nguk, wote Got kᵾn el rui wamp ralk, ik minᵾpi nᵾk etmin wamp kit mbᵾ nga, puⱡ mbᵾ akpa nimba, kᵾmp tᵾpa etpa, elik rondᵾmba,” nitim. 16 Wu kit mbᵾ ndi, ik kek rᵾk kak rᵾk nᵾk, wamp mat ik ndo ngok, en enim nga orunga ou nduk pilik, wamp mat etᵾk rormin.

Uⱡ Iting Mbᵾ Mel Man Ik

17 Wote, na nga wamp angmᵾn mbᵾ pilᵾiya! Enim unt nombuⱡa rᵾng wu kᵾⱡ ndi, tᵾn nga Nuim Jisas Kraist nga ik mat kundᵾk nᵾtᵾng nimbᵾ, pilik mint muⱡᵾi! 18 Enim unt nᵾk mel, “Ui pora nimba ei kᵾn, wamp mat ndi, Got nga uⱡ eng mbᵾ kandᵾk, oi endᵾk, en enim nga orunga uⱡ kit iting mbᵾ nga ou nduk piling,” nᵾtᵾng. 19 Wamp iti mbᵾ, Muⱡnga Wingti tek muⱡi nambᵾlk, wamp etᵾk geka nduk, en enim nga kᵾng orunga ou nduk pilik etmin. 20 Wote, enim wamp angmᵾn mbᵾ, en enim nga mondpa pili wingti ila, ronduⱡ puk molk, Muⱡnga Wingti ei kᵾn atinga rᵾi! 21 Enim Got nga wamp numan ngui uⱡ ila muⱡangina, tᵾn nga Nuim Jisas Kraist nga wamp kont kᵾⱡ uⱡ ei ndi, enim uⱡ nga kᵾnt nga kont mul uⱡ ei tᵾpa ngumba, ei nga nokundᵾk muⱡᵾi! 22 Wamp kont kul uⱡ ei, mondpa pili ronduⱡ pi napᵾm wamp mbᵾ kᵾn etᵾk, wote wamp mat, ndip nuing mbᵾ etᵾk tᵾi! Wote, uⱡ kit eng wamp mbᵾ, kont kulk uⱡ kit eng mbᵾ enim oⱡᵾmp ting ei nga, ok tᵾk muⱡᵾi! 24 Enim kawa ndupa romba ei nga, peng manga rakpa muⱡangga, ambulk palk uⱡ eng nui mbᵾ molk ting. 25 Tᵾn nga Etpa Ti Wu Got aⱡᵾm ei, tᵾn nga Nuim Jisas Kraist ei ndi, etpa mon mondpa, kaip nindpa etangga! Wamp mumuk rui omba uⱡ ombil ᵾmbil mbᵾ, elim kᵾn uⱡ nga kᵾnt nga kont mul uⱡ ei, pimba ei nga petᵾm. Ei kupa.