Eph 5 | MHL | STEP | Aria ni Mua Maneka muuka wiipa wiar ikeman, naeya o manek akena nia kookaliya. Naapeya ni kekanep ona sira-pa wiar ikeka.

Ephesians 5

I parina-pa soomarem-ikaikua

1 Aria ni Mua Maneka muuka wiipa wiar ikeman, naeya o manek akena nia kookaliya. Naapeya ni kekanep ona sira-pa wiar ikeka. 2 Krais yia kookalep yia naep wame wuami umep Mua Maneka patirak. Nain patirow maa kuumiwkin kawus ikin eliwa urupeya Mua Maneka wiar kookaliya, nain saarik. Naapeya nis pun mua wia kookalowa sira-pa ikeka. 3 Yeesus teeria sira samora feenap nain onowa weetak akena. Ni enum erua sira ne sira samo-samora onowa me kema suuweka. Maa me kookaleka. Sira samora kamenap nain me niar imenarinok akena. 4 Ne opor samora me maeka. E, opora aakunemi me kapeweka, niirow opora aakunemi sira samora-pa me pikiweka. Ni sira naap onowa eliw marew. Ni anane opora aakunemi Mua Maneka sira eliwa naakem-ikeka. 5 Fain maken akena, wi mua feenap nain Krais ne Mua Maneka pika kemena wiar ikip pokow eliwa imenowa me pepek. Wi uruw mia samora nain, wi sira samora-i e maa kema kuimik nain. Mua eena maa kema wiar kuimik nain naap, inasin wadola ookimik. 6 Mua oko-ke opora maken marewa nain nia maakemi me nia peeskimemi nia mufuk. Wi mua opora fienimik nain wi Mua Maneka kema bagiaw iwimik. 7 Naapeya wi nain wiamiya me ememiriareka.

8 Ni iiriw kokoma-pa ikeman, ne aakisa Mua Maneka-ke nia aawep epa parina-pa nia wuak. Parina-ke sira eliwa unowa, sira kakeniw ikowa ne opor makena aakunowa nain imeniya. Naapeya ni parin emeria mua ikeka. 10 Yiena Maneka sira kookaliya nain baliwep wiar amisarep ookeka. 11 Wi mua epa kokom sira onimik nain me wiokeka. Nain sira eliwa-ko me imeniya. Ni sira eliwa oniwkin kokom sira eliw marew nain ariman wiar arinok. 12 Wi mua sira samora kokot onimik nain wiokowa eliw marew, ne wiar aakunowa pun emina ururiyen. 13 Maa unowa parina-ke iweya ariman ariya. 14 Ne maa unowa nain parina-pa ariman akena ikaiya nain iiwawun parinarek. Naapeya opor oko feenap ikua,

“No inep ikon nain iikire. Umep ikon nain iikire, naeya Krais parina nefa mikinok.”
15 Naapeya ni niam urufap baliwep ikeka. Ni mua momora saarik me ikeka, kema pukep ikeka. 16 Moram aakisa epa fain sira samora-ke epa aawok. Naapeya ni sira eliwa onowa kemaiw ikok naap topialem-ikeka. 17 Naapeya ni mua momora saarik me ikeka. Yiena Maneka eena sira kamenap kookaliya nain amisarep onomaka. 18 Eka kekanowa me enep momorareka, oko sira samora-pa niam wuowen. Mua Maneka Ewar-ke kema-pa niar taanep ikainok. 19 Ne mua oko wiamiya aakunemi-na Mua Maneka opora nain maemi wiamiya aakuneka. E oko, lotu someka awemi Mua Maneka unuma wiar fakereka, someka eena Ewar Eliwa kema nieya kema-pa niar taanoweka. 20 Ni anane Mua Maneka eena maa unowa onomakek nain Yeesus Krais unuma-pa sira eliwa naakem-ikeka.

Pol-ke wi mua ne emeria muewemik nain wia maek

21 Aria ni Mua Maneka teeria anane Krais ekima opap niam porop niena tepak-pa niam wueka. 22 Ni emeria niena mua tepak-pa wiar ikeka, yiena Maneka tepak-pa wiar ikem naemi naap niam poreka. 23 Moram emeria woosa ona mua naneka. Ne Krais pun naap, ona teeria wia aawok, naeya ona teeria o mia ara-ke, ne woosa ona ikua. 24 Ona teeria eena Krais tepak-pa wiar ikua naap. Naapeya ni emeria pun naap, ni anane niena mua tepak-pa wiar ikeka.

25 Ne Krais ona teeria wia kookaliya naap, ni mua pun niena emeria wia kookaleka. O ona teeria naep umok. Ona teeria kakeniw ikauk naep opora wia maakemi eka yasuweya tumin marew, dubil akena ikaimik. 27 O yena teeria wia saliwamkun dubil akena efar ikauk naep sira naap onak. Naeya teeria nain tumin marew, mia kanima bolonow marew, ne maa kamenap-ke me wia samorinon, weetak. Neeke pina marew wueliwa ikaimik. 28 I unowiya Krais mia ara wiar ikoweya ona yia saliwiya. Naapeya ni mua pun naap, niena emeria wia kookaleka, niena niam kookaliman naap. Mua eena ona emeria kookaliya nain ona pun naap wame kookaliya. Mua kuisow ona mia-ko me wame samoriya, weetak. Ona mia baliwep akena wame saliwami maa baliwep enimiya. 31 Mua Maneka opor ara oko feenap maek,

“Naapeya mua ona wiawi onak wia piipuap emeria ikos epaskun arep mia kuisow ikaimik.”
(Yenesis 2.24)

Naapeya mua emeria aawep ikok wiam saliwam-ikauk. 32 Opora maem nain maa oko kokot ikua. Yo maem fain, opora nain Krais ona teeria epaskun aremik nain wia pepekimok. 33 Nain nis pun nia maek, ni mua unowiya niena emeria wia kookaleka, niena niam kookaliman naap. Ne ni emeria pun naap, niena mua tepak-pa wiar ikok opora wiar miimeka.