Revelation of John 16
Got Nga Popᵾⱡ Ming 7 Kᵾⱡ
1Wote, na kum tep pit mel, Got nga manga wingti ila wamp ti ndi, wi ronduⱡ ropa, anggelo 7 kᵾⱡ kundpa, nimba mel, “Got nga popᵾⱡ ming 7 kᵾⱡ, mek puk nᵾi kona mbila, oi nduk mana ndᵾi!” nitim.2Wote, anggelo kuimbal ni ndi, elim nga ming ni, mᵾi kona ila oi ndurum. Ni kᵾn, wamp mat, mel rakra ei nga to tᵾndᵾk mim etᵾng, mel ei mbi paka rondᵾk, wote mel rakra ei nga tip timal ei, kᵾng ila tᵾtᵾng wamp mbᵾ nga kᵾng mbila, iti mam mindil nui mat itim.
3Wote, anggelo ti ndi, elim nga ming ni, num kuta ila oi nduⱡnga kᵾn, num kuta ni, wamp kui nga mema roⱡnga mel, num kuta ila oma na, mel kont murmin nimbᵾ, kolk pora ndurᵾng.
4Wote, anggelo 3 ni ndi, elim nga ming ni, nu mam na, nu pit na mbila, oi nduⱡnga mel nu mbᵾ pora, mema rᵾrᵾm. 5Na pit ei, nu mbᵾ rup etᵾm anggelo ei ndi, nimba mel, “Got nim unt murᵾn, akup morᵾn ku, nim Wu Wingti ei molkᵾn, mint purᵾn ei ndi, wamp mbᵾ pora, kᵾmp tin uⱡ ei, kun mint mba tetᵾm. 6Wamp mbᵾ ndi, Got nim nga painui wu na, wamp wingti na mbᵾ rok kondᵾk, mema oi ndurᵾng. Ei nga, nim ndi, wamp kit mbᵾ, wamp mema kulk ngana, nuing uⱡ ei, uⱡ kit etᵾng mbᵾ mel, punt rokᵾn ngun!” nitim.
7Wote, na pit mel, rat pol wingti ila ik ti, nimba mel, “Nuim Got Ronduⱡ Purum ei ndi, wamp mbᵾ kᵾmp tin uⱡ ei, kupa kun mint itin!” nitim.
8Wote, anggelo 4 ni ndi, elim nga ming ni, kona ant ila oi nduⱡnga kᵾn, ant ndip mel ei ndi, wamp nomba kondᵾmba. 9Ant ei, nomba ronduⱡ minal puⱡnga, wamp mbᵾ nurum ila, Got kᵾn numan ropᵾl rok, mbi ou ngᵾng uⱡ ei kelik, aldpa uⱡ mbun kit mba nga ronduⱡ ei, Got kᵾn tepa onum nᵾk, Got kᵾn ik mura etᵾng.
10Wote, anggelo 5 ni ndi, elim nga ming ni, mel rakra ni nga rᵾpᵾndi pol ila oi ndurum. Ni kᵾn, mel rakra ei nga morum kona ni, rumbᵾⱡ roⱡnga kᵾn, wamp mindil mam mat nok, gu mbᵾ konggilik puk rorung. 11Wamp mbᵾ ndi, en enim nga kᵾng iti etpa, mindil nok etᵾng mbᵾ nga, wote Got ik mura kit ngurung. Wote, en enim nga uⱡ kit etᵾng mbᵾ nga numan ropᵾl rok, wak rui narᵾrᵾng.
12Wote, anggelo 6 ni ndi, elim nga ming ni, nu Yupretis mam ila, oi nduⱡnga mel, nu mam ni, kumbᵾⱡpa kᵾr nitim. Uⱡ ei ndi, wu nuim mumuk al ant oⱡa, ui unt nga molk, uing mbᵾ nga nombuⱡa mam rundrum. 13Wote, na moⱡᵾp, kundᵾr mel, muⱡnga kit raldika kat, rok mel ralk kᵾn, wimbᵾ mam na, mel rakra na, ik kol ropa painui wu mbᵾ nga keta ila, ekit urum. 14Muⱡnga kit mbᵾ ndi, uⱡ rᵾpᵾndi elpa elpa mat etᵾk kᵾn, puk mᵾi kona mbila, wu nuim mumuk mbᵾ kᵾn, kunt kan elingina kᵾn, wu nuim mbᵾ ndi, Got Ronduⱡ Purum ei nga ui mam ila, el iteing nimba, tᵾpa mᵾk rorung.
15“Enim pilᵾi! Na kindᵾp wamp mel uimp. Wamp nam ti, ur pi napᵾpa, elim nga rᵾl mel mbᵾ, tᵾpa kun etpa raⱡpa moⱡum wamp mbᵾ, ambulk palk muⱡing. Wamp nam ti, mel mbᵾ ruⱡi naⱡᵾpa wei gi go wamp moⱡung ila undi nandᵾmba!” nitim.
16Wote, muⱡnga kit mbᵾ ndi, wu nuim mumuk mbᵾ, kunt kan etᵾk mek ok, Ipru ik ila kona ti mbi tek, Amaketon, nᵾtmin kona ila, tᵾk mou rorung.
17Wote, anggelo 7 ni ndi, elim nga ming ni, kona kᵾpkᵾ nila, oi nduⱡnga mel, Got nga manga wingti ila mukᵾr wamp ti ndi, ronduⱡ wi ropa, nimba mel, “Got nga popᵾⱡ ei kᵾn, mbun kit mbᵾ kᵾn pora ninim,” nitim. 18Ni kᵾn, kona nimbᵾ, kᵾmp kiraipa minal elinga, kona kᵾmp muⱡ ropa, muⱡ gaⱡa nimba kilimbᵾmp mam ti itim. Etᵾm uⱡ ei, Got ndi, unt muⱡ mᵾi raⱡ iti nᵾti kᵾn, kilimbᵾmp iti nᵾtᵾtᵾm mel itim. 19Wote, kona peng ou ni, oi ndupa raldika inditim. I elingina, mᵾi kona mbila, kona peng tetᵾm mbᵾ pora, ropa kit mundrum. Ni kᵾn, Got ndi, kona peng ou Bapilon ni, pilpa moⱡpa, elim popᵾⱡ mam ti mundrum, wain ming ni oi ndurum. Uⱡ ei, Got elim nga popᵾⱡ mam ila itim. 20Ei kᵾn, nu muⱡ kuimp titim mbᵾ pora, wei ai itim. Wote, komnga mong titim mbᵾ pora, i ku itim. 21Wote kona kup mong mam ndo ni mat, 45 kilo mel, wi muⱡ ila mana omba kᵾn, wamp mbᵾ ropa kit mundrum. Nambuⱡ emel, Got ndi, uⱡ itim ei nga wamp mbᵾ ndi, Got kᵾn ik mura kit mat tetᵾng.
Copyright information for
MED